ނޭޝަނަލް އެޕްރެންޓިސްޝިޕް ޕްރޮގްރާމަކީ އިންޑަސްޓްރީތަކުން ބޭނުންވާ ގޮތަށް ޑިޒައިންކޮށްގެން ހިންގޭ ޕްރޮގްރާމެއް: ނިޝާމް
ޒުވާނުން ބިނާ ކުރުމަށް ސަރުކާރުން ގިނަ މަސައްކަތްތަކެއް ކުރޭ
ސްކިލްސް ޑެވެލޮޕްމަންޓް ކޮންސަލްޓެންޓް އަހުމަދު ނިޝާމް
ޒުވާނުން ވާޒީފާގެ މާހައުލަށް ތައްޔާރު ކުރުމަށް ސަރުކާރުން ފަށާފައިވާ ނޭޝަނަލް އެޕްރެންޓިސްޝިޕް ޕްރޮގްރާމަކީ އިންޑަސްޓްރީތަކުން ބޭނުންވާ ގޮތަށް ޑިޒައިންކޮށްގެން ހިންގޭ ކާމިޔާބު ޕްރޮގްރާމެއް ކަމަށް ޔޫތު މިނިސްޓްރީގެ ސްކިލްސް ޑިވެލޮޕްމަންޓް ކޮންސަލްޓެންޓް އަހުމަދު ނިޝާމް ވިދާޅުވެއްޖެއެވެ.
"ރާއްޖެ ޓީވީ" ގެ ފަލަސުރުޚީ ޕްރޮގްރާމުގައި ވާހަކަދައްކަވަމުން ނިޝާމް ވިދާޅުވީ ޒުވާނުން ބިނާ ކުރުމަށް ސަރުކާރުން ގިނަ މަސައްކަތްތަކެއް ކުރަމުން އަންނަ ކަމަށެވެ. އެގޮތުން، ނޭޝަނަލް އެޕްރެންޓިސްޝިޕް ޕްރޮގްރާމަކީ މީގެ ތެރޭގައި ހިމެނޭ މުހިންމު ޕްރޮގްރާމެއް ކަމަށާއި މިހާތަނަށް އެ ޕްރޮގްރާމުގައި ބައިވެރިވި ފަރާތްތަކުގެ އަދަދު 1100 އަށްވުރެ އިތުރުކަން އޭނާ ފާހަގަކުރެއްވިއެވެ.
ރާއްޖޭގެ ވަޒީފާގެ މާހައުލުގައި ތަޖުރިބާ ހުރި ފަރާތްތައް ނުލިބުމާއި ޒުވާނުން ކިޔަވައިގެން ނުކުންނަ ދާއިރާތަކުން ވަޒީފާ ނުލިބުން ފަދަ މައްސަލަތައް ހުރިކަން ފާހަގަކުރައްވައި ނިޝާމް ވިދާޅުވީ އެޕްރެންޓިސްޝިޕް ޕްރޮގްރާމުގެ ސަބަބުން އެކަމަށް ހައްލެއް ލިބިގެންދާ ކަމަށެވެ. އެގޮތުން، މި ޕްރޮގްރާމް ހިންގަނީ ރާއްޖޭގެ އިގްތިސާދުގައި މުހިންމު ހުރިހާ ދާއިރާތައް ހިމަނައިގެން ކަމަށާއި މިހާތަނަށް ޕްރޮގްރާމް ފުރިހަމަ ކުރި ގިނަ ބައިވެރިންނަށް ވަޒީފާ ލިބިފައިވާކަމަށް އޭނާ ވިދާޅުވިއެވެ.
މި ޕްރޮގްރާމް ކުރިއަށްގެންދާއިރު ތަމްރީނުތައް ދިނުމުގައި މޯލްޑިވްސް ނޭޝަނަލް ސްކިލްސް ޑެވެލޮޕްމަންޓް އޮތޯރިޓީގެ ސްޓެންޑަޑްތަކަށް ވަރަށް ބޮޑަށް ބަލާކަމަށާއި އޭގެ ސަބަބުން މި ޕްރޮގްރާމުގެ ދަށުން ތަމްރީނުވާ ފަރާތްތަކުގެ ފެންވަރު ރަނގަޅުވެގެންދާނެ ކަމަށް ވެސް ނިޝާމް ވިދާޅުވިއެވެ.
ނޭޝަނަލް އެޕްރެންޓިސްޝިޕް ޕްރޮގްރާމަކީ މަސައްކަތުގެ މާހައުލުގައި ތިބެގެން އެ މަސައްކަތްތަކުގެ ތަޖުރިބާކާރުންގެ ބެލުމުގެ ދަށުން މަސައްކަތްތައް ދަސްކޮށް، ޤައުމީ ފެންވަރުގައި ތަމްރީނާއި ތަޖުރިބާ ހޯދުމުގެ ފުރުސަތު ފަހިކޮށްދިނުމަށް ހިންގާ ޚާއްސަ ޕްރޮގްރާމެކެވެ. މި ޕްރޮގްރާމުގެ ދަށުން 3000 ޒުވާނުން ތަމްރީނު ކުރުމަށް ސަރުކާރުން ވަނީ ނިންމާފައެވެ. މިކަން ހާސިލުކުރުމަށް ސަރުކާރު ހިއްސާވާ ކުންފުނިތަކާއި އެ ނޫން ވެސް ފަތުރުވެރިކަމުގެ ދާއިރާގެ ބައެއް ކުންފުނިތަކާއެކު އަންނަނީ މަސައްކަތް ކުރަމުންނެވެ.
