ޗެމްޕިއަންސް ލީގުގައި ކުރީގެ ކްލަބް ޗެލްސީއާ ދެކޮޅަށް ނުކުތުމަކީ އުފަލެއް ކަމަށް އޭސީ މިލާންގެ ފޯވާޑް ޖިރޫޑް ބުނެފިއެވެ.

ގްރޫޕް ސްޓޭޖްގައި ބުދަ ދުވަހުގެރޭ 00:00 ގައި ޗެލްސީގެ ދަނޑުގައި, ޗެލްސީއާ ދެކޮޅަށް އޭސީ މިލާން ނުކުންނާނެއެވެ. ފުޓުބޯޅަ މެޗަށް ނުކުންނައިރު މިލާންގެ އިސް ފޯވާޑަކީ ކުރިން ޗެލްސީއާއެކު ޗެމްޕިއަންސް ލީގު އުފުލާލި ޖިރޫޑްއެވެ. މިދިޔަ ސީޒަންގައި އޭސީ މިލާނަށް ބަދަލުވެ, މިލާނަށް ސެރީ އޭ ހޯދައިދިނުމުގައި މުހިއްމު ދައުރެއް އަދާކުރި ފޯވާޑް ބުނީ ޗެލްސީގެ ދަނޑަށް އެބުރު ދިއުމަކީ ޚާއްޞަ އުފަލެއްކަމަށެވެ. އަދި ޗެލްސީގެ ސްޓޭޑިއަމުން އޭނާއަށް މަރުހަބާ ކިޔާނެކަމަށް އުއްމީދުކުރާކަމަށެވެ.

ޖިރޫޑް ބުނީ އޭނާ ކްލަބް ދޫކޮށްލީ ވެސް ރަނގަޅަށް ކަމަށާއި, އެހެންކަމުން ރަނގަޅަށް ކަންތައްތައް ވާނެކަމަށް އުއްމީދުކުރާކަމަށެވެ. ޗެލްސީގައި މިހާރުވެސް އޭނާއާއެކު ކުޅުނު ގިނަ ކުޅުންތެރިންތަކެއް ތިބިކަން ފާހަގަކޮށް ޖިރޫޑް ބުނީ އެ ކުޅުންތެރިން އޭނާއަށް އެނގޭކަމަށެވެ. އެކަމަކު ކޯޗު ބަދަލުވެފައިވުމުން ޗެލްސީން ކުޅޭނީ ކިހިނެއްކަން ނޭންގޭކަމަށެވެ.

މެޗަށް ނުކުންނައިރު ޗެލްސީގެ މިޑްފީލްޑަރު ކާންޓޭއާއި ކީޕަރު މެންޑީ ވަނީ އަނިޔާއަށްފަހު ތަމްރީނުތަކަށް ނުކުމެފައެވެ. އަދި މިޑްފީލްޑަރު ޖޯޖީނިއޯއާއި, ފޯވާޑް ކައި ހާވާޓްޒް ވެސް ޓީމާއެކު އަންނަނީ ފަރިތަކުރަމުންނެވެ.

މިމެޗު އެންމެ ބޮޑަށް ޚާއްޞަވާ 36 އަހަރުގެ ޖިރޫޑް ވަނީ ޗެލްސީއާއެކު ޗެމްޕިއަންސް ލީގުގެ އިތުރުން ޔޫރޮޕާ ލީގާއި އެފްއޭކަޕް ވެސް އުފުލާލާފައެވެ. ޗެލްސީ ދޫކޮށް އިޓަލިއަށް ބަދަލުވީ 2021 ވަނަ އަހަރުއެވެ. ޗެލްސީއާއި އޭސީ މިލާން ހިމެނޭ ގްރޫޕްގެ އެއްވަނާގައި އޮތީ މިލާނެއެވެ. ޕޮއިންޓަކާއެކު ޗެލްސީ އޮތީ ފުލުގައެވެ.