ސަރުކާރުގެ އިދާރާތަކުގެ އެއްބާރުލުން ނުލިބިގެން ސިޓީ ކައުންސިލަށް މަސައްކަތް ނުކުރެވުމުގެ ޝަކުވާ
ސަރުކާރުން ދަނީ އެއްބާރުލުން ދެމުން ކަމަށް ސަރުކާރުން ބުނޭ
މާލެ ސިޓީގެ މޭޔަރު ޑރ. މުހައްމަދު މުއިއްޒު
ސަރުކާރުގެ އިދާރާތަކުގެ އެއްބާރުލުން ނުލިބިގެން ސިޓީ ކައުންސިލުގެ ބައެއް މަސައްކަތްތަކަށް ހުރަސް އެޅޭ ކަމަށް މާލެ ސިޓީގެ މޭޔަރު ޑރ.މުހައްމަދު މުއިއްޒު ވިދާޅުވެއްޖެއެވެ.
ސީޓި ކައުންސިލުގެ މަސައްކަތްތަކާއި ގުޅޭގޮތުން އާދިއްތަ ދުވަހު ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން ޑރ.މުއިއްޒު ވަނީ ކައުންސިލުގެ މަސައްކަތްތަކަށް ދިމާވާ ބައެއް ގޮންޖެހުންތަަކަށް އަލިއަޅުވާލައްވާފައެވެ. އެގޮތުން ރާއްޖޭގެ އެހެން ކައުންސިލުތަކާއި އެއްފަދައިން މާލެ ސިޓި ކައުންސިލަށް ވެސް ބަޖެޓުގެ ދަތިކަމާއި ކުރިމަތިލާން ޖެހޭ ކަމަށް މޭޔަރު ވިދާޅުވިއެވެ. މީގެ އިތުރުން ބައެއް އިދާރާތަކުން ލިބެން ޖެހޭ އެއްބާރުލުން ނުލިބުމުގެ ސަބަބުން ސިޓީ ކައުންސިލުގެ މަސައްކަތްތައް ލަސްވުމާއި، ބައެއް މަސައްކަތްތައް އެއްކޮށް މަޑު ޖެހުމަކީ ދިމާވާ ބޮޑު ގޮންޖެހުމެއް ކަަމަށް މުއިއްޒު ވިދާޅުވިއެވެ.
މޭޔަރު ވިދާޅުވީ ހައުސިން އާއި ޕާކިންއާ ގުޅުން ހުރި ކަންކަމުގައި ބެނުންވާ އެއްބާރުލުން ސަރުކާރުގެ ފަރާތުން ލިބެމުން ނުދާ ކަމަށެވެ. ބައެއް އިދާރާތަކުން ވަރަށް ރަނގަޅަށް އެއްބާރުލުން ލިބޭ ކަމަށާއި ގުޅިގެން މަސައްކަތް ވެސް ކުރެވޭ ކަމަށް އޭނާ ވިދާޅުވިއެވެ. އެންމެ ބޮޑު ދައްޗަކީ ލޭންޑް ޔޫޒް ޕްލޭންގެ މަސައްކަތް ނުނިމުން ކަމަށާއި، އެކަމުގެ ސަބަބުން ކައުންސިލުން ކުރަން ހުރި ގިނަ ކަންކަން މަޑުޖެހިފައި ހުރި ކަމަށް މޭޔަރު ވިދާޅުވިއެވެ.
މާލެ ސިޓީ ކައުންސިލުގެ މޭޔަރު ޑރ.މުއިއްޒު އެހެން ވިދާޅުވި ނަމަވެސް ސަރުކާރުގެ ފަރާތުން ދޭން ޖެހޭ އެއްބާރުލުން ފުރިހަމައަށް ދެމުންދާ ކަމަށް ރައީސް އޮފީހުގެ ތަރުޖަމާން މިއުވާން މުހައްމަދު ވަނީ ދާދީ ފަހުން ވިދާޅުވެފައެވެ.
