ހޮންގްކޮންގް ފަތުރުވެރިންނަށް ހުޅުވައިލަނީ
6 އޮކްޓޯބަރު 2022 | ބުރާސްފަތި 02:20ކޮވިޑް ވެކްސިން ފުރިހަމަކޮށްފައިވާ ކޮންމެ މީހަކަށް ވެސް ހޮންގްކޮންގްއަށް އެތެރެ ވެވޭނެ
ކެތޭ ޕެސިފިކްގެ ފްލައިޓެއް
ކޮވިޑުން ރައްކާތެރިވުމުގެ ގޮތުން ދެ އަހަރެއްހާ ދުވަހު ބަންދުކޮށްފައި އޮތުމަށް ފަހު ފަތުރުވެރިންނަށް ހޮންގްކޮންގް ހުޅުވާލުމަށް އެ ޤައުމުގެ ސަރުކާރުން ނިންމައިފިއެވެ.
ކޮވިޑުން ރައްކާތެރިވުމުގެ ގޮތުން ހޮންގްކޮންގް ސަރުކާރުން އެޅި އެންމެ ހަރުކަށި އެއް ފިޔަވަޅަކީ، ބޭރުން އަންނަ ކޮންމެ ބިދޭސީއަކު ވެސް، އެމީހެއްގެ އަމިއްލަ ޚަރަދުގައި، ސަރުކާރުން ކަނޑައަޅައި ޓޫރިސްޓު ހޮޓަލެއްގައި، 21 ދުވަހު ކަރަންޓީނުގައި ހުންނަން ޖެހުމެވެ. ނަމަވެސް ހޮންގްކޮންގުގެ ގިނަ ބަޔަކު ކޮވިޑް ވެކްސިންގެ ދެ ޑޯޒް ފުރިހަމަކޮށް، އަދި އެހެން ގައުމުތަކުގައި ވެސް ކޮވިޑް ވެކްސިންގެ ޑޯޒްތައް ފުރިހަމަކުރާ މީހުންގެ އަދަދު މަތިވުމާ އެކު، ކަރަންޓީނުގެ މުއްދަތު 21 ދުވަހުން ތިން ދުވަހަށް މަދުކުރިއެވެ.
ހޮންގްކޮންގް ސަރުކާރުން ވަނީ، ކަރަންޓީނުގެ އުސޫލު އުވާލައިފައެވެ. އޭގެ ބަދަލުގައި ކޮވިޑް ވެކްސިން ފުރިހަމަކޮށްފައިވާ ކޮންމެ މީހަކަށް ވެސް ހޮންގްކޮންގްއަށް އެތެރެ ވެވޭނެ ގޮތަށް މިހާރު ވަނީ އުސޫލު ބަދަލުކޮށްފައެވެ.
ހޮންގްކޮންގް އަށް އެތެރެ ވެވޭނީ ވެކްސިން ފުރިހަމަ ކުރުމުގެ އިތުރުން، ކޮވިޑް ޓެސްޓުގެ ނެގެޓިވް ނަތީޖާއެއް ވެސް އޮވެގެންނެވެ. އެތެރެ ވުމަށް ފަހު ވެސް، ތިން ދުވަސް ވަންދެން ރެސްޓޯރަންޓްތަކަށް ދިޔުމަކީ މަނާކަމެއް ކަމަށް އެ ޤައުމުން ބުނެއެވެ.
