އަނގަމަތީ ދޯނިތަކުގައި ކުރި ދަތުރު އޭސީ ކުރި އަރާމު އުޅަނދަކަށް - ބޮޑުތިލަދުންމަތީ ރައްޔިތުން އުފަލުން ފޮޅިފައި

އާރުޓީއެލްގެ ވާހަކައަކީ މިއަދު އެތަކެއް ރައްޔިތުންނެއް ދައްކަމުން އަންނަ ވާހަކައެވެ. އާރުޓީއެލް އަކީ އެއްގަމާއި ކަނޑުގެ ދިވެހިންގެ ބައިވެރިޔާއެވެ. އެކި ސައިޒުތަކުގެ ބަހުން ފެށިގެން އޭސީ ކުރި ހައިސްޕީޑް ފެރީތަކެވެ. އެތަކެއް ލުއިފަސޭހަތަކެއް ގެނުވާ އެތައް ރައްޔިތުންގެ ހިތުގެ ފިނިކަމެވެ.

މުޅި ރާއްޖެ ދަތުރުފަތުރުގެ ވިއުގައަކުން ގުޅާލުމުން މި ނިޒާމުގެ ހަގީގީ ފޮނިމީރުކަން ދިވެހިންނަށް ލިބިގެންދާނެއެވެ. އެހެނަސް މިއަދު މި ހިދުމަތުގެ ފޮނިމީރުކަން ހޯދަމުން ދަނީ ބޮޑުތިލަދުންމަތީގެ ރައްޔިތުންނެވެ. މީގެ ވިއްސަކަށް އަހަރު ކުރިއަށް ބަލާލާއިރު، އެއިރު ދަތުުކުރަމުން ދިޔައީ ރިޔާ ދޯނީގައެވެ. ރަށަކަށް ދެވިއްޖެއްޔާ ދެން އަނބުރާ ރަށަށް އާދެވެނީ 3 ދުވަހުންނެވެ. އެހާވެސް ދަތުރުކުރަން އެއިރު އުނދަގުލެވެ. އެއިރު އަތޮޅު ވެރިކަންކުރާ ނޮޅިވަރަންފަރަށް ދެވޭނީ އަހަރަކުން އެއްފަހަރު ހައްޖަށްދާ ގޮތަށް ކަމަށް ނައިވާދޫން ވާހަކަ ދެއްކި މީހަކު އޭނާގެ ތަޖުރިބާ ހިއްސާކުރަމުން ބުންޏެވެ. ކުޅުދުއްފުށި ޖެހިފައި އޮންނަ އިރުވެސް އެ ރަށް ދިއުމަކީ ވެސް ނާދިރުކަމެއް ކަމަށެވެ.

އެއިރު ކުޅުދުއްފުއްޓަށް ދަތުރެއް ކުރެވޭނީ 2000 ރުފިޔާއަށެވެ. އެއީ ނައިވާދޫންނެވެ. ކުޅުދުއްފުށިން ނައިވާދޫއަށް އަންނަންޏާ އެވަރު ހަރަދުކުރަންޖެހޭ ކަމަށާއި، ހުޅަނގުގެ ގަދަ މޫސުމުގައި، ރާޅު ބޯ މަތިން އަންނަ އިރު ދަތުރުކުރުމަކީ ނުވާނެކަމެއް ކަމަށެވެ. މީހުން މަރުވިޔަސް ތިބެންޖެހެނީ ބަލަން ކަމަށާއި، މީގެ ކުރިން މަރުވެފައިވެސް އެބަތިބި ކަމަށް ވާހަކަ ދެއްކި މީހާ ބުންޏެވެ.

ބައެއް ބޮޑެތި ބަލިތަކަށް ފަރުވާ ކުރުމަށް ދަތުރުހަދާފައި ދާންޖެހޭ ފަރާތްތަކަކީ މިކަމުގައި އެންމެ ބޮޑު ތަކުލީފެއް އުފުލަންޖެހޭ މީހުންނެވެ. ހަފްތާއަކު އެއްފަހަރު ދާންޖެހުނަސް އެއީ އަތުންދާ އެތައް ހާސް ރުފިޔާއެކެވެ. އަސާސީ ހިދުމަތެއް ހޯދަށް އެތައް ހާސް ރުފިޔާއެއް ހޭދަކުރަންޖެހުމަކީ ރައްޔިތުންނަށް އެކަމުގެ މާޔޫސްކަން ގެނުވި ކަމެކެވެ. ނަމަވެސް މިކަންވެސް ބަދަލުވީ އާރުޓީއެލްއާއެކުގައެވެ.

