ޖީއެސްޓީ ބޮޑުކުރަން ހުށަހެޅި އިސްލާހުގެ ބިލް ދިރާސާކުރުމަށް ކޮމިޓީއަށް
މިބިލް ދިރާސާކުރުމަށް ވަނީ މުޅި މަޖިލީހުގެ ކޮމިޓީއަށް ފޮނުވާފައި
ރައްޔިތުންގެ މަޖިލީހުގެ ޖަލްސާގެ ތެރެއިން
ދައުލަތުގެ މާލީ ހާލަތު ރަނގަޅުކުރުމުގެ ގޮތުން, ކުރިއަށް އޮތް 2023 ވަނަ އަހަރުން ފެށިގެން ޖީއެސްޓީއާއި ޓީޖީއެސްޓީ ބޮޑުކުރުމަށް މުދަލާއި ޚިދުމަތުގެ އަގުން ޓެކްސް ނެގުމުގެ ގާނޫނަށް ހުށަހެޅި އިސްލާހުގެ ބިލް މަޖިލީހަށް ބަލައިގަނެ އިތުރަށް ދިރާސާކުރުމަށް ކޮމިޓީއަށް ފޮނުވައިފިއެވެ.
އަންގާރަ ދުވަހުގެ ޖަލްސާގައި އިހަވަންދޫ ދާއިރާގެ މެމްބަރު މުހައްމަދު ޝިފާއު ހުށަހެޅުއްވި އިސްލާހުގެ ބިލް ބަލައިގަތުމަށް ނެގުނު ވޯޓުގައި ބައިވެރިވެވަޑައިގެންނެވި 32 މެމްބަރުން ވަނީ، ބިލް މަޖިލީހަށް ބަލައިގަތުމަށް ފެންނަކަމަށް ވޯޓު ދެއްވާފައެވެ. 8 މެމްބަރުން ވަނީ ބިލް މަޖިލީހަށް ބަލައިގަންނަން ނުފެންނަކަމަށް ވޯޓު ދެއްވާފައެވެ. މިބިލް ދިރާސާކުރުމަށް ވަނީ މުޅި މަޖިލީހުގެ ކޮމިޓީއަށް ފޮނުވާފައެވެ.
އިސްލާހުގައި ޓީޖީއެސްޓީ %12އިން %16އަށް، އަދި ޖީއެސްޓީ %6އިން %8އަށް ބޮޑުކުރުމަށް ވަނީ ހުށަހަޅާފައެވެ.
މީގެ ކުރިން ފިނޭންސް މިނިސްޓްރީން ވަނީ، ދައުލަތުގެ މާލީ ހާލަތު ރަނގަޅުކުރުމަށް އިތުރު ފިޔަވަޅުތަކެއް ނާޅައިފިނަމަ މުސްތަގުބަލުގައި ދިމާވާ ދަތިތައް ބޮޑުވާނެކަން ފާހަގަކޮށްފައެވެ.މޯލްޑިވްސް ޕަބްލިކް އެކްސްޕެންޑިޗަރ ރިވިއު (ޕީއީއާރް)ރިޕޯޓާ ގުޅިގެން ވޯލްޑް ބޭންކުން ނެރުނު ނޫސްބަޔާނެއްގައި ވަނީ، މުދަލާއި ޚިދުމަތުގެ އަގުން ނަގާ ޓެކްސް (ޖީއެސްޓީ)، އަދި ފަތުރުވެރިކަމުގެ މުދަލާއި ޚިދުމަތުގެ އަގުން ނަގާ ޓެކްސް (ޓީޖީއެސްޓީ) ބޮޑުކޮށްގެން އާމްދަނީ އިތުރުކުރަން މަސައްކަތްކުރުމަށް ރާއްޖެއަށް ލަފާދީފައެވެ.
ބިލްގެ ބަހުސް މަރުހަލާގައި، ސަރުކާރު ހިންގާ މައި ޕާޓީ އެމްޑީޕީގެ ބައެއް މެމްބަރުން ވަނީ ބިލާ ދެކޮޅަށް ވާހަކަދައްކަވާފައެވެ.
