ޔުނައިޓެޑް އަރަބް އެމިރޭޓްސް (ޔޫއޭއީ) އިން އެގައުމަށް ދަތުރުކުރާ ފަތުރުވެރިންނަށް 60 ދުވަހުގެ ޓޫރިސްޓު ވިސާ ދޭން ފަށައިފިއެވެ.

ޔޫއޭއީން އެގައުމަށް ދަތުރުކުރާ ފަތުރުވެރިންނަށް 60 ދުވަހުގެ ޓޫރިސްޓު ވިސާ ދޫކުރަން ފަށާފައިވާކަމަށް އެގައުމުގެ ޓްރެވެލް އެޖެންޓުން ވަނީ ކަށަވަރުކޮށްދީފައެވެ.

ޔޫއޭއީގެ ޓްރެވަލް އެޖެންޓުންނާ ހަވާލާދީ މީޑިއާތަކުން ރިޕޯޓުކޮށްފައިވާގޮތުން މިއީ އެޑްވާންސް ވިސާ ސިސްޓަމްގެ ދަށުން ނިންމި ނިންމުމެކެވެ. މި އެޑްވާންސް ވިސާ ސިސްޓަމް އެގައުމުގެ ފެޑެރަލް އޮތޯރިޓީ ފޮރ އައިޑެންޓިޓީ، ސިޓިޒެންޝިޕް، ކަސްޓަމްސް އަދި ޕޯރޓް ސެކިއުރިޓީން އިއުލާނުކޮށްފައި ވަނީ އޮކްޓޫބަރު 3 ވަނަ ދުވަހުއެވެ.

ޔޫއޭއީ އަކީ ފަތުރުވެރިންނަށް 60 ދުވަހުގެ ވިސާ ދޫކުރަން ފެށި ފުރަތަމަ ގައުމުތަކުގެ ތެރޭގައި ހިމެނޭ ގައުމެއް ކަމަށް އެގައުމުގެ ޓްރެވަލް އެޖެންޓުން އަންނަނީ ފާހަގަކުރަމުންނެވެ. މިވިސާއަށް 500 ދިރުހަމް ނަގާކަމަށް ރިޕޯޓުތައް ބުނެއެވެ.

މީގެ އިތުރުން 30 ދުވަހަށް ނަގާ ޓޫރިސްޓް ވިސާއާ މި ވިސާގައި ކުޑަކުދިންނަށް ނަގާ ފީގައި ތަފާތުތަކެއް ހުރި ކަމަށްވެސް ޓްރެވަލް އެޖެންޓުން ފާހަގަކުރެއެވެ.

ޔޫއޭއީން އަލަށް ތައާރަފުކުރި ވިސާގެ ތެރޭގައި ޖޮބް އެކްސްޕްލޮރޭޝަން ވިސާ، ބިޒްނަސް އެންޓްރީ ވިސާ، ފަސް އަހަރުގެ މަލްޓި އެންޓްރީ ޓޫރިސްޓް ވިސާ، ޔޫއޭއީގައި ދިރިއުޅޭ އާއިލާ އަދި ރައްޓެހިންނަށް ޒިޔާރަތްކުރަން ދޫކުރާ ވިސާ އަދި އެގައުމުގައި ވަގުތީ ގޮތުން މަސައްކަތްކުރަން ދޫކުރާ ވިސާ އާއި ތައުލީމާއި ތަމުރީން ފުރިހަމަކުރަން ދޫކުރާ ވިސާ ހިމެނެއެވެ.