ދުނިޔޭގެ މަޝްހޫރު ދީނީ އިލްމުވެރިޔާ މުފްތީ އިސްމާއިލް ބިން މޫސާ (މުފްތީ މެންކް)، ރާއްޖެ ވަޑައިގަންނަވަން ހަމަޖެހިފައިވާ ކަމަށް އިސްލާމިކް މިނިސްޓްރީން ބުނެފިއެވެ.
އެ މިނިސްޓްރީން ބުނި ގޮތުގައި މުފްތީ މެންކް ރާއްޖެއަށް ވަޑައިގަތުމަށް ހަމަޖެހިފައިވަނީ އަންނަ އޮކްޓޯބަރު މަހުގެ 28 އިން 31 އަށެވެ. މި މުއްދަތުގައި މުފްތީ މެންކް މާލޭގެ އިތުރުން ފުވައްމުލައްް ސިޓީ އާއި އައްޑޫ ސިޓީއަށް ވެސް ވަޑައިގަތުމަށް ވަނީ ހަމަޖެހިފައެވެ.
މި ދަތުރުފުޅުގައި މުފްތީ މެންކް ދަރުސް ދެއްވަން ހަމަޖެހިފައިވާ ކަމެއް އަދި ޔަގީންވެފައި ނުވެއެވެ. ނަމަވެސް މީގެ ކުރިން ކުރެއްވި ދަތުރުފުޅުގައި ވެސް އޭނާ ވަނީ ދަރުސް ދެއްވާފައެވެ.
މި ދަތުރުފުޅާ ގުޅޭ އިތުރު ތަފްސީލެއް އިސްލާމިކް މިނިސްޓްރީން ދީފައި ނުވެއެވެ.
މުފްތީ މެންކް އެންމެފަހުން ރާއްޖެ ވަޑައިގަތީ 2020 ވަނަ އަހަރުއެވެ. އެ ދަތުރުފުޅުގައި ދަރުސް ދެއްވީ ހދ. ކުޅުދުއްފުށީގައެވެ. އޭގެ ކުރިން 2016 ވަނަ އަހަރާއި 2015 ވަނަ އަހަރު ވެސް ރާއްޖެ ވަޑައިގެން އެކި މައުލޫތަކަށް ދީނީ ދަރުސް ދެއްވިއެވެ.
