ހޯހޯއެވެ! ބޮޑު ޚަރަދު ކޮށްފައި ވައުދު ފުއްދުނު ވަރު ބަލަން އަންނާނެ ކަމެއްނެތް.

ނޫސްވެރިކަން ތަޅުއެޅުވުމުގެ ބިލެއް ފާސްކުރީ މުއިއްޒުގެ ވައުދުތައް ނުފުއްދޭ ވާހަކަ ދައްކާތީއެވެ. ނޫސްވެރިން ރަށްރަށަށް ދިއުމުން އެމީހުން ކިޔައިދޭ ވާހަކަތައް ގެނެސްދޭތީ ހަޖަމް ނުވެގެންނެވެ. ރަށުގައި އެއްވެސް މަޝްރޫއެއް ނުހިނގާތީ އެވާހަކައެވެ. ކުރިން ކުރަމުން އައި ކަންކަން ހުއްޓިފައިވާތީ އެވާހަކައެވެ. ރައްޔިތުން ނުކުމެ އިހުތިޖާޖް ކުރަނީ އެކަންކަން ނުހިނގައިގެން ކަމެވެ. ކުރަން ވިދާޅުވި ކަންކަން ދިމާ އިދިކޮޅަށް ބަދަލު ކުރައްވާތީ އެކަމާ ހިތްހަމަ ނުޖެހުމުގެ ޝުއޫރުތަކެވެ. ބޭސް ނުލިބޭ ވާހަކައެވެ. ޓީޗަރުން ހަމަނުވާ ވާހަކައެވެ. ސިޔާސީ ގޮތުން ބާރު ފޯރުވައި ސްކޫލްތައް ހިންގަންތިބި މީހުން ބަދަލު ކުރާތީ ބެލެނިވެރިން ނުކުމެ ސްކޫލްތަކުގައި ތަޅުއަޅުވާ ވާހަކައެވެ. ތަކެތީގެ އަގު ބޮޑުވެ އާއްމު ހާލަތު ދަށްވި ވާހަކައެވެ. ރަށުގައި އަނބިދަރިން ބައިތިއްބާފައި ރިސޯޓްތަކުގައި މަސައްކަތްކުރާ ފިރިންނަށް ޑޮލަރުން ދިން މުސާރަ ދިވެހި ރުފިޔާއިން ދޭން ފެށީމާ ލިބޭ އެއްޗެއް އިންތިހާއަށް މަދުވި ވާހަކައެވެ. މިހެންގޮސް ކިޔާނެ ކަމެއް ނެތެވެ. ބިލިއަނުން ބިލިއަނުން ދިން ބަޖެޓް ހުސްވެ އިތުރަށްވެސް ޚަރަދު ކުރިއިރު ތަރައްގީގެ ޚަރަދަށް އެއިން ހޭދަކުރީ ކުޑަ މިންވަރެކެވެ. 2025ވަނަ އަހަރަށް އެކުލަވައިލައިފައިވާ ބަޖެޓުގައި ޕަބްލިކް ސެކްޓަރ އިންވެސްޓްމަންޓް ޕްރޮގްރާމް، ޕީއެސްއައިޕީއަށް 12.4 ބިލިޔަން ރުފިޔާ ބަޖެޓުކޮށްފައިވެއެވެ. އެކަމަކު މިއަހަރުގެ މިހާތަނަށް މިފަދަ ޕްރޮގްރާމްތަކަށް ހޭދަކޮށްފައިވަނީ އެންމެ 3.4 ބިލިޔަން ރުފިޔާއެވެ. އަހަރު ދެބަޔަށްވުރެ ބޮޑުވެ އަހަރުގެ ފަހުކޮޅަށް އެޅެންދާއިރު ކަނޑައެޅި ބަޖެޓުން ހޭދައެކުރެވުނީ ހަތަރުބައިކުޅައެއްބައެވެ. ތަރައްގީގެ ދުވަލި ހުރި މިންވަރު ހާމަވާ މިއީ ސަރުކާރުގެ ތަފާސް ހިސާބުން ލިބިދޭ ހެއްކެވެ. ކަމުނުދިޔައީ ނޫސްވެރިންނާ ސޯޝަލް މީޑިޔާގައި މިވާހަކަތައް ދައްކާތީއެވެ. އިންތަރވިއު ތަކާއި ޝުއޫރުތައް ގެނެސްދޭތީއެވެ.

