ކައުންސިލްތަކަށް ޕްރޮޖެކްޓް ހިންގުން ހަވާލުކުރުމަކީ، އެ ޕްރޮޖެކްޓެއް ހިންގުމާ ހަވާލުވާ ވުޒާރާއެއްގެ މެންޑޭޓްގައިވާ ކަމެއް ކަމަށް, ފިނޭންސް މިނިސްޓަރ އިބްރާހީމް އަމީރު ވިދާޅުވެއްޖެއެވެ.

މިނިސްޓަރ އަމީރު މިހެން ވިދާޅުވީ ރައްޔިތުންގެ މަޖިލިހުގެ ޖަލްސާގައި، މިނިސްޓަރުންނާ ސުވާލުކުރުމުގެ ބައިގައި، އުނގޫފާރު ދާއިރާގެ މެންބަރު މުހައްމަދު ވަހީދު ދެންނެވި ސުވާލުގެ ޖަވާބުގައެވެ. މިނިސްޓަރ ވިދާޅުވީ ކައުންސިލްތަކަށް ދޭ ހިލޭ އެހީ ކަނޑައެޅުމާއި، ކައުންސިލްތަކުގެ ބަޖެޓް ތައްޔާރުކުރުމާއި، ބަޖެޓް ތަންފީޒުކުރުމުގައި އަމަލުކުރާނެގޮތުގެ ގަވާއިދު ގެޒެޓްކޮށްފައިވާކަމަށެވެ. އޭގެ ކުރިންވެސް އުސޫލެއްގެ ތެރެއިން ކައުންސިލްތަކުގެ ބަޖެޓް ހެދުމުގެ މަސައްކަތް ކުރަމުން އައިކަމަށާއި، އެހެންނަމަވެސް ގަވާއިދެއް ހަދައި، މިހާރު ގެޒެޓްކޮށްފައިވާކަމަށެވެ.

މިނިސްޓަރ ވިދާޅުވީ މިއަހަރު ފާސްވެގެން އައީ 36.9 ބިލިއަން ރުފިޔާގެ ބަޖެޓެއް ކަމަށެވެ. އަދި ބަޖެޓް ފާސްވެގެން އައިނަމަވެސް، އެއީ ފިސްކަލް އަހަރެއްގެ ޖެނުއަރީ ފެށޭއިރު، ގަނޑުކޮށް ޚަރަދުކުރަން ލިބިފައި ހުންނަ ފައިސާއެއް ނޫންކަމަށެވެ.

އަދި މިފައިސާ ޚަރަދުކުރުމުގައި ދައުލަތަށް ފައިސާ ވަންނަ މިންވަރު ނުވަތަ ކޭޝްފްލޯއަށް މުހިންމު އަހައްމިއްޔަތުކަމެއް ދޭންޖެހޭކަމަށެވެ.

މީގެ އިތުރުން ކައުންސިލްތަކާއި މަޝްރޫއުތައް ހަވާލުކުރެވެން އޮންނަނީ، ޕްރޮޖެކްޓް ހަވާލުވާ ވުޒާރާއަކާ ކައުންސިލްތަކާ އެއްބަސްވުމެއްގައި ސޮއިކުރެވިގެން ކަމަށާއި، އޭގެ ފަހުން މާލިއްޔަތު ގަވާއިދުގައި އޮންނަ ޓެންޑަރިންގ ޕްރޮސެސް މަރުހަލާ ފެށޭނެކަމަށެވެ.

މިނިސްޓަރ ވިދާޅުވީ 5 މިލިއަނަށްވުރެ ދަށް ޕްރޮޖެކްޓްތައް ޓެންޑަރިން މަރުހަލާގައި ކުރިއަށްދާނެ ގޮތްތައް ނިންމަނީ އެ ވުޒާރާއަކުން ކަމަށެވެ. އެއީ ފިނޭންސް މިނިސްޓްރީން ކުރިއަށްގެންދާ ކަމެއް ނޫންކަމަށެވެ. އޭގެ އިތުރުން ޕްރޮޖެކްޓް ހިންގަމުންދާ ވަރަކަށް ފިނޭންސް މިނިސްޓްރީން ދާނީ ފައިސާ ދޫކުރަމުންކަމަށާއި، ބައެއް ފަހަރު ވަރަށް ކުޑަކުޑަ ޕްރޮޖެކްޓްތަކަށް ގަނޑުކޮށް ފައިސާ ދީފައި ހުންނާނެކަމަށެވެ.