އެއްބަސްވުން އައުކުރުން އޮތީ ކްރޫސްގެ އަތް މަތީގައި

ސްޕެއިންގެ ރެއާލް މެޑްރިޑަށް ކުޅެމުން އަންނަ ޓޯނީ ކްރޫސްގެ އެއްބަސްވުން އައުކުރުން އޮތީ އޭނާގެ އަތް މަތީގައި ކަމަށް އެ ޓީމުގެ ކޯޗު ކާލޯ އަންޗެލޮޓީ ބުނެފިއެވެ.

އަންޗެލޮޓީ މިހެން ބުނީ ކްރޫސްގެ ކުރިމަގާ ގުޅޭ ގޮތުން ވާހަކަ ދައްކަމުންނެވެ. ރެއާލަށް ކްރޫސް އެންމެ ފުރަތަމަ ގުޅުނީ 2014 ވަނަ އަހަރުއެވެ. ރެއާލާއެކު ކްރޫސް އެންމެ ފަހުން އައު ކުރި އެއްބަސްވުމުގެ މުއްދަތު ހަމަވާނީ އަންނަ އަހަރުގެ ޖޫން މަހުގެ ނިޔަލަށެވެ.

އަންޗެލޮޓީ ބުނީ ކްރޫސްގެ އެއްބަސްވުން އައު ކުރުމަކީ އޭނާގެ އަތް މަތީގައި އޮތް ކަމެއް ކަމަށާއި، ރެއާލްގައި މަޑު ކުރަން އޭނާ ނިންމައިފިނަމަ، ރެއާލްގެ ކުޅުންތެރިންނާއި އޮފިޝަލުން އުފާވާނެ ކަމަށެވެ. މީގެ އިތުރުން އަންޗެލޮޓީ ބުނީ ކްރޫސް އަކީ އަދިވެސް މިޑްފީލްޑުގައި ކުޅެން ހުނަރުވެރި މޮޅު ކުޅުންތެރިޔެއް ކަމަށެވެ.

ބަޔާ ލެވަކޫސަންގައި ލޯނު އެއްބަސްވުމެއްގެ ދަށުން ހުރުމަށްފަހު، ރެއާލަށް ބަދަލުވެ ކްރޫސް ވަނީ މިހާތަނަށް 375 މެޗު ކުޅެދީފައެވެ. އަދި އޭނާ ވަނީ އެ ޓީމަށް 25 ލަނޑު ޖަހައިދީފައެވެ. މީގެ އިތުރުން ކްރޫސް ވަނީ ރެއާލާއެކު ގިނަ ކާމިޔާބީތަކެއް ވެސް ހޯދާފައެވެ. އޭނާ ވަނީ އެ ޓީމާއެކު ސްޕެނިޝް ލީގު ތިން ފަހަރު، ސްޕެނިޝް ސުޕަ ކަޕް ތިން ފަހަރު، ޔުއެފާ ޗެމްޕިއަންސް ލީގު ހަތަރު ފަހަރު، ޔުއެފާ ސުޕަ ކަޕް ތިން ފަހަރު އަދި ފީފާ ކުލަބް ވޯލްޑް ކަޕް ހަތަރު ފަހަރު ކާމިޔާބުކޮށްފައެވެ.

ކްރޫސް ވަނީ 2010 އިން 2021 ހާ ހަމައަށް ޖަރުމަނުގެ ޤައުމީ ޓީމަށް ވެސް ކުޅެފައެވެ. އެ މުއްދަތުގައި ޤައުމީ ޓީމަށް ކުޅެދިން 106 މެޗުގައި އޭނާ ވަނީ 17 ލަނޑު ޖަހާފައެވެ. ޖަރުމަނާއެކު އޭނާ ވަނީ 2014 ވަނަ އަހަރުފެ ފީފާ ވޯލްޑް ކަޕް ކާމިޔާބުކޮށްފައެވެ.