މިހާ ތަފްސީލްކޮށް މިކަންކަން ގެނެސްދިނުން ކަމުނުދިޔަ ބަޔަކު އެފޮނުވަނީ މުއިއްޒުގެ ވައުދުފުއްދުނު މިންވަރު ބަލަން ރަށްރަށަށް ސިޔާސީ ވަޒީފާތަކުގައި ގެންގުޅޭ ކުދިންކޮޅެވެ. ކަމެއް ނުކުރެވުނު ތާނގައި އަނެއްކާ އަނެއް ބޮޑު ޚަރަދެވެ. އެމީހުންގެ ޓިކެޓެވެ. ލޯންޗު ޚަރަދެވެ. ރަށްރަށަށްގޮސް ތިބުމާއި ކެއިންބުއިމުގެ ޚަރަދެވެ. އެމީހުންނާއެކު ގެންދާ ސިވިލް މީހުންނަށް ދޭންޖެހޭނެ އިނާޔަތާއި އިތުރުގަޑި ފައިސާއެވެ. އަނެއްކާވެސް އަނެއް ފައިސާގަނޑު ރައްޔިތުންގެ ބަޖެޓުން އެކަމަށް ހޭދަކުރާންވީއެވެ.

ހަނދާނަށް އަންނަނީ ތަންކޮޅެއް ކުރީގެ ވާހަކައެކެވެ. ރަށްރަށުގެ ކަންކަން ކުރާން ހަވާލުކޮށްފައިހުރި ވަޒީރެއްގެ ވާހަކައެވެ. ކަންކަން ކުރާން މާގިނަ ކޮމެޓީއެއް ހެއްދެވި ވަޒީރެކެވެ. އެކަން ބޮޑުވެގެން އެންގެވިކަމަށް ވަނީ ކޮމެޓީތައް މަދުކޮށް ކަމެއް ކުރެއްވޭތޯ އުޅުއްވުމަށެވެ. ޖަވާބުގައި ވިދާޅުވިކަމަށްވަނީ ކޮމެޓީތައް މަދުކުރުމުގެ ކަންކަން ބަލަހައްޓަވަން ކޮމެޓީއެއް ނަގައިގެން އެކަން ކުރައްވާނެ ކަމަށެވެ.

ކޮންމެއަކަސް ކުރާން މިއުޅެނީ އޭގެ ކަމެކެވެ. ވައުދުތައް ފުއްދިފައިވާ މިންވަރު ބަލާކަށް ރަށްރަށަށް ދާކަށް ނުޖެހެއެވެ. ކަމެއް ކުރިއްޔާ ކުރިކަން އެނގޭކަށް މާގިނައިރެއް ނަގާކަށްވެސް ނުޖެހެއެވެ. ކޮންމެ ރަށެއްގައިވެސް ކައުންސިލެއް އެބައޮތެވެ. އެކައުންސިލްތަކުގެ ބާރުވެރިކަން އޮތީ މާލޭގައި ހުރި އެލްޖީއޭ އަތުގައެވެ. ބުނިއްޔާ ބުނި މައުލޫމާތެއް އެމީހުން ވަގުތުން ވަގުތަށް ބަސްބުނާހިނދުން ފޮނުވާން ޖެހޭނެއެވެ. އަމުދުން އެވެރިންނަކަށް އެލްޖީއޭއިން ނުބުނާ ގޮތަކަށް ކުޑަވައި އިނގިލިވެސް ހިއްލައެއް ނުލެވޭނެއެވެ. އެހެންކަމުން ރަށެއްގައި ވިއްޔާވީ ވައުދެއްގެ އެންމެފަހުގެ އަދާހަމަ ކައުންސިލްތަކަށް ނޫން ބަޔަކަށް ނޭނގޭނެއެވެ. ފުރަފުރައިގެން ރަށްރަށަށް މީހުން ފޮނުވުމުގެ ބޭނުމެއް ނެތެވެ. ތަރައްގީގެ ގާބުރިއެއް ބާއްވާލިއަސް އެވެރިންނަށް އެނގޭނެއެވެ. ޓީމުތައް ރަށްރަށަށް އައުމުގެ ކުރިންވެސް އެރަށްރަށުން ބުނާ ކަހަލައެވެ. ހޯހޯއެވެ. ކޮންމެހެން މިތަނަކަށް އަންނާނެ ކަމެއް ނެތެވެ. އެއްވެސް ކަމެއް ނުކޮށް އަދި ކުރަމުން އައި ކަންކަންވެސް ހުއްޓާލާފައި ދެންވެސް ބޮޑެތި ޚަރަދު ކޮށްގެން މިރަށްރަށަށް އަންނާނެ ކަމެއް ނެތެވެ. އަހަރެމެން ލޭ މައްޗަށް ދިއުން ނޫން ކަމެއް ވާނެ ހެނެއް ހީއެއް ނުވެއެވެ. ޕްރެޝަރު މައްޗަށް އަރައި ޖަޒްބާތުގައި ޖެހި ތިޔަކުދިންގެ ފަހަތުން ދުވާކަށް އަހަރެމެނެއް ބޭނުމެއް ނޫނެވެ. ހޯހޯއެވެ. އަންނާނެ ކަމެއް ނެތެވެ.