އާންމު ގަވާއިދުތަކުގެ ގާނޫނުގައިވާ ބައެއް ގަވާއިދުތަކަށް އަމަލުކުރުން 15 ވަނަ ފަހަރަށް ފަސްކޮށްފި

އާންމު ގަވާއިދުތަކާއި ބެހޭ ޤާނޫނުގެ ޖަދުވަލު 1 އަދި 2 ގައި ބަޔާންކޮށްފައިވާ ގަވާއިދުތަކަށް އަމަލުކުރުމުގެ މުއްދަތު 15 ވަނަ ފަހަރަށް ފަސްކުރުމަށް ރައްޔިތުންގެ މަޖިލީހުން ފާސްކޮށްފިއެވެ.

ރައްޔިތުންގެ މަޖިލީހުގެ ބުދަ ދުވަހުގެ ޖަލްސާގައި ވަނީ އާންމު ގަވާއިދުތަކާބެހޭ ޤާނޫނުގެ ޖަދުވަލު 1 އަދި 2 ގައި ބަޔާންކޮށްފައިވާ ގަވާއިދުތަކަށް އަމަލުކުރުމުގެ މުއްދަތު އަންނަ އަހަރުގެ މެއި މަހުގެ ނިޔަލަށް އިތުރުކުރުމަށް ފާސްކޮށްފައެވެ. މިގޮތަށް ފާސްކޮށްފައިވަނީ ވޯޓުގައި ބައިވެރިވެވަޑައިގެންނެވި 42 މެމްބަރުންގެ އިއްތިފާގުންނެވެ. އެންމެފަހުން އިތުރުކުރި މުއްދަތު ހަމަވެފައިވަނީ މިއަހަރުގެ ސެޕްޓެމްބަރ މަހުގެ ނިޔަލަށެވެ.

އާންމު ގަވާއިދުތަކާއި ބެހޭ ޤާނޫނުގެ ޖަދުވަލު 1 އަދި 2 ގައި ބަޔާންކޮށްފައިވާ ގަވާއިދުތަކަށް އަމަލުކުރުމުގެ މުއްދަތު އިތުރުކުރުމަށް ގަވާއިދު ކޮމިޓީން މިކަން ދިރާސާކުރުމަށްފަހު ނިންމާފައިވަނީ ޖަދުވަލު 1 ގައި ހިމެނޭ 6 ގަވާއިދެއް އުނިކުރުމަށެވެ. އަދި ޖަދުވަލު 2 ގައި ހިމެނޭ 2 ގަވާއިދެއް އުނިކުރުމަށެވެ.

އަމަލުކުރުމުގެ މުއްދަތު އިތުރުކޮށްފައިވަނީ ޖަދުވަލު 1 ގައި ހިމެނޭ 10 ގަވާއިދަކަށާއި ޖަދުވަލު 2 ގައި ހިމެނޭ 1 ގަވާއިދެއް ހިމެނޭގޮތަށް ޖުމްލަ 11 ގަވާއިދަކަށެވެ.

ޖަދުވަލު 2 ގައި ހިމެނޭ މުއްދަތު އިތުރުކުރުމަށް ހުށަހަޅާފައިވާ ގަވާއިދަކީ އަބުރާބެހުމުގެ ސަބަބުން ލިބޭ ގެއްލުމުގެ ބަދަލު ނަގައިދިނުމުގެ ގަވާއިދެވެ. ކޮމިޓީން ނިންމާފައިވަނީ މިގަވާއިދާ ގުޅޭ ބިލު ވީހާވެސް އަވަހަކަށް ރައްޔިތުންގެ މަޖިލީހަށް ފޮނުއްވައިދިނުމަށް އެޓާނީޖެނެރަލް އޮފީހުގައި ދެންނެވުމަށްވެސް ވަނީ ފާސްކުރައްވާފައެވެ.

މިއީ މިހާރު އަމަލުކުރަމުން އަންނަ އައު ގާނޫނުއަސާސީ އައުމާއެކު ކުރިން އަމަލުކުރަމުންދިޔަ ގަވާއިދުތަކަށް އަމަލުކުރުމުގެ ގާނޫނީ ބާރެއް ދިނުމަށްޓަކައި އެކުލަވާލާފައިވާ ގާނޫނެކެވެ. މި ޤާނޫނުގެ ދަށުން ހުރި ގަވާއިދުތަކަށް އަމަލުކުރަމުން އަންނާނީ އެގަވާއިދަކާއި ގުޅުންހުރި ގާނޫނެއް ވުޖޫދުވަންދެންނެވެ. އެގާނޫނެއް ވުޖޫދުވަންދެން ގަވާއިދުތަކަށް އަމަލުކުރުމުގެ މުއްދަތު އަންނަނީ އިތުރުކުރަމުންނެވެ.