މިހާތަނަށް އޮޑިޓް އޮފީހަށް ދޭ އެންމެ ބޮޑު ބަޖެޓް އަންނަ އަހަރު

ތާރީހުގައި އޮޑިޓު އޮފީހަށް ދޭ އެންމެ ބޮޑު ބަޖެޓު އަންނަ އަހަރަށް ދޭން ރައްޔިތުންގެ މަޖިލީހުން ފާސްކޮށްފިއެވެ.

އަންގާރަ ދުވަހު މަޖިލީހުން އޮޑިޓު އޮފީހަށް ފާސްކޮށްފައި ވަނީ 134 މިލިއަން ރުފިޔާގެ ބަޖެޓެކެވެ. 51 މެމްބަރުންގެ ވޯޓާއި އެކު މި ބަޖެޓް ފާސްކުރި އިރު މި ބަޖެޓް ފާސްކުރުމަށް އެއްވެސް މެމްބަރަކު ދެކޮޅު ހައްދަވާފައި ނުވާކަން ފާހަގަކޮށްލެވެއެވެ. އޮޑިޓަރ ޖެނެރަލްގެ އޮފީހުން އެދުނު ގޮތަށް މި ބަޖެޓް ފާސްކޮށްދިނުމަށް މަޖިލީހުން މި ވަނީ ނިންމާފައެވެ.

އޮޑިޓު އޮފީހުގެ ބަޖެޓް މާލިއްޔަތު ކޮމިޓީން ފާސްކުރީ ހޯމަ ދުވަހުއެވެ. އޮޑިޓު އޮފީހުގެ 2025 ވަނަ އަހަރުގެ ބަޖެޓަކީ 123 މިލިއަން ރުފިޔާއެވެ. މަޖިލީހުގެ މާލިއްޔަތު ކޮމިޓީން އޮޑިޓް އޮފީހަށް 134 މިލިއަން ރުފިޔާގެ ބަޖެޓެއް ދިނުމަށް ނިންމާފައި ވަނީ އެ އޮފީހުން މާލިއްޔަތު ކޮމިޓީގައި ހާމަކުރި ކަންބޮޑުވުންތަކަށް ފަހުގައެވެ. އެ އޮފީހުގެ ބަޖެޓްގެ ތެރެއިން 89 މިލިއަން ރުފިޔާއަކީ ރިކަރަންޓު ހަރަދު ކަމަށާއި ކެޕިޓަލް ހަރަދަށް ތިން މިލިއަން ރުފިޔާ ހިނގާ އިރު ޕީއެސްއައިޕީ ބަޖެޓަށް 42 މިލިއަން ރުފިޔާ ހޭދަވާ ކަމަށް އޮޑިޓަރ ޖެނެރަލްގެ އޮފީހުން ވަނީ ބުނެފައެެެވެ.

އަންނަ އަހަރު 81 އޮޑިޓުގެ މަސައްކަތް ކުރުމަށް އެ އޮފީހުން ވަނީ ނިންމާފައެވެ. އޮޑިޓަރ ޖެނެރަލްގެ އޮފީހަށް ވަސީލަތުގެ ދަތިކަން އިންތިހާ އަށް އޮތް ކަމަށް އެ އޮފީހުން ވަނީ ފާހަގަކޮށްފައެވެ. ކޮމިޓީ މަރުހަލާގައި އެމްޑީޕީއަށް ނިސްބަތްވާ މެންބަރު ވެސް މި ބަޖެޓް ފާސްކުރުމަށް އެއްބާރުލުން ދިންކަން މާލިއްޔަތު ކޮމިޓީގެ މުގައްރިރު އޭދަފުށީ ދާއިރާގެ މެމްބަރު އަހުމަދު ސަލީމް ވަނީ ފާހަގަކުރައްވާފައެވެ.

ބަޖެޓް އިތުރުކުރަނީ މުސާރަތައް ބޮޑުކުމުގެ އިތުރުން އެ އޮފީހަށް އިތުރު ފަސް ސީނިއާ އޮޑިޓަރުން ނެގުމަށް ކަމަށް އޮޑިޓަރ ޖެނެރަލްގެ އޮފީހުން ބުނެފައިވެއެވެ. ކުރިއަށް އޮތް އަހަރު އެ އޮފީހުގެ މަސައްކަތްތައް ބައްޓަންކުރަމުން ދަނީ 2026-2028ގެ ސްޓްރެޓެޖިކް ޕްލޭނަށް ބެލުމަށް ފަހުގައެވެ.