އުނދަގޫ ހަނި މޮޅަކާއެކު ރެއާލް މެޑްރިޑުން ސްޕެނިޝް ލަލީގާ ތާވަލްގެ އެއް ވަނަ އަށް ޖެހިލައިފިއެވެ.

ގެޓާފޭގެ ދަނށުގައި ގެޓާފޭ ބަލިކޮށް, ރެެއާލް އެއް ވަނަ އަށް ޖެހިލީ ކުރިން އެއް ވަނައިގައި އޮތް ބާސެލޯނާއަށްވުރެ އިތުރަށް މެޗެއް ކުޅެގެންނެވެ. ފުޓުބޯޅަ މެޗު ރެއާލްއިން ކާމިޔާބުކުރީ 1-0 ނެވެ. މެޗުގެ ހަމައެކަނި ލަނޑު ތިންވަނަ މިނެޓުގައި ކާމިޔާބުކޮށްދިނީ އެޑާ މިލިޓާއޯއެވެ. އޭނާ ލަނޑު ޖެހީ ލުކަ މޮޑްރިޗް ނަގައިދިން ކޯނަރުގައި ފުންމައިގެން އަރާ ބޮލުން ގޯލްގެ ތެރެއަށް ފޮނުވާލައިގެންނެވެ.

މެޗުން މޮޅުވެ ރެެއާލް މެޑްރިޑް އެއް ވަނައިގައި އޮތީ ތިން ޕޮއިންޓްގެ ފަރަޤަކާއެކުއެވެ. އެކަމަކު އާދިއްތަ ދުވަހުގެރޭ ދަންވަރު ސެލްޓަ ވީގޯ އަތުން މޮޅުވެގެން ބާސެލޯނާއަށް އަލުން އެއް ވަނަ ހޯދޭނެއެވެ. ލީގުގައި އެތްލެޓިކޯ މެޑްރިޑް ވަނީ 2-1 ން ޖިރޯނާ ބަލިކޮށް ތާވަލްގެ ހަތަރު ވަނަ އަށް ޖެހިލާފައެވެ.