ތައިލަންޑުގެ ބޮޑުވަޒީރަށް އަދި މަގާމުގައި ހުންނެވޭނެ

ތައިލަންޑުގެ ބޮޑުވަޒީރު ޕްރަޔުތު ޗާންއޮޗާއަށް މަގާމުގައި ހުންނެވުމަށް ލިބިވަޑައިގަންނަވާ ގާނޫނީ މުއްދަތު ހަމަވެފައިވާކަމަށް ބުނެ އިދިކޮޅު ފަރާތްތަކުން ކޯޓަށް ވެއްދި މައްސަލަ ބޮޑުވަޒީރާ އެއްކޮޅަށް ނިމިއްޖެއެވެ.

އަސްކަރީ ވެރިޔާގެ މަގާމުގައި ކުރިން ހުންނެވި ޖެނެރަލް ޕްރަޔުތު ވެރިކަމަށް ވަޑައިގެންފައިވަނީ 2014 ވަނަ އަހަރުގެ މެއި މަހު ގެނެވުނު މިލިޓަރީ އިންގިލާބެއްގައެވެ. އަދި އެ އަހަރުގެ އޮގަސްޓު މަހު އަމިއްލަފުޅަށް ޕްރައިމް މިނިސްޓަރުގެ މަގާމަށް ވަޑައިގެންކަން އިއުލާނުކުރެއްވި އެވެ. އެހެންކަމުން އިދިކޮޅުން ބުނަނީ ޕްރަޔުތުގެ ވެރިކަމުގެ މުއްދަތު ގުނަން ޖެހޭނީ 2014 ވަނަ އަހަރުން ކަމުގައެވެ. އެޤައުމުގެ ގާނޫނު އަސާސީ ބުނާ ގޮތުން ޕްރައިމް މިނިސްޓަރުގެ ދައުރުގެ މުއްދަތަކީ 8 އަހަރެވެ.

މައްސަލަ ނިންމަމުން ތައިލެންޑުގެ ކޮންސްޓިޓުޝަނަލް ކޯޓުން ބުނެފައިވަނީ ޕްރަޔުތުގެ ދައުރުގެ މުއްދަތު ގުނޭނީ ގާނޫނު އަސާސީއަށް އަމަލުކުރަން ފެށި އަހަރު ކަމަށްވާ 2017 ވަނަ އަހަރުން ފެށިގެން ކަމުގައެވެ. ގާނޫނު އަސާސީ ބުނާ ގޮތުން ޕްރައިމް މިނިސްޓަރުގެ ދައުރުގެ މުއްދަތަކީ 8 އަހަރުކަމަށް ވާއިރު، ދައުރުގެ އެއްބައި އަދި އެބައޮތެވެ.

މި މައްސަލަ ކޯޓަށް ވެއްދި ހަމައިން ޕްރަޔުތު ޗާންއޮޗާ ހުންނެވީ މަގާމުގެ މަސްއޫލިއްޔަތުތަކުން ސަސްޕެންޑު ކުރެވިފައެވެ. އަދި އެމަގާމު ވަގުތީ ގޮތުން ފުރުއްވަމުން ގެންދެވީ ބޮޑުވަޒީރުގެ ނާއިބެވެ.

ޕްރަޔުތު ޗާންއޮޗާ ގެންދަވަނީ 2023 ވަނަ އަހަރު ބާއްވާ އިންތިޚާބަށް ތައްޔާރުވަމުންކަމަށް ރިޕޯޓުތައް ބުނެއެވެ. އޭނާގެ އުންމީދަކީ ތައިލަންޑުގައި އެންމެ ގިނަ ދުވަހު ވެރިކަން ކުރެއްވި ލީޑަރަށް ވުމެވެ.