އާޖެންޓީނާގެ ޤައުމީ ޓީމަށް ގިނަ މެޗުތަކެއް ކުޅެދީފައިވާ ފޯވާޑް ގޮންޒާލޯ ހިގުއިން ފުޓުބޯޅައިން ރިޓަޔާވިކަން އިއުލާންކޮށްފިއެވެ.

އުމުރުން 34 އަހަރުގެ ހިގުއިން އަކީ އާޖެންޓީނާގެ އިތުރުން ކުލަބް ލެވެލްގައި ވެސް މޮޅު ކުޅުމެއް ދެއްކި ކުޅުންތެރިޔެކެވެ. އޭނާ ވަނީ ޔޫރަޕުގެ ބޮޑެތި ކުލަބުތަކަށް ކުޅެދީފައެވެ.

ހިގުއިން ފުޓުބޯޅަ ކުޅުން ހުއްޓާލިކަން އިއުލާންކުރި އިރު އޭނާ ހުރީ އެމެރިކާގެ އިންޓަ މިއާމީގައެވެ. ހިގުއިން އޭނާގެ ސީނިއާ ކެރިއަރު ފަށާފައިވަނީ 2005 ވަނަ އަހަރު އާޖެންޓީނާގެ ރިވާ ޕްލޭޓުންނެވެ. ދެ އަހަރު އެ ޓީމަށް ކުޅެދިނުމަށްފަހު، 2007 ވަނަ އަހަރު އޭނާ ބަދަލުވީ ސްޕެއިންގެ ގަދަ އެއް ބާރު ރެއާލް މެޑްރިޑަށެވެ. އެ ޓީމުގައި އޭނާ ވަނީ ކާމިޔާބު ހަ އަހަރު ހޭދަކޮށްފައެވެ. ރެއާލްގައި ހޭދަކުރި މުއްދަތުގައި އޭނާ ވަނީ އެ ޓީމަށް ކުޅެދިން 264 މެޗުގައި 121 ލަނޑު ޖަހާފައެވެ. އެ ޓީމާއެކު އޭނާ ވަނީ ހަ ތައްޓެއް ވެސް ކާމިޔާބުކޮށްފައެވެ.

ރެއާލް ދޫކޮށް 2013 ވަނަ އަހަރު ހިގުއިން ބަދަލުވީ އިޓާލިއަން ލީގުގެ ނަޕޯލީއަށެވެ. އެއަށްފަހު 2016 ވަނަ އަހަރު ޔުވެންޓަސް އަށް ބަދަލުވިއެވެ. ޔުވެންޓަސްގައި ހުރެ އޭނާ ވަނީ ލޯނު އެއްބަސްވުމެއްގެ ދަށުން އޭސީ މިލާނާއި ޗެލްސީ އަށް ކުޅެފައެވެ. ހިގުއިން އެންމެ ފަހުން ކުޅުނު ކުލަބު އިންޓަ މިއާމީ އަށް ބަދަލުވީ 2020 ވަނަ އަހަރުއެވެ.

ހިގުއިން ވަނީ 2009 އިން 2018 އަށް އާޖެންޓީނާގެ ޤައުމީ ޓީމަށް ވެސް ކުޅެފައެވެ. ޤައުމީ ޓީމަށް ކުޅެދިން 75 މެޗުން އޭނާ ވަނީ 31 ލަނޑު ޖަހާފައެވެ. އާޖެންޓީނާއާއެކު 2014 ވަނަ އަހަރުގެ ފީފާ ވޯލްޑް ކަޕްގެ ފައިނަލް ކުޅުނު އިރު، 2015 އާއި 2016 ވަނަ އަހަރުގެ ކޮޕަ އެމެރިކާ މުބާރާތުގެ ފައިނަލް ވެސް ކުޅެފައިވެއެވެ.

ފުޓުބޯޅައިން ރިޓަޔާވިކަން އިއުލާންކޮށް ދެއްކި ވާހަކައިގަ ހިގުއިން ބުނީ، ސޯޝަލް މީޑިއާ ގައި މީހުންނަށް ނިސްބަތްކޮށް ކުރާ ކޮމެންޓުތަކުގެ ސަބަބުން މީހުންނަށް ވަރަށް ގެއްލުންވާ ކަމަށެވެ. އެކަމުން އެ މީހަކަށް ކުރާ ގެއްލުމުގެ އަސަރު އެހެން މީހަކަށް ތަސައްވަރު ވެސް ނުކުރެވޭނެ ކަން ފާހަގަކޮށް ހިގުއިން ބުނީ، އޭނާ އަށް ވެސް އެކަން ކަން ވަރަށް ބޮޑަށް ދިމާވި ކަމަށެވެ. އަދި އެކަމުގައި އޭނާ އަށް އެހީވެދިނީ އާއިލާގެ މެމްބަރުންކަން ވެސް ހިގުއިން ފާހަގަ ކުރިއެވެ. ނިންމާލަމުން އޭނާ ބުނީ ސޯޝަލް މީޑިއާގައި މީހަކަށް ހަމަލާ ދިނުމުގެ ކުރިން އެކަމާ ވިސްނާލަން ޖެހޭނެ ކަމަށެވެ.