މުސްލިމް ވަރލްޑް ލީގުގެ މަސައްކަތަށް ޕާކިސްތާންގެ ބޮޑުވަޒީރު ތައުރީފްކުރައްވައިފި
10 އޮކްޓޯބަރު 2022 | ހޯމަ 14:01މިފަދަ ހިތާމައިގެ ދަނޑިވަޅެއްގައި ދަތުރުފުޅެއް ކުރެއްވީތީ ޝުކުރު އަދާކުރެއްވި
މުސްލިމް ވަރލްޑް ލީގްގެ ސެކްރެޓަރީ ޖެނެރަލް، ޕާކިސްތާނުގެ ބޮޑުވަޒީރާ ބައްދަލުކުރައްވަނީ
އިސްލާމް ދީނުގެ ދީނީ އެއްބައިވަންތަކަމާއި ސަގާފަތް، އަދި ހަމައެއާއެކުއެކީ ސުލްހަ މަސަލަސްކަމާއި އަޚްވަންތަ ލޯބި ދެމެހެއްޓުމަށް، މައްކާގައި ހުންނަ މުސްލިމް ވަރލްޑް ލީގް ޖަމާއަތުން ކުރަމުންދާ މަސައްކަތަށް ޕާކިސްތާންގެ ބޮޑުވަޒީރު ޝަހްބާޒް ޝަރީފް ތައުރީފްކުރައްވައިފިއެވެ. ޝަހްބާޒް ޝަރީފް މިމޭރުމުން ވާހަކަފުޅުދައްކަވާފައިވަނީ މުސްލިމް ވަރލްޑްލީގްގެ ސެކްރެޓަރީ ޖެނެރަލް މުހައްމަދު އަލްއީސާ ޕާކިސްތާނަށް ކުރައްވާ ދަތުރުފުޅެއްގައި ހޮނިހިރު ދުވަހު އިސްލާމް އާބާދަށް ވަޑައިގެންނެވުމުން އޭނާއާ ބައްދަލުކުރައްވައި ދެއްކެވި ވާހަކަފުޅުގައެވެ. މުހައްމަދު އަލްއީސާއަކީ އެސޯސިއޭޝަން އޮފް މުސްލިމް ސްކޮލަަރސްގެ ޗެއާމަންވެސްމެއެވެ.
މުހައްމަދު އަލްއީސާ ޕާކިސްތާނަށް ދަތުރުފުޅެއް މި ކުރައްވަނީ ދާދިފަހުން އެގައުމަށް ކުރިމަތިވި ފެންބޮޑުވުމުގެ ހާދިސާއާ ގުޅިގެން، ހާލުގައިޖެހުނު މީހުންނަށް އެހީތެރިވުމުގެ ޚާއްސަ ކެމްޕެއިނެއް ފައްޓަވައިދެއްވުމަށެވެ. މުހައްމަދު އަލްއީސާގެ އަރިހުގައި މުސްލިމް ވަރލްޑް ލީގްގެ އިސް ބައެއް ބޭފުޅުން މިދަތުރުފުޅުގައި ބައިވެރިވެވަޑައިގަންނަވައެވެ.
މުސްލިމް ވަރލްޑް ލީގްގެ ވަފްދާއެކު ބޭއްވެވި ބައްދަލުކުރެއްވުމުގައި ވާހަކަފުޅުދައްކަވަމުން ޝަހްބާޒް ޝަރީފް ވަނީ، ޕާކިސްތާނަށް ކުރިމަތިވި ހިތާމައިގެ ދަނޑިވަޅުގައި ޕާކިސްތާނަށް ދަތުރު ފުޅެއް ކުރެއްވީތީ ޝުކުރު އަދާކުރައްވާފައެވެ. އަދި އިސްލާމީ އުއްމަތް އެކަތިގަނޑެއްގެގޮތުގައި ދެމެހެއްޓުމަށް މުސްލިމް ވަރލްޑް ލީގުން ކުރަމުންދާ މަސައްކަތް، ފަޚުރުވެރިކަމާއެކު ބައްލަވާކަމަށް ވިދާޅުވެފައިވެއެވެ.
ޑޮކްޓަރ އަލްއީސާގެ ވާހަކަފުޅުގައި ވިދާޅުވީ، އެބޭފުޅުން ވަޑައިގެންނެވީ އިސްލާމީ ޖަމާއަތެއްގެ ގޮތުން އަދާކުރަންޖެހޭ ޑިއުޓީއެއް އަދާކުރެއްވުމަށް ކަމަށެވެ.
ޝެއިޚް އަލްއީސާ ވަނީ، ޕާކިސްތާނުގެ މިނިސްޓަރ އޮފް ރިލިޖަސް އެފެއަރޒް އެންޑް އިންޓަރ ފެއިތު ހާމަނީ މުފްތީ އަބްދުއްޝަކޫރް ޚާންއާވެސް ބައްދަލުކުރައްވައި، އިސްލާމިކް އެފެއަރޒާގުޅޭ އެކިއެކި ކަންކަމާ ބެހޭގޮތުން މަޝްވަރާކުރައްވާފައެވެ.
މުސްލިމް ވަރލްޑް ލީގްގެ ވަފްދުން، ފެންބޮޑުވި އަވަށްތަކާއި ސިޓީތައް ބައްލަވާލެއްވުމަށް އެތަންތަނަށް ދަތުރުކުރެއްވުމަށް ހަމަ ޖެހިފައިވެއެވެ. އަދި ޑރ. އީސާ އެތައް މިސްކިތްތަކެއްގައި ދަރުސް ދެއްވުމަށްވެސް ހަމަޖެހިފައިވާކަމަށް ޚަބަރު ލިބެއެވެ.
ޕާކިސްތާނުގައި ހާލުގައި ޖެހިފައިވާ މީހުންނަށް އެހީވުމަށް ސައޫދީ އަރަބިއްޔާއިން މިހާރުވެސް ވަނީ އެތައް ކާގޯ މަތިންދާ ބޯޓެއްގެ އެހީގެ ސާމާނު ފޮނުވާފައެވެ. މީގެ ތެރޭގައި ޓެންޓާއި ރަޖާއާއި ކަދުރުފަދަ ތަކެތި ފޮނުވާފައިވެއެވެ.
