މެލޭޝިއާގެ ކުރީގެ ބޮޑުވަޒީރު، އެ ގައުމުގެ އާއްމު އިންތިޚާބުގައި ވާދަކުރައްވަނީ

މެލޭޝިއާގެ ކުރީގެ ބޮޑުވަޒީރު، މަހާތީރު މުހައްމަދު އެ ގައުމުގެ އާއްމު އިންތިޚާބުގައި ވާދަކުރައްވާނެކަން އިއުލާންކުރައްވައިފިއެވެ.

ބުދަ ދުވަހު ބޭއްވި ނޫސްވެރިންގެ ބައްދަލުވުމެއްގައި މަހާތީރު ވިދާޅުވީ، ގޮނޑި އަލުން ކާމިޔާބުކުރައްވާނެކަމަށެވެ. ނަމަވެސް އެމަނިކުފާނުގެ ޕާޓީން އިންތިޚާބު ކާމިޔާބުކޮށްފިނަމަ ބޮޑުވަޒީރުކަމަށް ވަޑައިގަންނަވާނެކަމަށް ސީދާ ވިދާޅެއްނުވެއެވެ. އެމަނިކުފާނު ވިދާޅުވީ، ބޮޑުވަޒީރުކަމަށް ވަޑައިގަންނަވާނެ ބޭފުޅެއް އަދި ކަނޑަނާޅުއްވާކަމަށެވެ.

އަންނަ މަހު ބާއްވާ މެލޭޝިއާގެ އާއްމު އިންތިޚާބުގައި އޭނާ ވާދަކުރައްވައި ގޮނޑި ކާމިޔާބު ކުރެއްވުމަށްފަހު، ބޮޑުވަޒީރުކަމަށް ވަޑައިގެންފިނަމަ އެއީ އެމަނިކުފާނު ބޮޑުވަޒީރުކަމަށް ވަޑައިގަންނަވާ ތިންވަނަ ފަަހަރަށް ވާނެއެވެ.

މެލޭޝިއާގައި އާއްމު އިންތިޚާބު ބާއްވަން ނިންމާފައިވަނީ އެ ގައުމުގެ މިހާރުގެ ބޮޑުވަޒީރު އިސްމާއީލް ސަބްރީ ޔައުގޫބް، އެ ގައުމުގެ މަޖިލިސް އުވާލެއްވުމުންނެވެ. މިދިޔަ ހޯމަ ދުވަހު މަޖިލިސް އުވާލެއްވީ އެމަނިކުފާނުގެ ޕާޓީ، ޔުނައިޓެޑް މެލޭސް ނޭޝަނަލް އޯގަނައިޒޭޝަންގެ ޕްރެޝަރާހެދިއެވެ.