ތަރިކަ ދެމެހެއްޓުމަށް އަމިއްލަ ޖީބު ހުސްކޮށްލުމުގައި ލާމަސީލު ހައްލާކު

ސޫރިޔާގެ ވެރިރަށް ދިމިޝްކުން ލޮލުގައި އަޅައިގަތް މަންޒަރެކެވެ. ދިވެހިން ޒަމާނުއްސުރެ ކުރަމުން އަންނަ ލިޔެލާޖެހުމާއި ވަޑާމުގެ މަސައްކަތުގައި ބޭނުން ކޮށް އުޅޭ ޒާތުގެ ލޭތު ނުވަތަ ޢަރަބިން ކިއާ ގޮތުން ނަމަ މުޚައްރިޟާ މެޝިނެއްގެ މައްޗަށް ގުދު އަޅައިގެން ލަކުޑި ގަނޑެއް ފައިން ހިފަހައްޓައިގެން ބުރަ މަސައްކަތެއްގައި އަވަދިނެތި، މީހަކު އުޅެމުން ދިޔަ މަންޒަރެވެ. އެމީހަކަށް ބަލާލުމުންވެސް އެއީ ދޮށީ ޢުމުރުގެ ދުވަސްތައް ގުނަމުންދާ މީހެއްކަން ޔަޤީންވެއެވެ. އޭނާގެ އަތްތެރި މަސައްކަތުގެ ހުނަރުންވެސް، އޭނާއަށް ލިބިފައިވާ ތަޖުރިބާއަށް ހެކިދެއެވެ. އެ މީހަކީ، މައުމޫން އަލް-ހައްލާކްއެވެ. ސޫރިޔާގެ ޤަދީމީ މަސައްކަތްތެރިކަމުގެ މައިދާނުގައި އަދިވެސް ދެމި ހުރި، ހިތްވަރުގަދަ، ޤައުމީ ދަރިއެކެވެ.

އަލަތު ދަރިފުޅަށް ވުރެ ވެސް ކުރިން އޭނާއަށް ލިބުނު ލޭތު މޭޝިނަކީ، ހައްލާކު ބުނާ ގޮތުގައި އޭނާގެ ރޫޙެވެ. އެ މިޝަނަކީ، އޭނާގެ ހިތުގެ އުފަލާ ނިހާޔަތަށް ގުޅިފައިވާ މެޝިނެކެވެ.

ހައްލާކުގެ މަސައްކަތުގެ އަސާސަކީ ސޫރިޔާގެ ޤަދީމީ ތަރިކައެވެ. އޭނާގެ އުފެއްދުންތެރި ޚިޔާލާއި ގައިގައި ހުރި ބާރެއް ބޭނުންކޮށްގެން އުފައްދަމުން ދަނީ، ސޫރިޔާގެ ކާބަފައިން ބޭނުންކޮށް އުޅުނު ޒާތުގެ ކޮފީ މުގުރާ މެޝިނާއި، ގުޑުގުޑާގެ އިތުރުން، ތަބަކާއި މިއުޒިކް ކުޅޭ އެކި ކަހަލަ ސަމާނުތަކެވެ. އެ ސަމާނުތައް އޭނާ އުފައްދަނީ އެކި ސައިޒަށެވެ. އެއީ އެންމެ ކުޑަ ޖަގަހަތަކުގައި ދިރިއުޅެން މަޖުބޫރުވެފައި ވާ މީހުންނަށްވެސް، އެ ފަދަ ތާރީޚި ތަކެތި ދައްކާލަން ބެހެއްޓޭނެ ކަން ކަށަވަރު ކުރުމުގެ ގޮތުންނެވެ.

ސޫރިޔާގައި ކުރި ވަރުގަދަ ހަނގުރާމައިގެ އަސަރު، ހައްލާކުގެ މަސައްކަތަށްވެސް ވަނީ ފޯރާފައެވެ. އޭގެ އެންމެ އިންތިހާއަށެވެ.

ހައްލާކު ބުނާ ގޮތުގައި އޭނާއަކީ ޒަމާންވީ ލޭތު މެޝިން ބޭނުން ކުރާ މަދު މީހުންގެ ތެރޭގައި ގުނާލެވޭނެ މީހެކެވެ. މީގެ ކުރިން ޔަރްމޫކް ކޭމްޕުގައި ވަރކްޝޮޕެއް ހިންގި ނަމަވެސް، ހަނގުރާމައިގެ ތެރޭގައި އެތަން ސުންނާފަތިވި ފަހުން، މިއަދު ހައްލާކުގެ ވަރކްޝޮޕެއްވެސް ނެތެވެ. އޭނާ މަސައްކަތް ކުރަނީ އެކުވެރިއެއްގެ ފިހާރައެއްގައެވެ. އުފެއްދުންތައް ދައްކާލަނީ އެކި މައުރަޒުތަކުގައެވެ.