ޗެލްސީގެ ކުރީގެ ޑިފެންޑަރު ރަމިރޭސް ފުޓުބޯޅަ ކުޅުން ހުއްޓާލިކަން ރަސްމީކޮށް އިއުލާންކޮށްފިއެވެ.
ޗެލްސީގެ އިތުރުން ބްރެޒިލްގެ ޤައުމީ ޓީމަށް ވެސް ކުޅެފައިވާ ރަމިރޭސް ފުޓުބޯޅަ ކުޅުން ހުއްޓާލިކަން ހާމަކޮށްފައިވަނީ އޭނާގެ އިސްޓަގްރާމް ޕޯސްޓެއްގައެވެ. ރަމިރޭސް ވަނީ އޭނާ ކުޅެފައިވާ ކުލަބުތަކުގެ އިތުރުން ބްރެޒިލްގެ ޤައުމީ ޓީމަށް ވެސް ޝުކުރު އަދާކޮށްފައެވެ. މީގެ އިތުރުން އޭނާ ބުނީ ފީފާ ވޯލްޑް ކަޕްގައި ކުޅުމަކީ އޭނާގެ ވަރަށް ބޮޑު ހުވަފެނެއް ކަމަށެވެ. އެހެންކަމުން ބްރެޒިލާއެކު ދެ އަހަރުގެ ވޯލްޑް ކަޕެއްގައި ކުޅެލުމުގެ ފުރުސަތު ލިބުނީތީ އުފާވާ ކަމަށެވެ.
މީގެ އިތުރުން އޭނާ ބުނީ ފުޓުބޯޅައިގައި އޭނާ އަށް ހޯދުނު ހުރިހާ ކާމިޔާބެއްގެ ފަހަތުގައި ތިބި ކަމަށްޓަކައި، އޭނާގެ މައިންބަފައިންނާއި، އާއިލާގެ މެމްބަރުން އަދި ސަޕޯޓަރުންނަށް ޝުކުރު އަދާ ކުރަން ބޭނުންވާ ކަމަށެވެ.
އުމުރުން 35 އަހަރުގައި ރަމިރޭސް ކުޅުން ހުއްޓާލިކަން ހާމަކުރިއިރު، އެންމެ ފަހުން އޭނާ ކުޅުނީ ބްރެޒިލްގެ ޕަލްމެއިރާސް އަށެވެ. އެ ކުލަބުގެ އިތުރުން ވެސް އޭނާ ވަނީ ގިނަ ކުލަބުތަަކަށް ކުޅެފައެވެ. އޭގެ ތެރޭގައި ޗެލްސީ އާއި ބެންފީކާ ފަދަ ކުލަބުތައް ހިމެނެއެވެ. ރަމިރޭސް ވަނީ ބްރެޒިލްގެ ޤައުމީ ޓީމަށް ޖުމުލަ 52 މެޗު ކުޅެދީ، ހަތަރު ލަނޑު ޖަހާފައެވެ.
