ނޭޕާލުގައި ފެންބޮޑުވުމުގެ ހާދިސާތަކުގައި 33 މީހުން މަރުވެއްޖެ
ނޭޕާލުގައި ފެން ބޮޑުވުމުގެ ސަބަބުން މިއަހަރު މިހާތަނަށް 110 މީހުން މަރުވެފައިވޭ
ނޭޕާލުގައި ފެންބޮޑުވި ހިސާބުތަކުން މީހުން ދުރަށް ގެންދަނީ
ނޭޕާލުގެ ހުޅަނގު ފަޅީގެ ހިސާބުތަކަށް ފާއިތުވި ހަފްތާއެއްހާ ދުވަހުގެ ތެރޭ ކުރި ބޯ ވިއްސާރައިގައި ފެންބޮޑުވެ، ބިންގަނޑު ކަނޑައިގެން ދިއުމުގެ އެކި ހާދިސާތަކުގައި މަދުވެގެން 33 މީހުން މަރުވެފައިވާ ކަމަށް ޚަބަރު ލިބިއްޖެއެވެ.
މޫސުން އެންމެ ބޮޑަށް ގޯސްވި ހުޅަނގު އުތުރުގެ ކަރްނާލީ ޕްރޮވިންސުން އެތައްހާސް ރައްޔިތުން ރައްކާތެރި ހިސާބުތަކަށް ގެންދެވުނު ކަމަށް ވެސް އޮފިޝަލުން މައުލޫމާތުދީފައިވެއެވެ.
ފެންބޮޑުވުމާއި ކިސަޑު ފޭބުމުގެ ހާދިސާތަކުގައި އެތައް ސަތޭކަ ގެޔަކަށް ގެއްލުންވެފައިވާ އިރު، 22 މީހުން ގެއްލި އެތައްބަޔަކަށް އަނިޔާވެފައިވެއެވެ. އަދި މެދުނުކެނޑި ވާރޭ ވެހެމުން ދިއުމުގެ ސަބަބުން މީހުން ސަލާމަތްކުރުމުގެ މަސައްކަތުގައި ހަރަކާތްތެރިވާ މީހުންނަށް ފަރުބަދަ މަތީގެ ހިސާބުތަކަށް ފޯރުމަށް ދަތިވެފައިވާ ކަމަށް ޚަބަރުލިބެއެވެ.
މީހުން ގެއްލުނު ކަމުގެ ރިޕޯޓުތައް ގިނައިން ލިބިފައިވަނީ ބިންތިރި ކާލިކޮޓް ޑިސްޓްރިކްޓުންނެވެ. ފާއިތުވި ހަފްތާއެއްހާ ދުވަހު މިހިސާބުން ވެސް މީހުން ދުރު ހިސާބުތަކަށް ދަނީ ގެންދެވެމުންނެވެ.
މި ހިސާބުތަކަށް ސަރުކާރުން ހެލިކޮޕްޓަރުގައި އެހީގެ ތަކެތި ފޯރުކޮށްދެމުންދާކަމަށް ޚަބަރު ލިބެއެވެ. އަދި ޔުނިސެފުން ވެސް ދަނީ ފެނުގެ އަސަރު އެންމެ ބޮޑަށް ކުރި ހިސާބުތަކަށް ކާބޯތަކެއްޗާއި ބޭސް ބަހަމުންނެވެ.
އާންމުގޮތެއްގައި ޖޫން މަހުން ފެށިގެން އޮކްޓޯބަރު މަހަށް ނޭޕާލަށް މޫސުމީ ވިއްސާރަ ކުރެއެވެ. ވިއްސާރައާ ގުޅިފައިވާ އެކި ހާދިސާތަކުގައި ނޭޕާލުގައި މިއަހަރު މިހާތަނަށް 110 މީހުން މަރުވެފައިވާ ކަމަށް އެޤައުމުގެ ނެޝަނަލް އިމަރޖެންސީ އޮޕަރޭޝަން ސެންޓަރުން ބުނެފައިވެއެވެ.