އާރުޓީއެލް ލޯންޗުގެ މުވައްޒަފުން ހާއްސައެހީއަށް ބޭނުންވާ ފަރާތްތަކަށް ވަކި ހާއްސަ ކަމެއްދެއެވެ.

ފަތިހުގެ އަލިކަން ވެރިވުމުގެ ކުރިން ސްޓޭޝަން ކުރެވިފައިވާ ރަށްރަށުގެ ކައްޕިންނާއި، ފަޅުވެރިން އާރުޓީއެލް ފެރީތައް ދަތުރަށް ތައްޔާރުކުރެއެވެ. މުޅި ފެރީ ޗެކްކޮށް ސާފުކޮށް އިންޖީނު ޓެސްޓު ކުރެއެވެ.

އަރާ އިރާއެކު ދަތުރުވެރިން އާރުޓީއެލްގެ އެޕްލިކޭޝަނުން ފޯނުން ޖީބަށް ލުއި، ހެޔޮއަގުގައި ޓިކެޓް ނަގައިގެން ލޯންޗަށް އަރަނީ ގަޑިއަށް ފުރާނެކަމުގެ އިތުބާރާއި ޔަގީންކަމާއެކުއެވެ. ލޯންވުގައި ހަރުކޮށްފައިވާ ސިސްޓަމް މެދުވެރިކޮށް ޓިކެޓް ވެރިފައިކުރެވެއެވެ.

މި ސިސްޓަމް އަދި އެޕްލިކޭޝަންތައް މޮނިޓަރކޮށް އެމްޓީސީސީގެ އިންފޮރމޭޝަންސް ކޮމިއުނިކޭޝަންސް ޓީމުންނާއި ބެކް އޮފީސް ސްޓާފުން ބަލަހައްޓަމުންދެއެވެ. ފަޅުވެރިން ލެގެޖް ލޯޑްކޮށް ނިމުމުން، ލޯންޗުގެ ކެޕްޓަން ދަތުރުކުރާނެ މަންޒިލްތަކާއި، ހޭދަވާނެ ވަގުތުގެ ތަފްސީލް އިންޓަރކޮމް މެެދުވެރިކޮށް ފަސިންޖަރުންނަށް އަންގައެވެ.

މި ލޯންޗްތަކުގެ ފަޅުވެރިންނަކީ އެ ލޯންޗެއް ސްޓޭޝަން ކުރާ ރަށްރަށުގެ މީހުންނެވެ. އެހެންކަމުން ކޮންމެ ދުވަހަކުވެސް މަސައްކަތް ނިންމާފައި، ފަޅުވެރިން، އަނބިން ކައިރިއަށް، އަމިއްލަ ގެއަށް އަމިއްލަ އާއިލާ ކައިރިއަށް ދެވެއެވެ.

ބަލާބެލުމަށް މިއީ ފެރީތަކަކާއި، ފެރީ ހަޓްތަކެކެވެ. ނަމަވެސް މިއީ ރާއްޖޭގެ ދަތުރުފަތުރަށް ގެނެވުނު އިންގިލާބީ ބަދަލެކެވެ.

ރައްޔިތުންނަށް ހަގީގަތުގައި ވެސް ރަށު ބަންދުން ސަލާމަތްވެވޭނެ ކަމުގެ އިހުސާސް ކުރެވެން ފަށައިފިއެވެ. ހާސްކަން ފިލާ ހިނގައްޖެއެވެ.

ރާއްޖޭގެ މިނިވަން މާހައުލުގައި މިނިވަންކަމާއެކު، ތައުލީމް އުނގެނި ސިއްހީ ހިދުމަތް ހޯދާ، ވިޔަފާރިކޮށް އުފާވެރިކަމާއެކު ދިރިއުޅެވޭނެކަމުގެ ޔަގީންކަން ލިބިއްޖެއެވެ.