އިލްމާއި ހޭލުންތެރިކަންވެސް ވަރަށް ކުޑަ
އެޗްޕީއޭގެ ޑިރެކްޓަރ އާމިނަތު ޝަހުޒާ
ނަފްސާނީ ބައްޔާބެހޭ މައުލޫމާތު އާންމުންނަށް އެނގޭ މިންވަރު ކުޑަކަމަށާއި، އެކަމުގެ ސަބަބުން މުޖްތަމުގައި މިކަމަށް ހޭލުންތެރިކަންވެސް ކުޑަކަމަށް, ހެލްތު ޕްރޮޓެކްޝަން އެޖެންސީގެ ޑިރެކްޓަރ އާމިނަތު ޝަހުޒާ ވިދާޅުވެއްޖެއެވެ.
ނަފްސާނީ ދުޅަހެޔޮކަމާ ގުޅޭގޮތުން ރާއްޖެޓީވީގެ ފަލަސުރުޚީ ޕްރޮގްރާމްގައި ވާހަކަދައްކަވަމުން ޝަހުޒާ ވިދާޅުވީ، ހެލްތު ޕްރޮޓެކްޝަން އެޖެންސީން މެންޓަލް ހެލްތުގެ ކެމްޕެއިނެއް ކުރިއަށް ގެންދިއުމަށްޓަކައި ވަރަށް ފަހުން ރެޕިޑް އެސެސްމަންޓެއް ހެދިކަމަށެވެ.
އަދި މި ރެޕިޑް އެސެސްމަންޓުން ފާހަގަކުރެވުނީ، މުޖްތަމައުގެ ތެރޭގައި ނަފްސާނީ ސިއްހަތާ ގުޅޭގޮތުން އެނގޭ މިންވަރު ކުޑަކަމަށެވެ. އަދި އެކަމާބެހޭ އިލްމާއި ހޭލުންތެރިކަންވެސް ވަރަށް ކުޑަކަމަށާއި، އެއާއެކު ތަފާތުކުރުންތައް އަންނަކަންވެސް ފާހަގަކުރެވޭކަމަށެވެ.
ޝަހުޒާ ވިދާޅުވީ، މުޖްތަމައުގެ ތެރޭގައި ނަފްސާނީ ބަލި މީހުންނަށް ނޭނގޭތީ، އެއީ އުޅޭ ބައްޔެއްކަން މީހުން ގަބޫލުނުކުރާ ކަމަށެވެ. އަދި އެއީ ހުންނަ އެއްޗެއް ނޫންކަން، ނުވަތަ ވާ ކަމެއް ނޫންކަން ފަދަ ބަސްތައް މީހުންގެ ފަރާތުން އަޑުއިވޭ ކަމަށެވެ. ނަމަވެސް ނަފްސާނީ ބައްޔާ ޚިލާފަށް، ޖިސްމާނީ ބައްޔެއްނަމަ، އެއީ ފެންނަން ހުންނަ ބަލިތަކަކަށް ވުމުން އެ ބަލިތައް ގަބޫލުކުރާކަމަށެވެ.
ޝަހުޒާ ވިދާޅުވީ އެޗްޕީއޭއިން މަސައްކަތް ކުރަމުން ދަނީ ނަފްސާނީ ދުޅަހެޔޮކަމާގުޅޭ ހޭލުންތެރިކުރުމުގެ ބައި ބޮޑަށް އިތުރުކުރެވޭތޯއެވެ. އަދި މީގެ ކުރިން ފޯކަސް ހުންނަނީ ބަލިތަކާ ބެހޭގޮތުން ކަމަށާއި، ނަފްސާނީ ބަލިތަކުގެ ހޭލުންތެރިކަން އިތުރުކުރުމުގެ މަސައްކަތް ކުރެވޭ މިންވަރު ކުޑަކަމަށާއި، އެހެންނަމަވެސް މިހާރު އެ ބައި ބޮޑުކޮށް މި މަސައްކަތް ފުޅާކުރުމުގެ މަސައްކަތް ކުރަމުންދާކަމަށް ޝަހުޒާ ވިދާޅުވިއެވެ.
