މޯލްޑިވްސް ޕޯޓްސް ލިމިޓެޑު (އެމްޕީއެލް) ގެ ތެރެއިން ހިނގާފައިވާ ތެލުގެ ވައްކަމުގައި އެމްޕީއެލް އިން ބައިވެރިވީ އެއް މުވައްޒަފުންތަކެއް ކަމަށާއި އެ މުވައްޒަފުން މިހާރު ވަޒީފާއިން ވަކިކޮށްފައިވާ ކަމަށް އެ ކުންފުނީގެ ސީއީއޯ ޝާހިދު އަލީ މިއަދު ވިދާޅުވެއްޖެއެވެ.

ކޮވިޑް-19ގެ ފުރަބަންދުގައި އެމްޕީއެލްގެ ތެރޭގައި ހިނގާދިޔަ ތެލުގެ ވަގު ވިޔަފާރި ހިންގާފައިވަނީ އެމްޕީއެލްގެ މުވައްޒަފުންނާއި، ސަރުކާރުގެ ތެޔޮ ކުންފުނި، ފިއުލް ސަޕްލައިގެ މުވައްޒަފުން ބައިވެރިވެގެންނެވެ. މި މައްސަލަ ފެންމަތިވެގެން އައީ 2020 ވަނަ އަހަރު ކަމަށް ވާއިރު އޭރު ބެލެވުުނު ގޮތުގައި އެކަން ހިނގީ އެ 2020 ވަނަ އަހަރު އެކަންޏެވެ. އެހެންނަމަވެސް މިހާރު ބެލެވޭ ގޮތުން މި ހިޔާނާތަކީ 2018އިން ފެށިގެން ހިނގަމުން އައި ކަމެކެވެ.

މިމައްސަލަ ފެންމަތިވެފައިވަނީ ކޮވިޑް-19ގެ ފުރަބަންދުގައި ކުރެވުނު މަސައްކަތްތައް ބެލުމަށް ހިންގުނު އިންޓާރނަލް އޮޑިޓްތަކުން ކަމަށް ވާއިރު މި އޮޑިޓްތަކުން ވަނީ އެމްޕީއެލްއަށް ނުލިބޭ ތެލަކަށް ބިލްތަކެއް ހަދައި ފައިސާ ނަގާފައިވާކަން ހާމަވެފައެވެ. އާދިއްތަ ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ޝާހިދު ވިދާޅުވީ މި މައްސަލަ އާއި ގުޅިގެން އެމްޕީއެލްގެ އިންޓަރނަލް އިންވެސްޓިގޭޝަނެެއްގެ އިތުރުން މިނިވަން އޮޑިޓަރެއްގެ ރިޕޯޓްތަކުން ލިބުނު މައުލޫމާތުގެ އަލީގައި މި ހިޔާނާތަކީ 2018 އިން ފެށިގެން އެކަން ހިނގަމުން އައި ކަމެއްކަން އެނގިފައިވާ ކަމަށް އޭނާ ވަނީ ވިދާޅުވެފައެވެ. އެމްޕީއެލްގައި މިފަދަ ކަމެއް އިތުރަށް ވިޔަ ނުދިނުމަށް ގެންނަން ޖެހޭ ބަދަލުތައް ގެނެސްފައިވާނެ ކަމަށް ވެސް އޭނާ ވިދާޅުވިއެވެ.

މި މައްސަލަ އޮޑިޓަރ ޖެނެރަލްގެ އޮފީހާއި ފުލުހުން ވެސް ދަނީ ތަހުގީގުކުރަމުންނެވެ. އަދި އޮޑިޓަރ ޖެނެރަލްގެ ރިޕޯޓް ވަރަށް އަވަހަށް މި މައްސަލައިގައި ނިންމާނެ ކަމަށް ބެލެވޭ ކަމަށް ޝާހިދު ވަނީ ފާހަގަކުރައްވާފައެވެ.