ޓަރޝިއަރީ ހޮސްޕިޓަލުތަކުގެ ނުނިމި ހުރި މަސައްކަތްތައް އަންނަ އަހަރު ފެށޭނެ: މިއުވާން
އެ ހޮސްޕިޓަލުތަކުގައި އިތުރު ޚިދުމަތްތައް ގާއިމުކުރެވޭނެ
ރައީސުލްޖުމްހޫރިއްޔާގެ އޮފީހުގެ ސްޕޯކްސްޕަރސަން ބޭއްވެވި ނޫސްވެރިންގެ ބައްދަލުވުން
ރާއްޖޭގެ އެކި ކަންކޮޅުތަކުގައި ގާއިމްކުރާ ޓަރޝިއަރީ ހޮސްޕިޓަލުތަކުގެ ނުނިމި ހުރި މަަސައްކަތްތައް އަންނަ އަހަރު ފެށިގެންދާނެ ކަމަށް ރައީސް އޮފީހުގެ ތަރުޖަމާނު މިއުވާން މުހައްމަދު ވިދާޅުވެއްޖެއެވެ.
ބުރާސްފަތި ދުވަހު ރައީސް އޮފީހުން ބޭއްވެވި ނޫސްވެރިންގެ ބައްދަލުވުމުގައި ވާހަކަދައްކަވަމުން މިއުވާން ވިދާޅުވީ އަންނަ އަހަރުގެ ބަޖެޓުގައި ސިއްހީ ދާއިރާއަށް ވަރަށް ޚާއްސަ އިސްކަމެއް ދެވިގެންދާނެ ކަމަށެވެ. މިގޮތުން ރާއްޖޭގެ ފަސް ސަރަހައްދެއްގައި ގާއިމުކުރާ ޓަރޝިއަރީ ހޮސްޕިޓަލުތަކުގެ ނުނިމި ހުރި މަސައްކަތްތައް ބަޖެޓު ކުރެވިގެންދާނެ ކަމަށް މިއުވާން ވިދާޅުވިއެވެ.
ޓަރޝިއަރީ ފެންވަރަށް ތަރައްގީކުރާ ހޮސްޕިޓަލުތަކަކީ ހދ. ކުޅުދުއްފުށި، ރ. އުނގޫފާރު، ލ. ގަން، ގދ. ތިނަދޫ އަދި އައްޑޫގައި ގާއިމްކޮށްފައިވާ ހޮސްޕިޓަލެވެ.
މިއުވާން އިތުރަށް ވިދާޅުވީ ހޮސްޕިޓަލުތަކާއި ސިއްހީ ދާއިރާއަށް ބޭނުންވާ މުވައްޒަފުން އިތުރުކުރުމަށް އިތުރު ބަޖެޓެއް ކަނޑައެޅިގެންދާނެ ކަމަށެވެ. މުވައްޒަފުންގެ މައްސަލައަކީ ސިއްހީ ދާއިރާއަށް ދިމާވެފައިވާ ބޮޑު އެއް ގޮންޖެހުމަށް ވާއިރު، މުވައްޒަފުން ތަމްރީނުކުރުމުގެ މަސައްކަތް ވެސް އަންނަ އަހަރުގެ ބަޖެޓުގެ ތެރެއިން ކުރިއަށްދާނެ ކަމަށް މިއުވާން ވިދާޅުވިއެވެ.
މީގެ އިތުރުން އަންނަ އަހަރުގެ ބަޖެޓުގެ ތެރެއިން ސިއްހީ މަރުކަޒުތަކާއި، ހޮސްޕިޓަލުތަކަށް ބޭނުންވާ މެޑިކަލް އިކުއިޕްމެންޓުތައް ވެސް ހޯދިގެންދާނެ ކަމަށް މިއުވާން ވިދާޅުވިއެވެ.
