މާލޭގެ އެއްގަމު ތޮއްޓާއި، ފެން ހިންދާ ނިޒާމު އަޕްގްރޭޑުކުރަން ދިރާސާއެއް
މިއީ ޖައިކާގެ ހިލޭ އެހީގެ ދަށުން ކުރިއަށްގެންދާ ދިރާސާއެއް
ޖައިކާއާއި ޕްލޭނިން މިނިސްޓްރީއާ ދެމެދު އެއްބަސްވުމުގައި ސޮއިކުރުން
މިނިސްޓްރީ އޮފް ނޭޝަނަލް ޕްލޭނިން ހައުސިން އެންޑް އިންފްރާސްޓްރަކްޗަރާއި، ޖަޕާން އިންޓަނޭޝަނަލް ކޯޕަރޭޝަން އޭޖެންސީ (ޖައިކާ) އާ ދެމެދު ދިރާސާތަކެއް ކުރަން އެއްބަސްވުމެއްގައި ސޮއިކޮށްފިއެވެ.
މި އެއްބަސްވުމުގައި ޕްލޭނިން މިނިސްޓްރީން ސޮއިކުރެއްވީ ޑިރެކްޓަރ ޖެނަރަލް އަހުމަދު ޠަލްހަތެވެ. އަދި ޖައިކާގެ ފަރާތުން ސޮއިކުރެއްވީ ޕްރިޕަރޭޓަރީ ސާވޭ ޓީމުގެ ލީޑަރު ހިޑެއަކީ މަޓްސުމޯޓޯއެވެ.
ޕްލޭނިން މިނިސްޓްރީން ބުނީ މި އެއްބަސްވުމުގެ ދަށުން މާލޭ އެއްގަމު ތޮށި އަޕްގްރޭޑް ކުރުމާއި، މާލޭގެ ފެން ހިންދާ ނިޒާމު އަޕްގްރޭޑް ކުރުމާ ގުޅޭ ސަރވޭތަކެއް ކުރެވިގެންދާނެ ކަމަށެވެ. އަދި މިއީ ޖައިކާގެ ހިލޭ އެހީގެ ދަށުން ކުރިއަށްގެންދާ ދިރާސާއެއް ކަމަށް މިނިސްޓްރީން ބުނެއެވެ.
މި ދިރާސާ ކުރިއަށްދާނެ ގޮތުގެ އިތުރު މައުލޫމާތު މިނިސްޓްރީން ހިއްސާއެއް ނުކުރެއެވެ.
ވާރޭވެހުމުގެ ސަބަބުން މާލޭގެ މަގުތަކުގައި ފެން ބޮޑުވާ މައްސަލަ އިންތިހާއަށް ބޮޑުވެފައިވާއިރު މިއީ މިކަމުގެ ސަބަބުން އާންމުންނަށް ވެސް ގިނަ ގޮންޖެހުންތަކެއް ކުރިމަތިވާ ކަމެކެވެ. ޒަމާންތަކެއް ވަންދެން މިކަން މިހެން ވަމުންދިޔަނަމަވެސް އަދިވެސް މިކަމަށް އެދެވޭ ހައްލެއް ނުލިބެއެވެ.
