އިނގިރޭސި ވިލާތުގެ ރާނީ އެލިޒަބަތު 2 ވަނަ އަވަހާރަވީ 2022 ސެޕްޓެމްބަރ 8 ވީ ބުރާސްފަތި ދުވަހުގައެވެ. އަވަހާރަވީއިރު އުމުރުފުޅަކީ 96 އަހަރެވެ. ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙާއި އެމަނިކުފާނުގެ އަނބިކަނބަލުން ފަޒްނާ އަޙްމަދު އިނގިރޭސި ވިލާތަށް ދާދިފަހުން ރަސްމީ ދަތުރުފުޅެއް ކުރެއްވިއެވެ. އެ ދަތުރުފުޅު ރައީސުލްޖުމްހޫރިއްޔާގެ ދެކަނބަލުން ކުރެއްވީ އިނގިރޭސި ރާނީގެ ޖަނާޒާގައި ބައިވެރިވެވަޑައިގެން، ރާނީއަށް އެންމެފަހުގެ އިޙްތިރާމް އަދާ ކުރެއްވުމަށެވެ. އަދި ރާނީގެ ޖަނާޒާ އޮތީ ސެޕްޓެމްބަރު 19ވީ ހޯމަ ދުވަހުއެވެ. ޖަނާޒާގައި ދެ ކަނބަލުން ވެސް ބައިވެރިވެވަޑައިގެންނެވިއެވެ.

ޖަނާޒާގައި ބައިވެރިވެވަޑައިގަތުމަށްފަހު ރާއްޖެ ވަޑައިގެންނެވީ މިދިޔަ މަހުގެ 22 ވަނަ ދުވަހުއެވެ. އަދި ޖަނާޒާގައި ބައިވެރިވެވަޑައިގަތުމަށް އެ ޤައުމަށް ވަޑައިގަތުމުން ފާހަގަކުރެއްވުނު ބައެއް ވާހަކަތައް ފަޒްނާ ވަނީ އަމިއްލަފުޅު ފޭސްބުކް އެކައުންޓްގައި ހިއްސާ ކުރައްވާފައެވެ.

އިނގިރޭސި ވިލާތުގެ ރާނީ އެލިޒަބަތު 2 ވަނައިގެ ޖަނާޒައިން ފާހަގަވިކަމެއް ލިޔެލަން މިއީ މުނާސަބު ދުވަހެއް ކަމަށް ވިދާޅުވިއެވެ. ޤައުމުތަކުގެ ވެރިން އެކިއެކި ހަފްލާތަކަށް ދިޔުމަށް ޖަމާވާން ޖެހުނީ ރޯޔަލް ޗެލްސީ ހޮސްޕިޓަލަށް ކަމަށާއި އެތަނުން ބަކިންގްހަމް ޕެލެސްއަށާއި ވެސްޓް މިނިސްޓަރ އެބީއަށް، އެހެންވެސް ވެރިންނެކޭ އެއްފަދައިން، ރައީސްގެ ދެކަނބަލުން ވެސް ގެންދިޔައީ ކޯޗުގައިކަން ފާހަގަކުރެއްވިއެވެ.  

ފަޒްނާ ވިދާޅުވީ ރޯޔަލް ޗެލްސީ ހޮސްޕިޓަލުން ޤައުމުތަކުގެ ވެރިންނަށް މަރުހަބާ ދެންނެވުމަށާ މަޑުކޮށްލައްވައިގެން ތިއްބަވަންވީތަން ދެއްކުމާ އަރާވަޑައިގަންނަވަންވީ ކޯޗް ބުނެދޭން ތިބީ، އެހެން ވިދާޅުވުން ކުށަކަށްނުވާނަމަ، އިސްރަށްވެހިންކަން ފާހަގަކުރެއްވުނު ކަމަށެވެ.  

އިސްރަށްވެހިންނަކީ ވެސް އެއްދުވަސްވަރެއްގައި ޤައުމު ބިނާކުރުމުގައި ހަރަކާތްތެރިކަމާއެކު އުޅުނު ނޫކަށިފުރައިގެ ޒުވާނުންނެވެ. އަދި މިހާރުވެސް އެއީ ޤައުމަށް ބޭނުންތެރި މުހިންމު ބައެއްކަން އެމީހުންނަށް އިހްސާސްވުން މުހިންމު ކަމަށް ފަޒްނާ ވިދާޅުވެފައިވެއެވެ.

އެ ދުވަހު ހިނގައިދިޔަ ކަމެއް ފަޒްނާ ހިއްސާކުރައްވާފައި މިވަނީ ވަރަށް ވެސް މުހިންމު ބޭނުމެއްގައެވެ. އެއީ އޮކްޓޯބަރު މަހުގެ އެއްވަނަ ދުވަހަކީ ބައިނަލްއަގްވާމީ ގޮތުން ފާހަގަކުރާ ދުނިޔޭގެ އިސްރަށްވެހިންގެ ދުވަސް ކަމަށްވާތީއެވެ. އިސްރަށްވެހިންނަކީ ބައެއް ފަހަރު ބޭކާރު ބަޔެކޭ ނުވަތަ ބޭނުން ނެތް ބަޔެކޭ މުޖުތަމައުގެ ބައެއް ފަރުދުންނަށް ހީކުރެވޭތަން އާދެއެވެ. އެހެންނަމަވެސް ގަބޫލުކުރަންވީ ހަގީގަތަކީ ގައުމު ބިނާކުރުމަށާއި ހެޔޮ ލަފާ ޖީލެއް ބިނާކުރުމަށް އެންމެ އިސް ދައުރެއް އަދާ ކުރި މީހުންނަކީ އެމީހުން ކަމެވެ.

މިއަދު އެމީހުން އުމުރުން ދުވަސްވެ، ގައިގެ ބާރު ދެރަވެ، އެނދުމަތިވި ނަމަވެސް އެމީހުން ވެސް އެހިސާބަށް ގޮސް އެތިބީ އަހަރުމެން ފަދައިން ޒުވާން އުމުރު ފަހަނައަޅާ ގޮސްފަ ކަމެވެ. ތަޖުރިބާގެ ގޮތުން ބެލިޔަސް އެމީހުންނަކީ ނަން ކިޔާލެވޭ ފެންވަރުގެ މީހުންނެވެ. ހަގީގަތަށް ބުނާނަމަ އިސްރަށް ވެހިންނަކީ ކޮންމެ ޤައުމެއްގެވެސް އަގުބޮޑު ރައުސްމާލުތަކެކެވެ. މާޒީއަކީ މުސްތަޤުބަލުގެ މޫނުބަލާ ލޯގަނޑޭ ބުނާ ބީދައިން އެމީހުންގެ ތަޖުރިބާއަކީ މިއަދުގެ ޖީލުތައް ބިނާ ކުރުމަށް ނުހަނު އަގުބޮޑު އެއްޗެއްވެސް މެއެވެ.

އިސްރަށްވެހިންނަށް އެ ބޭނުންވާ ލޯތްބާއި ގަދަރާއި އިހްތިރާމު އެބަ ފޯރުކޮށްދޭން ޖެހެއެވެ. އެމީހުންނަކީ ވެސް މުޖުތަމައުއަށް މުހިންމު ބައެއްކަމުގެ އިހުސާސް ކޮށްދޭން އެބަ ޖެހެއެވެ.