އެމްޕީ އަސްލަމްއަށް ޖަޒުބާތީ ވަގުތުކޮޅެއް: "އޯޝަން ޕޫލެއްގެ ފެށުން" ފެނުމުގެ އުންމީދުގައި

ހިތަދޫ އުތުރު ދާއިރާގެ މެމްބަރު މުހައްމަދު އަސްލަމަކީ ހަމަގައިމުވެސް ސިޔާސީ ޕޯޑިއަމްތަކަށް އާ މޫނަކަށް ނުވާނެއެވެ. އަސްލަމް ފާހަގަކުރެވެނީ އާއްމުކޮށް ޕޯޑިއަމްތަކުގައި ސަކަ މިޒާޖަކާއެކު ލުއި ގޮތަކަށް ވާހަކަފުޅުދައްކަވާ ބޭފުޅެއްގެ ގޮތުގައެވެ. ނުވަތަ ސިޔާސީގޮތުން ދައްކަވާ ސިޔާސަ ވާހަކަފުޅުތަކާއި، ފާޑުކިޔުމުގެ ޗަސްބު ހެޔޮވަރު ބޭފުޅެއްގެ ގޮތުގައެވެ. އެހެންނަމަވެސް ބުދަ ދުވަހު ހިތަދޫގެ ގޮނޑުދޮށް ހިމާޔަތްކުރުމުގެ މަޝްރޫއު ފެށުމަށް ބޭއްވި ރަސްމިއްޔާތުގައި އަސްލަމް ވާހަކަފުޅުދެއްކެވީ ތަފާތު މޭރުމަކުންނެވެ. އޭނާގެ ވާހަކަފުޅު މިފަހަރު ހުރީ ސިޔާސީ ފާޑުކިޔުމެއް ނުވަތަ ސިޔާސީ ތައުރީފަކަށް ފުދޭވަރަށްވުރެ އަސަރުގަދަ މިސްރާބަކަށެވެ.

އެ ރަސްމިއްޔާތުގައި ވާހަކަފުޅުދެއްކެވި ހައެއްކަ ބޭފުޅުންގެ ތެރެއިން އަސްލަމްގެ ވާހަކަފުޅު މަޑުމައިތިރިވެފައި އަބުއިކަން ބޮޑެވެ. އެހެންނަމަވެސް އެ އެއީ އެހާ ޖަޒުބާތީވެސް ވާހަކަތަކެކެވެ. ހަނދާނުގެ ސޮފުހާތައް ބަންޑުންކޮށްލައްވައި ދެއްކެވި ވާހަކަފުޅުތަކަކީ; މޫދަށް އެރޭނެ ހިތްފަސޭހަ ތަންކޮޅެއް ހޯދުމުގެ ފޮނި ތަސައްވުރުގެ ވާހަކައެވެ. މޫސުމީ އޮއިވަރުގައި ގިރައިގެން ދިޔަ ހޭޅިފަށާއެކު، އަސްލަމްފަދަ އެތައް ބަޔަކު އައްޑޫގައި މޫދަށް އެރި ސަކަމަޖާ ނެގި ދުވަސްތައް މާޒީއަށް ހަދައިފިއެވެ. މިއަދު ހިތަދޫގައި މޫދަށް ދާން ހިތްފަސޭހަ ތަނެއް އޮތުމަކީ އަސްލަމް ދެކެވަޑައިގަންނަވާ ކަޅާއި ހުދުގެ ހުވަފެނެކެވެ.

އައްޑޫ ބަހުރުވައިން "ވަޑަ" ނުވަތަ ވަޅު ފަދަ ތަނެއް، މޫދުގައި ފަތާ ސަރަހައްދެއްގެ ގޮތުގައި އޮތުމަކީ "އޯޝަން ޕޫލްއެއްގެ ފެށުން" ކަމަށް ގަބޫލުފުޅުކުރައްވާކަން އަސްލަމް ފާހަގަކުރެއްވިއެވެ. އެއީ އައްޑޫގެ މެނިފެންސްޓޯގައިވެސް ހިމަނާފައިވާ ކަމެއް ކަމަށާއި، އެ ހިސާބަށް ކަންކަން ފުރިހަމަވުމަކީ އޭނާގެ ބޮޑު އުންމީދެއްކަން އަސްލަމް ފާހަގަކުރެއްވިއެވެ.

އަސްލަމްގެ ވާހަކަތައް އިތުރަށް ކުރިއަށް ގެންދެވީ އޭނާގެ ޅަ ދުވަސްވަރުގެ ހަނދާންތަކާ އެކުގައެވެ. ކުރިން ކޯއްޓޭއަށް މޫދަށް ދިޔަ ނަަމަވެސް، މިހާރު މީހުން ދިރިއުޅޭ ސަރަހައްދާ ކައިރީގައި މޫދަށް ދެވޭނެ ގޮތް ނެތުމަކީ އާއްމުންގެ ކަންބޮޑުވުމެއްކަން އޭނާ ފާހަގަކުރެއްވިއެވެ. އަސްލަމްގެ ވާހަކަފުޅު ކުރިއަށްގެންދެވީ އައްޑޫ ބަހުރުވައާއި ދިވެހި ބަސް މަސްހުނިކުރައްވައިގެންނެވެ. ކުޑައިރުގެ ހަނދާންތަކުގެ ވާހަކަތައް ދެއްކެވީ އަސްލަމްގެ މާދަރީ ބަހުންނެވެ.

އަސްލަމްގެ ވާހަކަފުޅުގައި، އޭނާ ކުޑައިރު އެ ސަރަހައްދުތަކުން ފެނުނު ގުދުރަތީ ރީތިކަން މިހާރު ގެއްލިފައިވާކަން ފާހަގަކުރެއްވިއެވެ. އަދި އެފަދަ ތަންތަން ހިމާޔަތްކުރަންޖެހޭ ކަމަށް އަސްލަމް ވިދާޅުވިއެވެ. ހިތަދޫގެ ގޮނޑުދޮށް ހިމާޔަތްކުރުމަކީ އެތައް ދުވަހެއް ވަންދެން އޭނާ ދެކެވަޑައިގަތް ހުވަފެނެއްކަމަށް އަސްލަމް ތަކުރާރުކޮށް ވިދާޅުވިއެވެ.