އަނިޔާއަށްފަހު ބެންޒިމާ ރެއާލްގެ ތަމްރީނުތަކަށް ނުކުމެއްޖެ
އާދިއްތަ ދުވަހުގެ މެޗުގައި ފެނުމުގެ ފުރުޞަތު ބޮޑު
ބެންޒިމާ ބުދަ ދުވަހު ޕްރެކްޓިސްއަށް ނުކުމެ: ފޮޓޯ-ރެއާލް މެޑްރިޑް
ރެއާލް މެޑްރިޑްގެ ކެޕްޓަން ކަރިމް ބެންޒިމާ އަނިޔާއަށްފަހު ޕްރެކްޓިސްއަށް ނުކުމެއްޖެއެވެ.
ޔޫރަޕްގައި މިހާރުހުރި އެންމެ މޮޅު ފޯވާޑް ބެންޒިމާއަށް އަނިޔާވީ ޗެމްޕިއަންސްލީގުގައި ސެލްޓިކްއާ ވާދަކުރި ފުޓުބޯޅަ މެޗުގައެވެ. ބެންޒިމާ ނެތި ދިޔަ ދެހަފްތާގެ ތެރޭގައި ރެއާލްގެ ޒުވާން ކުޅުންތެރިން ވަނީ ތަފާތު ދައްކާ ބެންޒިމާ ނެތުމުގެ އުނިކަން ފޫބައްދާފައެވެ. ކަމަވިންގާއާއި, އައުރެލިން ޗުއަމެނީއާއި, ރޮޑްރީގޯއާއި, ފެޑެރީކޯ ވަލްވާޑޭއާއި, ވިނީޝިއުސް ޖޫނިއަރ ގުޅިގެން ރެއާލްގެ އެޓޭކް ވަރުގަދަ އެޓޭކެއްގެ ގޮތުގައި ވަނީ ދަމަހައްޓާފައެވެ. އެކަމަކު ބެންޒިމާ އެނބުރި އައުން ވެގެންދާނީ ރެއާލް މެޑްރިޑަށް ލިބޭނެ ވަރަށްބޮޑު ހިތްހަމަ ޖެހުމަކަށެވެ.
ބެންޒިމާ ބުނީ ބުދަ ދުވަހު ޓީމްގެ ފަރިތަކުރުންތަކަށް ނުކުތަސް އޭގެކުރިންވެސް ފިޓްނަސްއަށް އައީ މަސައްކަތްކުރަމުންކަމަށެވެ. އަދި އާދިއްތަ ދުވަހުގެ މެޗަށް ކެތްމަދުވެފައި ހުރިކަމަށެވެ. އޮކްޓޯބަރު 16 ވަނަ ދުވަހު ކުޅޭ ކްލެސިކޯ މެޗަށް ބެންޒިމާ ފިޓްވުމަކީ ފުޓްބޯޅަ ސަޕޯޓަރުންނަށްވެސް އޮތް ބޮޑު ހިތްހަމަޖެހުމެކެވެ.
