އޯގަސްޓު މަހުގެ ނިޔަލަށް 4.6 ބިލިއަން ރުފިޔާ ޕީއެސްއައިޕީ ޕްރޮޖެކްޓުތަކަށް ޚަރަދު ކުރެވިފައިވޭ
ބޯހިޔާވަހިކަމަށް އެކަނިވެސް 477 މިލިއަން ރުފިޔާއަށް ވުރެ ގިނަ މަޝްރޫއު ހިންގާފައިވޭ
ރައީސް އޮފީހުގެ ތަރުޖަމާނު މިއުވާން މުހައްމަދު
އޯގަސްޓު މަހުގެ ނިޔަލަށް 4.6 ބިލިއަން ރުފިޔާ ޕީއެސްއައިޕީ ޕްރޮޖެކްޓުތަކަށް ޚަރަދު ކުރެވިފައިވާކަން ސަރުކާރުން ހާމަކޮށްފިއެވެ.
ބުރާސްފަތި ދުވަހު ރައީސް އޮފީހުގައި އޮތް ނޫސްވެރިންގެ ބައްދަލުވުމުގައި ރައީސް އޮފީހުގެ ތަރުޖަމާނު މިއުވާން މުޙައްމަދު ވިދާޅުވީ، ސިއްޙީ ދާއިރާއިންވެސް 28 ޕްރޮޖެކްޓެއް ނިމި، އިތުރު ގިނަ ޕްރޮޖެކްޓުތަކެއްގެ މަސައްކަތް މިހާރުވެސް ކުރިއަށްދާ ކަމަށެވެ. އެގޮތުން ތަރައްޤީގެ މަޝްރޫއުތައް ހުރިހާ ރަށެއްގައިވެސް ކުރިއަަށްދާކަން މިއުވާން ފާހަގަ ކުރެއްވިއެވެ.
މިއުވާން ވިދާޅުވީ، ދުނިޔޭގެ އިޤްތިސާދަށް ކުރަމުންދާ އަސަރު ރާއްޖޭގެ މަޝްރޫއުތަކަށްވެސް ކުރާ ކަމަށެވެ. އެގޮތުން ތަކެތި ގެނައުމުގައި ހުރި ގޮންޖެހުންތަކާއި ތަކެތީގެ އަގު ބޮޑުވުން ފަދަ ކަންކަން ފާހަގަ ކުރެވޭކަމަށް މިއުވާން ވިދާޅުވިއެވެ.
އޯގަސްޓު މަހުގެ ނިޔަލަށް 4.6 ބިލިއަން ރުފިޔާ ޕީއެސްއައިޕީ ޕްރޮޖެކްޓުތަކަށް ޚަރަދު ކުރެވިފައިވާކަން މިއުވާން ފާހަގަ ކުރެއްވިއެވެ. އޭގެ ތެރޭގައި ބޯހިޔާވަހިކަމަށް އެކަނިވެސް 477 މިލިއަން ރުފިޔާއަށް ވުރެ ގިނަ މަޝްރޫއު ހިންގާފައިވާއިރު، ބިން ހިއްކުމާއި، މަގު ހެދުމުގެ 718.2 މިލިއަން ރުފިޔާގެ މަޝްރޫއު ހިންގާފައިވެއެވެ.
ފިނޭންސް މިނިސްޓްރީން އާންމުކޮށްފައިވާ ތަފާސްހިސާބުތަކުން ދައްކާގޮތުގައި މިދިޔަ އަހަރުގެ މި މުއްދަތުގައި ހިންގާފައިވަނީ 3.1 ބިލިއަން ރުފިޔާގެ މަޝްރޫއެވެ.
ސަރުކާރުން އާންމުކުރި މައުލޫމާތުތަކަށް ބަލާއިރު، މިހާތަނަށް އައިއިރު ދައުލަތުން ކުރި ޚަރަދު ވަނީ 24.5 ބިލިއަން ރުފިޔާއަށްވުރެ މައްޗަށް އަރާފައެވެ. އޭގެ ތެރޭގައި ރިކަރަންޓް ޚަރަދުގެ ގޮތުގައި 17.9 ބިލިއަން ރުފިޔާ ހިމެނެއެވެ. އަދި ކެޕިޓަލް ޚަރަދުގެ ގޮތުގައި 6.6 ބިލިއަން ރުފިޔާ ހިމެނެއެވެ.
