ފްރާންސްގައި ސަރުކާރާ ދެކޮޅަށް އެތައްހާސް ބަޔަކު މުޒާހަރާކޮށްފި
17 އޮކްޓޯބަރު 2022 | ހޯމަ 09:41އާދީއްތަ ދުވަހުގެ މުޒާހަރާގައި 140,000 މީހުން ބައިވެރިވި ކަމަށް ރިޕޯޓުތައް ބުނޭ
ފްރާންސްގައި ކުރަމުންދާ މުޒާހަރާ
ދިރިއުޅުމުގެ ޚަރަދުތައް މައްޗަށް ދިއުމާއި އަދި ތިމާވެށީގެ ހާލަތު ރަނގަޅު ކުރުމަށް ސަރުކާރުތަކުން އެކަށީގެންވާ ގޮތުގައި ފިޔަވަޅު ނާޅާކަމަށް ބުނެ ޔޫރަޕްގެ ބައެއް ގައުމުތަކުގައި މިހާރު ކުރަމުންދާ ސިލްސިލާ މުޒާހަރާތަކުގެ ތެރެއިން ފްރާންސްގައި ވެސް އާދީއްތަ ދުވަހު އެތައްހާސް ބަޔަކު މަގުތައް މައްޗަށް ނުކުމެ ސަރުކާރާ ދެކޮޅަށް މުޒާހަރާކޮށްފިއެވެ.
އޭގެ ކުރިން ފްރާންސްގެ މުހިންމު ރިފައިނަރީއެއްގެ މަސައްކަތްތެރިން ހަޅުތާލުކުރަމުންދާތާ ވަނީ ތިން ހަފްތާ ވެފައެވެ. ނަތީޖާއެއްގެ ގޮތުން ފްރާންސްގައި ތެޔޮ ލިބުން ދަތިވެ އަގުވަނީ އުފުލެން ފަށާފައެވެ. އަދި ތެޔޮ އަޅާ ދޭ ތަންތަނުގެ ދޮށުގައި ދިގު ކިއުތައް ދަމާލާފައިވާ ކަމަށް ޚަބަރު ލިބެއެވެ.
އާދީއްތަ ދުވަހުގެ މުޒާހަރާއަށް ގޮވާލާފައިވަނީ ސިޔާސީ އިދިކޮޅު، "ފްރާންސް އަންބައުންޑް ޕާޓީ" އިންނެވެ. އެއްލައްކަ ސާޅީސް ހާހެއްހާ މީހުން ބައިވެރިވި މުޒާހަރާގެ ބައިވެރިން ވަނީ މޫސުމަށް އަންނަ ނޭދެވޭ ބަދަލުތަކުގެ ސަބަބުން ލިބެމުންދާ ގެއްލުންތައް ކުޑަކުރުމަށް ސަރުކާރުން އިތުރު އިންވެސްޓްމަންޓްތައް ކުރުމަށް ގޮވާލާފައެވެ. މީގެ އިތުރުން ހަކަތައިގެ ބާވަތްތަކުގެ އިތުރުން ޒަރޫރީ މުދަލާއި ކުލީގެ އަގުތައް ފްރީޒް ކުރުމަށް ގޮވާލާފައިވެއެވެ. އަދި މާބޮޑު ބުރައަކާ ނުލައި ކޯޕަރޭޝަންތަކަށް ލިބެމުންދާ ބޮޑު ފައިދާ އިން އިތުރު ޓެކްސް ނެގުމަށް ގޮވާލާފައިވެއެވެ.
ފްރާންސްގައި ޓްރާންސްޕޯޓް ޚިދުމަތްދޭ ފަރާތްތަކުގެ ހަޅުތާލެއް ވެސް ކުރުމަށް އިދިކޮޅު ފަރާތަކުން ދަނީ ރާވަމުންނެވެ. މި ހަޅުތާލު ފެށޭނީ އަންގާރަ ދުވަހުއެވެ. އެއަށް ފަހު މުސާރަ ބޮޑުކޮށްދިނުމަށް ގޮވާލާ ބާއްވާ މުޒާހަރާއެއް ވެސް އިދިކޮޅުން ރާވަމުންދާކަމަށް ޚަބަރު ލިބެއެވެ.
ފްރާންސްގެ އިތުރުން އި ގިރޭސި ވިލާތުގައި ވެސް ދަނީ "އިނަފް އިސް އޮނަފް" ގެ ނަމުގައި ކެމްޕެއިނެއް ފަށާ ސަރުކާރާ ދެކޮޅަށް އަޑު އުފުލަމުންނެވެ. މުޒާހަރާ ކުރާ ފަރާތްތަކުން ތަންތަނަށް ގެއްލުން ދެމުންގެންދާތީ އިނގިރޭސި ހޯމް ސެކްރެޓަރީ ވަނީ ނުރުހުން ފާޅުކުރައްވާފައެވެ.
