އަންނަ މަހު ފަށާ ފީފާ ވޯލްޑް ކަޕް ފުޓްބޯޅަ މުބާރާތުގެ މެޗުތައް ދުރަށް ދެއްކުމަށް ރާއްޖެޓީވީން ގެނެސްދޭ ކަވަރޭޖުގައި މެޗުތައް އެނަލައިޒް ކުރުމަށް އެނަލިސްޓުންނާއެކު ސޮއިކުރަން ފަށައިފިއެވެ.

މި ގޮތުން މި މުބާރާތް ރާއްޖެ ޓީވީ މެދުވެރިކޮށް ގެނެސްދިނުމަށް އެއްބަސްވެފައިވާ އެނަލިސްޓުންގެ ތެރެއިން މިއަދު ސޮއިކޮށްފައިވަނީ ހަތަރު އެނަލިސްޓަކާއެކުގައެވެ.

މި ހަތަރު އެނަލިސްޓުންނަކީ ރާއްޖޭގެ ފުޓްބޯޅައިގެ އެންމެ ކާމިޔާބު ކޯޗު މައުރޫފް އަހުމަދު (މާއްޓޭ) އާއި ސާފް ޗެމްޕިއަންޝިޕް 2008ގެ ކާމިޔާބު ކުރި ގައުމީ ޓީމުގެ އެސިސްޓެންޓް ކޯޗު މުހައްމަދު ޝިޔާޒް (މޯހަން) އާއި ގައުމީ ފުޓްބޯޅަ ޓީމުގެ ކުރީގެ ކެޕްޓަން ޝާހު އިސްމާއީލް (ސާޔާ) އާއި ރާއްޖޭގެ ޔޫތު ފުޓްބޯޅަ މުބާރާތްތަކުގެ އެންމެ ކާމިޔާބު ކޯޗު އަހުމްދު ޝާކިރުއެވެ.

މި އެނެލިސްޓުން، ރާއްޖެޓީވީއާއެކު އެއްބަސްވުމުގައި ސޮއިކޮށްފައިވަނީ އާދީއްތަ ދުވަހުގެ ހަވީރު ބޭއްވި ޚާއްސަ ރަސްމިއްޔާތެއްގައެވެ. ރާއްޖެޓީވީގެ ފަރާތުން އެއްބަސްވުމުގައި ސޮއިކުރެއްވީ ޑެޕިއުޓީ ޗީފް އޮޕަރޭޓިންގ އޮފިސަރ ނާޒްމީ ސައީދެވެ.

ގަތަރުގައި އަންނަ މަހުގެ 20ން ޑިސެމްބަރު 18ށް ކުރިއަށްދާ ވޯލްޑްކަޕް ގެނެސްދިނުމަށް ރާއްޖެ ޓީވީއާއެކު އެއްބަސްވެފައިވައި ތިބި އެހެން އެނަލިސްޓުންނާއެކު ވަރަށް އަވަހަށް ސޮއިކުރަން ވަނީ ހަމަޖެހިފައެވެ. މި ފަހަރުގެ ވޯލްޑްކަޕުގެ ހުރިހާ މެޗެއް ބެލުންތެރިންނާއި ހަމައަށް ވަގުތުން ގެނެސްދިނުމަށް ރާއްޖެ ޓީވީން މިހާރު ވަނީ މީޑިއާނެޓާއެކު އެއްބަސްވުމުގައި ސޮއިކޮށްފައެވެ. މިއީ ސައްތައިން ސައްތަ ދިވެހި ޗެނަލްތަކަކުން މި ފޯރިގަދަ މުބާރާތް ރާއްޖެ ސަރަޙައްދަށް ދެއްކުމުގެ ފުރުސަތު ލިބުނު ފުރަތަމަ ފަހަރެވެ.

މި މުބާރާތް ވިޔަފާރި އުސޫލުން ސްޕޮންސަރ ކުރައްވަން ބޭނުންފުޅުވާ ފަރާތްތަކަށް މިހާރު ވަނީ އެފުރުސަތު ހުޅުވާލާފައެވެ. ސްޕޮންސަރ އާއި ގުޅޭ އިތުރު މައުލޫމާތު ބޭނުންފުޅުނަމަ 7783158 ށް ގުޅުއްވައިގެން މައުލޫމާތު ސާފު ކުރެވޭނެއެވެ.