ފަހު މެޗުގައި މިޔަންމާ އަތުން ވެސް ރާއްޖެ އަށް ބޮޑު ބައްޔެއް

ސައުދީ އަރަބިއްޔާގައި ކުރިއަށް ދިޔަ 17 އަހަރުން ދަށުގެ އޭއެފްސީ އޭޝިއަން ކަޕް ކޮލިފައިންގެ ފަހު މެޗުގައި މިޔަންމާ އަތުން ވެސް ރާއްޖެ ބަލިވެއްޖެއެވެ.

ފަހު މެޗުގައި އާދިއްތަ ދުވަހުގެ ރޭ މިޔަންމާ އިން ރާއްޖެ ބަލިކުރީ 7-0 އިންނެވެ. ފުރަތަމަ މެޗުގައި ކުވެއިތު އަތުން 6-0 އިން ބަލިވީއިރު، ދެ ވަނަ މެޗުގައި އިންޑިއާ އަތުން ބަލިވީ 5-0 އިންނެވެ. ތިން ވަނަ މެޗުގައި ސައުދީ އަތުން ބަލިވީ 9-0 އިންނެވެ.

މެޗުގެ ފުރަތަމަ ހާފުގައި ވެސް މިޔަންމާ އިން ވަނީ ތިން ލަނޑު ޖަހާފައެވެ. އެ ޓީމުގެ އަނެއް ހަތަރު ލަނޑު ފެނުނީ ދެ ވަނަ ހާފުގައެވެ. މިޔަންމާގެ ލަޏޑުތައް ޖެހީ، ސޮއު މިޔޯ ޒައޮ، ސޮނޭ އޮން, މަޔެޓް ފޯން ކަންޓު، ސޮން އައުން އަދި އައުންފް ޒޮއު މިޔޯއެވެ. މީގެ ތެރެއިން ސޮއު މިޔޯ ޒައޮ އަދި ސޮނޭ އޮން ވަނީ ދެ ލަނޑު ޖަހާފައެވެ.

ރާއްޖެއިން ކޮލިފައިންގެ މެޗުތައް ނިންމާލަން ޖެހުނީ ބައި ކޮޅަށް 27 ލަނޑު ވަދެގެންނެވެ. ރާއްޖެ އަށް ކޮލިފައިންގައި އެންމެ ލަނޑެއް ވެސް ކާމިޔާބެއް ނުކުރެވެއެވެ.