ހައްޖަށް ގޮސް އުޅެނިކޮށް ހުކުރު ދުވަހު ނިޔާވި މީހާ ވަޅުލައިފި
އެމީހާ ނިޔާވެފައިވަނީ ހުކުރު ދުވަހު ދިވެހިރާއްޖެ ގަޑިން އިރުއޮއްސި 18:17 ގައި
ދިވެހި ޙައްޖުވެރިންތަކެއް
ރާއްޖެއިން ހައްޖުގެ އަޅުކަން އަދާކުރަން ގޮސް އުޅެނިކޮށް ހުކުރު ދުވަހު ނިޔާވި މީހާ ވަޅުލައިފިއެވެ.
ނިޔާވެފައިވަނީ މޯލްޑިވްސް ޙައްޖު ކޯޕަރޭޝަން ލިމިޓެޑްގެ ހަވާލުގައި ޙައްޖަށް ދިޔަ ޙައްޖުވެރިޔަކު ކަމުގައިވާ އުމުރުން 72 އަހަރުގެ ދ. މާއެނބޫދޫ، ފިޔާތޮށިގެ، ޢަލީ ޙަސަން އެވެ. އަލީ ހަސަން ނިޔާވީ މައްކާގެ ސަޢޫދީ ޖާމަން ހޮސްޕިޓަލުގައި ފަރުވާދެމުން ދަނިކޮށް ހުކުރު ދުވަހު ދިވެހިރާއްޖެ ގަޑިން އިރުއޮއްސި 18:17 ގައެވެ.
ހައްޖު ކޯޕަރޭޝަނުން ބުނީ ހޮނިހިރު ދުވަހުގެ އަސްރު ނަމާދަށްފަހު މަސްޖިދުލްހަރަމްގައި މައްޔިތާގެ މައްޗަށް ކަށުނަމާދުކޮށް، މައްކާގެ މަޤްބަރަތުއް ޝުހަދާއުލް ހަރަމްގައި ވަޅުލާފައިވާކަމަށެވެ.
ހޮސްޕިޓަލްގައި ފަރުވާދެމުން ދަނިކޮށް ހައްޖުވެރިއަކު ނިޔާވެފައިވާއިރު ނިޔާވެފައި އޮއްވާވެސް ހައްޖުވެރިއަކު ވަނީ ފެނިފައެވެ. ގެއްލިގެން ހޯދަމުން އަންނަތާ ހަތަރު ދުވަސްފަހުން ނިޔާވެފައިވާ އޮއްވާ ފެނުނީ އުމުރުން 72 އަހަރުގެ ރ. މާކުރަތު، މަލަ، މުޙައްމަދު ނަސީމް ޢަލީ އެވެ.
މީގެއިތުރުން އެހެން ދެ ހައްޖުވެރިއެއްގެ ހާލު ސީރިއަސްވެގެން އަންނަނީ އައިސީޔޫގައި ފަރުވާދެމުންނެވެ.
