ވުލަހޮވިޗްގެ ލަނޑުން އެލެގްރީއަށް ހަމަޖެހުމެއް

ސާބިއާގެ ފޯވާޑް ޑުސާން ވުލަހޮވިޗްގެ ހަމައެކަނި ލަނޑުން މޮޅުވެ, ޔުވެންޓަސްގެ ކޯޗު އެލެގްރީއަށް ހަމަޖެހުމެއް ލިބިއްޖެއެވެ.

މިސީޒަންގައި ނަތީޖާތައް ދަށްވެ, ޕްރެޝަރ ކުރިމަތިވިނަމަވެސް ކްލަބްގެ ވެރިންގެ އިތުބާރު އޮތުމުން މަޤާމްގައި ދެމިހުރި އެލެގްރީއަށް ހަމަޖެހުން ލިބުނީ ސެރީ އޭގައި 1-0 ން ޓޮރިނޯ އަތުން މޮޅުވުމުންނެވެ. މެޗުން މޮޅުވުމުން ޔުވެންޓަސްއަށް ކުރިއަށް ޖެހިލެވުނީ ހަތްވަނަ އަށެވެ. އެއީ 16 ޕޮއިންޓާއެކުއެވެ. ޑެނީލޯ ތަނަވަސްކޮށްދިން ފުރުޞަތަކުން ހަމައެކަނި ލަނޑު 22 އަހަރުގެ ފޯވާޑް ޖެހީ 74 ވަނަ މިނެޓުގައެވެ. މިއީ މިސީޒަންގައި ވުލަހޮވިޗް ޖެހި ހަވަނަ ލީގު ގޯލެވެ.

މިއީ ޔުވެންޓަސް މިސީޒަންގެ ލީގުގައި ކުޅުނު 10 މެޗުގެ ތެރެއިން މޮޅުވި ހަތަރު ވަނަ މެޗެވެ. ޗެމްޕިއަންސް ލީގުގައި މެކަބީ ހައިފާ އަތުންވެސް ބަލިވެ, ގްރޫޕް ސްޓޭޖް ފަހަނައަޅާ ދިއުމުގެ އުއްމީދުވެސް ކުޑައެވެ.

ސެރީ އޭ ތާވަލްގެ އެއްވަނާގައި މިހާރު އޮތީ ހޮނިހިރު ދުވަހުގެރޭ 2-1 ން ސަސުއޯލޯ ބަލިކުރި އެޓްލާންޓާއެވެ.