މެކަބީ ހައިފާ ބަލިކޮށް ޔުވެންޓަސް އަށް ފުރަތަމަ މޮޅު

ޔުއެފާ ޗެމްޕިއަންސް ލީގު ގްރޫޕް އެޗްގައި މެކަބީ ހައިފާ ބަލިކޮށް ޔުވެންޓަސް އިން ފުރަތަމަ މޮޅު ހޯދައިިފިއެވެ.

މި ސީޒަންގެ ޗެމްޕިއަންސް ލީގުގައި ޔުވެންޓަސް އިން ކުޅުނު ދެ މެޗުން ވެސް ވަނީ ބަލިވެފައެވެ. ތިން ވަނަ މެޗުގައި ބުދަ ދުވަހުގެ ރޭ ޔުވެންޓަސްގެ އަމިއްލަ ދަނޑުގައި މެކަބީ ހައިފާ ބަލިކުރީ 1-3 އިންނެވެ.

މެޗުގައި ޔުވެންޓަސްގެ ފުރަތަމަ ލަނޑު 35 ވަނަ މިނެޓުގައި ޖެހީ ރާބިއޮޓްއެވެ. އެއީ އެންހެލް ޑި މާރިއާ ތަނަވަސްކޮށްދިން ފުރުސަތެއްގައި ޖެހި ލަނޑެކެވެ. ޔުވެންޓަސްގެ ދެ ވަނަ ލަނޑު 50 ވަނަ މިނެޓުގައި ވްލަހޮވިޗް ޖެހީ ވެސް ޑި މާރިއާ ތަނަވަސްކޮށްދިން ފުރުސަތަކުންނެވެ. އޭގެ ފަހުން 75 ވަނަ މިނެޓުގައި ޑޭވިޑް ވަނީ މެކަބީ ހައިފާ އަށް ލަނޑެއް ޖަހައިދީ ފަރަގު ކުޑަކޮށްފައެވެ. ނަމަވެސް ޑި މާރިއާ ދިން ބޯޅައެއްގައި ރާބިއޮޓް ވަނީ 83 ވަނަ މިނެޓުގައި ޔުވެންޓަސްގެ ތިން ވަނަ ލަނޑު ޖަހާފައެވެ.

މެޗުން މޮޅުވެ ޔުވެންޓަސް އޮތީ ތާވަލްގެ ތިން ވަނަ މަގާމުގައެވެ. އެއީ ތިން ޕޮއިންޓާއެކުއެވެ. މި ގްރޫޕްގެ އެއް ވަނައިގައި އޮތީ ތިން މެޗުން ހަތް ޕޮއިންޓު ހޯދައިގެން ޕެރިސް ސެއިންޓް ޖާމަން (ޕީއެސްޖީ)އެވެ. ދެ ވަނައިގައި އޮތް ބެންފީކާ އަށް ވެސް ލިބެނީ ހަތް ޕޮއިންޓެވެ. ނަމަވެސް ޕީއެސްޖީން ކުރި ހޯދަނީ ފައިދާ ގޯލުންނެވެ.