ކޯފް ސިރަޕްގެ ގޮތުގައި ބޭނުން ކުރެވޭ ހަތަރު ބޭހެއް، ކުޑަކުދިންގެ މަރާ ގުޅުމެއް އޮވެދާނެ: ޑަބްލިއު އެޗްއޯ

ހުޅަގު އެފްރިކާގެ ގައުމެއްކަމަށްވާ ގެންބިޔާ ގައި 66 ކުޑަކުދިން މަރުވި ހާދިސާތަކަކާ ގުޅިގެން ކުޑަކުދިންގެ ކޯފް ސިރަޕްގެ ގޮތުގައި ބޭނުން ކުރެވޭ ހަތަރު ބޭހެއް ބޭނުން ނުކުރުމަށް އަންގާ، ޑަބްލިއުއެޗްއޯ އިން އެލަރޓް ނެރެފިއެވެ.

އެފަރާތުން ބުނެފައިވާ ގޮތުގައި މި ސިރަޕްތައް ބޭނުން ކުރުމުން ކުޑަކުދިންގެ ކިޑްނީ އަށް ގެއްލުންވާ ކަމަށް ބެލިފައިވާ ކަމަށާއި ގެންބިޔާގައި މަރުވި 66 ކުދިން މަރުވެފައިވަނީ މި ބޭސްތައް ބޭނުން ކުރުމުގެ ސަބަބުން ކަމަށް ވުން އެކަށީގެންވާ ކަމުގައެވެ.

މަނާ ކުރެވުނު ހަތަރު ކޯފް ސިރަޕް އުފައްދާފައިވަނީ އިންޑިޔާގެ ކުންފުންޏެއް ކަމަށްވާ މެއިޑެން ފާމަކިއުޓީކަލްސް އިންނެވެ. ޑަބްލިއުއެޗްއޯ އިން ބުނީ އެބޭސްތަކުގެ ރައްކާތެރިކަމުގެ ގެރެންޓީ އެކުންފުންޏަށް ދެވިފައި ނުވާ ކަމުގައެވެ.

މިކަމާ ގުޅިގެން ކުންފުނިން އާންމުކޮށް އެއްޗެއް ބުނެފައެއް ނުވެއެވެ. ނަމަވެސް ބީބީސީގެ ފަރާތުން ގުޅުމުން، އެބޭސްތަކާ ކުދިންގެ މަރާ ހުރި ގުޅުމުގެ ހެކި ހިއްސާކުރުމަށް ޑަބްލިއު އެޗްއޯ ގައި އެދިފައިވާނެ ކަމަށް އިންޑިޔާގެ އޮފިޝަލުން ބުނެފައިވާ ކަމަށް ވެއެވެ.

ޑަބްލިއު އެޗްއޯ އިން މަނާކުރި ހަތަރު ކޯފް ސިރަޕް އަކީ:

ޕްރޯމެތަޒީން އޯރަލް ސޮލިއުޝަން

ކޮފެކްސްމަލިން ބޭބީ ކޯފް ސިރަޕް

މަކޯފް ބޭބީ ކޯފް ސިރަޕް، އަދި

މަ ގްރިޕް އެން ކޯލްޑް ސިރަޕްއެވެ.

މިހަތަރު ބޭހަކީ ގެމްބިޔާގައި ވިއްކާކަން ފާހަގަ ކުރެވިފައިވާ ހަތަރު ބޭހެކެވެ. ނަމަވެސް އެހެން ސަރަހައްދުތަކަށާ ގައުމުތަކަށް ވެސް މިބޭސް ޑިސްޓްރިބިއުޓް ކޮށްފަ ވުމަކީ އެކަށީގެންވާ ކަމެއް ކަމަށް ޑަބްލިއު އެޗް އޯ އިން ބުނެފައި ވެއެވެ. އަދި މިބޭސް ބޭނުން ކުރުމުން ހަށިގަޑަށް ސީރިއަސް ގެއްލުން ތައް ލިބި އަދި މަރުވުމަކީ އެކަށީގެންވާ ކަމެއް ކަމަށް ބުނެފައި ވެއެވެ.

ޑަބްލިއުއެޗްއޯ އިން މިކަމުގެ ތެރެޔަށް ވަދެފައިވަނީ، ގެމްބިޔާގެ ފަސްއަހަރުން ދަށުގެ ތުއްތު ކުދިނަށް ކިޑްނީ އިންޖަރީ ގެ މައްސަލަތައް ކުރިމަތިވާން ފެށިކަން އެގައުމުގެ މެޑިކަލް އޮތޯރިޓީ ތަކުން ފާހަގަ ކޮށް އެކަން ރިޕޯޓް ކުރި ހަމަ އިންނެވެ. މިކަން ކުރިމަތިވާ ކަން ފާހަގަވީ މިދިޔަ ޖުލައިމަހުން ފެށިގެން ކަމަށް ވެއެވެ. ކިޑްނީ އިންޖަރީ ގެ މައްސަލަ ފާހަގަވި ހަމައިން ފެށިގެން ޕެރަސެޓަމޯލް ސިރަޕްވެސް ދިނުން މަނާކުރެވުނު ކަމަށް ވެއެވެ.

ޑަބްލިއުއެޗްއޯ އިން ބުނެފައިވާ ގޮތުގައި ބޭސްތައް ލެބޯޓަރީގަ އެނަލައިސް ކުރުމުން އޭގައި އެކަށީގެން ނުވާ މިންވަރަކަށް "ޓޮކްސިކް" ނުވަތަ ވިހަ މާއްދާ އެއްކަމަށްވާ ޑައިތައިލީން ގްލައިކޮލް އަދި އެތައިލީން ގްލައިކޮލް ހިމެނޭކަން ފާހަގަ ވެފައިވާ ކަމަށެވެ. މި ބާވަތްތަކަކީ ހަށިގަޑަށް އެތެރެވުމުން ބަޑަށް ތަދުވުމާ، ހޮޑުލެވުން، ބޭރަށް ހިންގުން، ކުޑަކަމުނުދެވުން، ބޮލުގަ ރިއްސުން އަދި ސިކުޑިއަށް އަސަރުކުރުމާ އަދި ކިޑްނީ އަށް ގެއްލުން ވުން ފަދަ ކަންކަން ކުރިމަތި ކުރުވާ މާއްދާ ތަކެކެވެ. އަދި މިގެއްލުން ތަކުގެ ސަބަބުން މަރުވުމަކީ ވެސް އެކަށީގެންވާ ކަމެއްކަމަށް ޑަބްލިއުއެޗްއޯ އިން ބުނެފައި ވެއެވެ. ގެމްބިޔާގެ ސިއްހީ އޮފިޝަލުން މިދިޔަމަހުވަނީ އެގައުގެ ކުޑަކުދިންތަކެއް މަރުވެފައިވާކަން ކަށަވަރު ކޮށްދީފައެވެ. ނަމަވެސް ސީދާ އަދަދެއް ހާމަކޮށްފައެއް ނުވެއެވެ.

ޖެނީވާގައި ހުންނަވާ ވާހަކަފުޅު ދައްކަވަމުން ޑަބްލިއުއެޗްއޯގެ ޗީފް ޓެޑްރޮސް ބުދަ ދުވަހު ވިދާޅުވެފައިވަނީ އެކުދިންގެ މަރާއި ގުޅިގެން އާއިލާތަކުން ވަނީ ވަރަށްވެސް ފުން ހިތާމައިގައި ކަމުގައެވެ.