ބޭންކުތައް ހަފުސްވި ލުބްނާންގައި މޭބިސްކަދުރު ބޭންކެއް

ތަފާތު އެކި ހުނަރާއި އުކުޅުތައް ބޭނުންކޮށްގެން މޭބިސްކަދުރުގެ ދަނޑުވެރިކަން ކުރުމަށާއި މޭބިސްކަދުރަށް، ލުބްނާންގެ ދަނޑުވެރިޔާ، ކަމާލް އަލް-ސައިކަލީގެ ހިތުގައި އުފެދިފައިވާ ލޯތްބަކީ، އެތައް ޖީލަކުން ވާރުތަ ވެގެން އައިސްފައިވާ ލޯތްބެކެވެ. އޭނާ ބަލަހައްޓަމުންދާ ދަނޑުގެ ވަކި ސަރަޙައްދެއް ހާއްސަކޮށްފައި ވަނީ ތަފާތު އެކި ބާވަތްތަކުގެ މޭބިސްކަދުރު އާލާކޮށް، ރައްކާ ކުރުމަށެވެ. ސައިކަލީގެ ބަހުން ނަމަ، އޭނާގެ "މޭބިސްކަދުރު ބޭންކުގައި" މިއަދު ތަފާތު 72 ބާވަތެއްގެ މޭބިސްކަދުރު އެބަހުއްޓެވެ.

ކުފާރް މެޗްކީގެ މުނިސިޕަލް ކަންކަން ބެލެހެއްޓުމާ އެންމެ އިސްކޮށް ހަވާލުވެ ހުރި ސައިކަލީ ސިފަ ކުރާ ގޮތުގައި، "މޭބިސްކަދުރަކީ އޭނާގެ ދިރިއުޅުމެވެ."

3 ދަރިންގެ ބައްޕަ، ސައިކަލީއަކީ މޭބިސްކަދަރު ހެއްދުމުގެ މަސައްކަތުގައި އެ އާއިލާއިން ހަރަކާތްތެރިވާ 4 ވަނަ ޖީލެވެ.

ސައިކަލީގެ ދަނޑުތަކުން، ތަފާތު އެކި ބާވަތްބާވަތުގެ މޭބިސްކަދުރު ވިއްކި ކަމުގައި ވީ ނަމަވެސް، އޭނާގެ މޭބިސްކަދުރު ބޭންކުގައި ރައްކާ ކުރާ ބާވަތްތަކެއް ނުވިއްކައެވެ. 72 ބާވަތެއްގެ މޭބިސްކަދުރު ރައްކާކޮށްފައިވާ އެ ބޭންކުގައި، ކޮންމެ ބާވަތަކުން 3 ވަރަކަށް ގަސް ހުރެއެވެ. އެ ހުރިހާ ގަހެއް ހާއްސަކޮށްފައި ވަނީ، އެ ދަނޑަށް ޒިޔާރަތް ކުރާ މެހެމާނުންގެ ބޭނުމަށް އެކަންޏެވެ.

މި ދުވަސްވަރަކީ ލުބްނާންގެ އިޤްތިޞާދު އިނދަޖެހި، މާލީ ހީނަރުކަން ކުރިމަތިވެ، ވިޔަފާރި ބޭންކުތަކުން ފައިސާ ނެގޭ މިންވަރު ކޮންޓްރޯލް ކޮށްފައި ވާ ދުވަސްވަރަކަށް ވާ އިރު، އެކަމަށް އިޝާރާތް ކުރަމުން ސައިކަލީ ބުނީ، އޭނާގެ މޭބިސްކަދުރު ބޭންކަކީ ވަރަށް ތަފާތު ބޭންކެއް ކަމަށެވެ.

މުޅި ޤައުމު އެފުށް މިފުށަށް ޖެހިފައި އޮތެއް ކަމަކު، ސައިކަލީ ފަދަ ލުބްނާންގެ ރައްޔިތުން އަދިވެސް ބަލަމުން ދަނީ އަމިއްލަ މަސައްކަތުން ދިރިއުޅުމުގެ ކަންކަން ދެކޮޅު ޖައްސާ، އުޖާލާ މުސްތަޤުބަލެއް ކަށަވަރުކުރެވޭތޯއެވެ. މި ދަނޑިވަޅަކީ ހިތި ދާޚިލީ ހަނގުރާމައެއްވެސް ތަޖުރިބާ ކޮށްފައިވާ ލުބްނާންގެ ތާރީޚް ދެކެފައި ނުވާފަދަ ހީނަރުކަމަކާ އެ ޤައުމަށް ކުރިމަތިލާން ޖެހިފައި ވާ ހިތްދަތި ދަނޑިވަޅެކެވެ. މާލީ ގޮތުންވެސް ބޮޑެތި ގެއްލުންތަކަކާ އެ ޤައުމަށް ކުރިމަތިލާން ޖެހިފައި ވާ އިރު، ލުބްނާންގައި މިވަގުތު ތިބި ކޮންމެ 10 މީހަކުން 8 މީހަކީ ފަޤީރަކަށް ވަނީ ވެފައެވެ.