މިއަހަރު ނިމޭއިރު, 70 އިންސައްތައާ 80 އިންސައްތައާ ދެމެދުގެ އޮޑިޓް މަސައްކަތްތައް ނިންމާލެވޭނެކަމަށް ބެލެވޭކަމަށް އޮޑިޓަރ ޖެނެރަލްގެ އޮފީހުން ބުނެފިއެވެ.

ހޯމަ ދުވަހު ކުރިއަށްދިޔަ މާލިއްޔަތު ކޮމިޓީގެ 19 ވަނަ ބައްދަލުވުމަށް އޮޑިޓަރ ޖެނެރަލްގެ އޮފީސް ވަނީ ހާޒިރުކޮށްފައެވެ.

މި ބައްދަލުވުމުގައި ހުޅުދޫ ދާއިރާގެ މެމްބަރު އިލްޔާސް ލަބީބް ކުރެއްވި ސުވާލަކަށް ޖަވާބުދެއްވަމުން، އެސިސްޓެންޓް އޮޑިޓަރ ޖެނެރަލް ޝިރުމީނާ ހުސައިން ވިދާޅުވީ މިހާރު 582 އޮޑިޓެއްގެ މަސައްކަތް ކުރަމުންދާކަމަށެވެ. އެއީ މިދިޔަ އަހަރު ކުރަމުންދިޔަ މަސައްކަތްތަކާއި، މިދިޔަ އަހަރުގެ މެދުތެރެއިން ހަވާލުވެފައިހުރި އެކި މަސައްކަތްތައްކަމަށެވެ.

މި ބައްދަލުވުމުގައި ވާހަކަފުޅުދައްކަވަމުން އެސިސްޓެންޓް އޮޑިޓަރ ޖެނެރަލް އިބްރާހީމް ފަޒީލް ވިދާޅުވީ، މިއަހަރު ނިމޭއިރު އެ 582 އޮޑިޓުގެ ތެރެއިން 70 އިންސައްތައާ 80 އިންސައްތައާ ދެމެދުގެ އަދަދެއް ހާސިލުކުރުމަށް އަމާޒު ހިފާފައިވާކަމަށެވެ. މިއީ ހާސިލްނުވާނެ މިންވަރެއް ނޫންކަމަށް އޭނާ ވިދާޅުވިއެވެ.

އޮޑިޓް އޮފީހުން ގެންދަނީ ދައުލަތުގެ އެކި އިދާރާތަކުގެ އޮޑިޓުތައް ނިންމަމުންނެވެ. މިއަހަރުގެ މިހާތަނަށްވެސް ގިނަ އޮޑިޓުތަކެއް ނިންމާފައިވާއިރު، މިއަހަރުތެރޭގައި އެ އިދާރާއިން ވަނީ ފާއިތުވި ދެ އަހަރުގެ އޮޑިޓުތައްކޮށްފައެވެ.