ކޮންމެ ސިނާޢަތެއްގައި ވެސް ދެމެހެއްޓެނެވި ގޮތެއްގައި ޚިދުމަތް ފޯރުކޮށްދެވޭނީ މީހުން ބިނާކުރުމުން: ނައިބު ރައީސް
ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް އެންމެ ބޮޑު އަހަންމިއްޔަތުކަން ދެއްވާ ދާއިރާ އަކީ މީހުން ބިނާކުރުމުގެ ދާއިރާ
ރޭޑިއޯގްރަފީ ކޯހުގެ ސްކޮލަރޝިޕް ލިބުނު ދަރިވަރުންނަށް ލިޔުން ހަވާލު ކޮށްދެއްވުމަށް ބޭއްވި ރަސްމިއްޔާތުގައި ނައިބު ރައީސް ވާހަކަފުޅު ދައްކަވަނީ
ކޮންމެ ސިނާޢަތެއްގައި ވެސް ދެމެހެއްޓެނެވި ގޮތެއްގައި ޚިދުމަތް ފޯރުކޮށްދެވޭނީ މީހުން ބިނާކުރުމުން ކަމަށް ރައީސުލްޖުމްހޫރިއްޔާގެ ނައިބު ފައިޞަލް ނަސީމް ވިދާޅުވެއްޖެއެވެ.
ސްޓޭޓް ޓްރޭޑް އޯގަނައިޒޭޝަން (އެސްޓީއޯ)ގެ ޑިޕްލޮމާ ލެވެލްގެ ރޭޑިއޯގްރަފީ ކޯހުގެ ސްކޮލަރޝިޕް ލިބުނު ދަރިވަރުންނަށް ލިޔުން ހަވާލުކޮށްދެއްވުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުން ނައިބު ރައީސް ވިދާޅުވީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް އެންމެ ބޮޑު އަހަންމިއްޔަތުކަން ދެއްވާ ދާއިރާ އަކީ މީހުން ބިނާކުރުމުގެ ދާއިރާ ކަމަށެވެ.
މި ދާއިރާ ކުރިއެރުވުމަށް ވަރަށް ބޮޑު ބޭނުމެއް އެބައޮތްކަން ފާހަގަކުރައްވާ ނައިބު ރައީސް ވިދާޅުވީ ސިއްހީ ދާއިރާއަށް ބަލާއިރު އަތޮޅުތެރޭގެ ސިއްހީ ކަންކަން ރަނގަޅުވަމުންދާ މަންޒަރު އެބަ ފެނިގެންދާ ކަމަށެވެ. އަދި މުޅި ރާއްޖޭގެ ސިއްހީ ދާއިރާ ކުރިއަރައިގެންދާ ކަމަށެވެ.
ކޮވިޑުގެ ހާލަތުގައި ސިއްހީ ހިދުމަތްތެރިން ނެތުމުން އެކަމުގައި ދިމާވި ގޮންޖެހުންތައް ރައްޔިތުންނަށް އެނގޭނެ ކަމަށާއި ކޮންމެވެސް ހިސާބަކުން ރައްޔިތުން ތެދުވާން ޖެހޭ ކަމަށް ނައިބް ރައީސް ވިދާޅުވިއެވެ.
ސިއްހީ ދާއިރާއަށް މީހުން ބިނާކުރުމުގެ މަސައްކަތް ފެށުމަށް ވެސް މިހާރު މާ ލަސްވެއްޖެ ކަމަށާއި ސިއްހީ ދާއިރާގައި ވަރަށް ގިނަ އަދަދަކަށް ބިދޭސީ މީހުން މުހިންމު މަޤާމުތަކުގައި އެބަތިބި ކަމަށް ނައިބު ރައީސް ވިދާޅުވިއެވެ.
ތެރޮޕިއުޓިކް ދާއިރާ އިން ވެސް މީހުން ބިނާކުރުމުގެ ގިނަ މަސައްކަތްތައް ފެށިގެން ކުރިއަށްދާކަމަށް ނައިބު ރައީސް ވިދާޅުވިއެވެ.
ނައިބު ރައީސް ވިދާޅުވީ ޒަމާނުއްސުރެން ފެށިގެން ރަށްތަކުގައި ދިރިއުޅޭ ރައްޔިތުން ސިއްހީ ޙިދުމަތް ހޯދުމަށް ދަތުރު ފަށައިގެން މާލެ އަންނަން ޖެހޭ ކަމަށާއި ނަމަވެސް މިހާރު އެކަން ބަދަލުވަމުން އަންނަ ކަމަށެވެ.
ރައްޔިތުންނަށް ހިތްހަމަޖެހޭ ފަދަ ރަނގަޅު ސިއްހީ ޙިދުމަތްތައް ފޯރުކޮށްދިނުމަކީ މި ސަރުކާރުގެ މުހިންމު އަމާޒެއްކަމަށް ވެސް ނައިބު ރައީސް ވިދާޅުވިއެވެ.
