ރެއާލުން ޒަބީ އަލޮންސޯ އަށް ފާރަލަނީ!

ސްޕެއިންގެ ރެއާލް މެޑްރިޑުން މުސްތަޤުބަލުގައި އެ ޓީމުގެ ކޯޗަކަށް ގެނައުމަށް ޒަބީ އަލޮންސޯ އަށް ފާރަލަމުން އަންނަ ކަމަށް މީޑިއާ ރިޕޯޓުތައް ބުނެފިއެވެ.

ސްޕެއިންގެ މީޑިއާތަކުގައި ރިޕޯޓުކޮށްފައިވާ ގޮތުން ރެއާލުން އަލޮންސޯ އަށް ފާރަލަމުން އަންނަނީ އެޓީމުގެ ކޯޗުކަމުން ކާލޯ އަންޗެލޮޓީ ވަކިވާ ހިސާބަނުން އޭނާ ހަމަޖައްސާ ގޮތަށެވެ. ރެއާލާއެކު އަންޗެލޮޓީ ހަދާފައިވާ އެއްބަސްވުން ހަމަވާނީ 2024 ވަނަ އަހަރުއެވެ. އުމުރުން 63 އަހަރުގެ އަންޗެލޮޓީ ވަނީ އެއަށްފަހު އޭނާ ރިޓަޔާވާނެ ކަމުގެ އިޝާރާތެއް ކޮށްފައެވެ. އޭނާ ބުނީ ކޯޗިން ކެރިއަރު ނިންމާލާނީ ރެއާލުން ކަމަށެވެ.

މި މަހުގެ ތެރޭގައި އަލޮންސޯ ވަނީ ބަޔާ ލެވަކޫސަންގެ ކޯޗުކަމާ ހަވާލުވެފައެވެ. އޭނާ މިހާރު އަންނަނީ އެ ކުލަބަށް އިރުޝާދު ދެމުންނެވެ. ލެވަކޫސަންގެ ކޯޗުކަމާ އަލޮންސޯ ހަވާލުވީ ދެ އަހަރު ދުވަހުގެ އެއްބަސްވުމެއްގެ ދަށުންނެވެ. އެ ޓީމާއެކު އޭނާ ހަދާފައިވާ އެއްބަސްވުމުގެ މުއްދަތު ހަމަވާނީ 2024 ވަނަ އަހަރުގެ ޖޫން މަހުގެ ނިޔަލަށެވެ.

ރިޕޯޓުތައް ބުނާ ގޮތުގައި ލެވަކޫސަންގައި އަލޮންސޯ ކުރަމުން އަންނަ މަސައްކަތް ރެއާލުން ވަރަށް ގާތުން ބަލާނެއެވެ. އެ ޓީމާއެކު އޭނާ އަށް ރަނގަޅު މަސައްކަތެއް ކުރެވޭތޯ ބަލަމުން އަންނާނެ ކަމަށް ރިޕޯޓުތައް ބުނެއެވެ.

ކުރިން ރެއާލަށް ކުޅެދީފައިވާ އަލޮންސޯ އޭނާގެ ކޯޗިން ކެރިއަރު ފެށީ 2018 ވަނަ އަހަރު ރެއާލް މެޑްރިޑުގެ 14 އަހަރުން ދަށުގެ ޓީމުންނެވެ. އެއަށްފަހު 2019 ވަނަ އަހަރު އޭނާ ވަނީ ރެއާލް ސޮސިއެޑާޑްގެ ބީ ޓީމުގެ ކޯޗުކަމާ ހަވާލުވެ، އެ ޓީމަށް އިރުޝާދު ދީފައެވެ. އެ ޓީމުގެ ކޯޗުކަން އޭނާ ދޫކޮށްލީ މިއަހަރުގެ މެއި މަހުގެ ތެރޭގައެވެ.

އޭނާ ވަނީ ރެއާލްގެ އިތުރުން ލިވަޕޫލާއި ބަޔާން މިއުނިކަށް ވެސް ކުޅެދީފައެވެ.