އާޖެންޓީނާގެ ގައުމީ ފުޓްބޯޅަ ޓީމުގެ ކޯޗު ލިއޮނެލް ސްކަލޯނީގެ ކޮންޓްރެކްޓް އައުކޮށްފިއެވެ.
ސްކަލޯނީގެ އެއްބަސްވުމުގެ މުއްދަތު އައުކުރީ 2026 ވަނަ އަހަރު އޮންނަ ވޯލްޑް ކަޕްގެ ނިޔަލަށެވެ. 2026 ވަނަ އަހަރުގެ މުބާރާތް ބޭއްވުމަށް ހަމަޖެހިފައި އޮތީ ކެނެޑާ, އެމެރިކާ އަދި މެކްސިކޯގައެވެ. އެހެންކަމުން ކުރިއަށް އޮތް ހަތަރު އަހަރުވެސް އާޖެންޓީނާގެ ކޯޗުކަމުގެ މަގާމުގައި ހުންނާނީ ސްކަލޯނީއެވެ. ސްކަލޯނީ އަންނަނީ 2018 ވަނަ އަހަރުގެ އޯގަސްޓު މަހުން ފެށިގެން އާޖެންޓީނާއަށް ކޯޗުކޮށްދެމުންނެވެ.
ކުރިއަށް އޮތް ހަތަރު އަހަރުވެސް އާޖެންޓީނާގެ ކޯޗުކަމުގެ މަގާމުގައި ހުންނާނީ ސްކަލޯނީކަން, އާޖެންޓީނާގެ ފުޓްބޯޅަ އެސޯސިއޭޝަންގެ ރައީސް ޗިކީ ޓާޕިއާ ވަނީ ކަށަވަރުކޮށްދީފައެވެ. އޭނާ ވިދާޅުވީ ޓީމުގެ ދުރުރާސްތާ ޕްލޭނާއެކު ޓީމު އޮތީ ކުރިއަށްދާން ތައްޔާރަށް ކަމަށެވެ. ޓާމިއާ ވަނީ ސްކަލޯނީއާއެކު އެއްބަސްވުން އައުކޮށް ސޯޝަލް މީޑިއާގައި ފޮޓޯއެއްވެސް ހިއްސާކޮށްފައެވެ.
ސްކަލޯނީއަށް މިހާރު އޮތް އެންމެ ބޮޑު މަސައްކަތަކީ މިއަންނަ ނޮވެމްބަރު މަހު ފަށާ ފީފާ ވޯލްޑް ކަޕްގެ ތަށި އާޖެންޓީނާއަށް ހޯދައިދިނުމެވެ. އާޖެންޓީނާއަކީ މިފަހަރުގެ މުބާރާތުގެ ފޭވަރިޓުންގެގޮތުގައި ބެލެވިފައިވާ ޓީމެކެވެ. ގިނަ ބަޔަކު ގަބޫލުކުރާ ގޮތުގައި ޓީމުގެ ތަރި ލިއޮނެލް މެސީ, ޕައުލޯ ޑިބާލާ އަދި ލައުޓާރޯ މާޓިނޭޒްފަދަ މުހިންމު ކުޅުންތެރިންނާއެކު އާޖެންޓީނާ މިފަހަރުގެ މުބާރާތް ކާމިޔާބުކުރުން ގާތެވެ.
