ސަރުކާރުން އަތޮޅުތަކުގައި ޓާފް ފުޓްބޯޅަ ދަނޑުތައް އަޅަމުންދާތީ އޮތް ބޮޑު ކަންބޮޑުވުމެއް އެފްއޭއެމްގެ ޓެކްނިކަލް ޑައިރެކްޓަރު އަހުމަދު ޝަރީފް (ޑުންގާ) ފާޅުކުރައްވައިފިއެވެ.
އަތޮޅުތަކުގައި ސަރުކާރުން ގިނަ ޓާފް ދަނޑުތަކެއް އަޅަމުންދާކަން ފާހަގަކުރައްވާ ޑުންގާ ވިދާޅުވީ އޭގެ ރަނގަޅު އަސަރަށްވުރެ ނުރަނގަޅު އަސަރު ފެންނަމުންދާކަމަށެވެ. އެކަމަކު އެއީ ދަނޑު އަޅާތީ ނޫންކަމަށާއި, ދަނޑުތައް ބޭނުންކުރާ ގޮތުގެ ސަބަބުން ހުރި ކަންބޮޑުވުންތަކެއްކަން ޑުންގާ ފާހަގަކުރެއްވިއެވެ. ޑުންގާ ސުވާލުކުރެއްވީ އެދަނޑުތައް އެޅުމުން އަންނާނެ ބަދަލުތަކާމެދުގައެވެ.
އަޅުގަނޑަށް ފެނުނީ އެއީ ކުދިންގެ ޑިވެލޮޕްމަންޓް ދަށްވެގެންދިޔަ ކަމެއްގެ ގޮތުގައި. ދަނޑުއެޅީމަ ޝެޑިއުލް އެބަހަދާ. ކައުންސިލުން ވަކި ގަޑިތަކެއް މިނިންމަނީ. އެހެން ނިންމީމަ އެއްކަލަ އޭދަފުށީގެ ވެލިދަނޑުގައި ކުޅެކުޅެ ތިބިކުދިން ވަކި ގަޑިއެއްގައި އެކަނި ދަނޑަށް މިއެރެނީ. އެކުއްޖާ ކުޅޭ ވަގުތު މަދުވަނީ. މިކަހަލަ ކަންތައްތަކެއް އެބައާދޭ.އަހުމަދު ޝަރީފް (ޑުންގާ)/ އެފްއޭއެމްގެ ޓެކްނިކަލް ޑައިރެކްޓަރު
ޑުންގާ ވިދާޅުވީ ޓާފް ދަނޑުނެތީމަ ބޭނުން ކޮންމެ ވަގުތަކު ގޮސް ކުދިން ކުޅެން ގޮސްތިބޭކަމަށާއި, އެކަމަކު ޓާފް ދަނޑެއް ހެދީމަ އެތަނަށް ނޭރޭކަމަށެވެ. ޓާފް ދަނޑުތައް އެއީ ރީއްޗަށް ބާއްވާ ތަނެއްތޯ ސުވާލު އުފައްދާ ޑުންގާ ވިދާޅުވީ ކުޅުނަކަސް ދަނޑުތައް ހަލާކުނުވާނެކަމަށެވެ. ގިނައިން ކުޅުނު ވަރަކަށް ވާނީ ރަނގަޅު ކަމަށާއި, ހަލާކުވަނީ ހަލާކުވާންޖެހޭ ގޮތަށް ކަންތައްކުރުމުން ކަމަށް ޑުންގާ ވިދާޅުވިއެވެ. ރާއްޖޭގެ ފުޓްބޯޅަ ކުރިއަށްގެންދެވޭނީ އަތޮޅުތަކުގައި ތިބި ކުދިންނަށް ގިނައިން ކުޅެން ފުރުޞަތު ދީގެން އެތަންތަނުގައި މުބާރާތްތަކާއި އެއްޗިހި ބޭއްވިގެންކަން ޑުންގާ ފާހަގަކުރެއްވިއެވެ. އަދި އަތޮޅުތެރެއަށް ޑިވެލޮޕްމަންޓް އައިސްގެން ނޫނީ މިހާރު އޮތް ލެވެލްއިން ފުޓްބޯޅަ ނެގުމަކީ ފަސޭހަކަމެއްނޫންކަމަށް ވިދާޅުވިއެވެ.
