އިމާމުން ތަމްރީނުކުރުމަށް ބޭރަށް ފޮނުވަން ސަރުކާރުން އެއްވެސް ހަރަދެއް ނުކުރާ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެއެވެ.
ރައީސް އޮފީހުގައި އޮތް ނޫސްވެރިންގެ ބައްދަލުވުމުގައި ވާހަކަ ދައްކަވަމުން އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވީ އިމާމުން ތަމްރީނުކުރުމުގެ ބަޖެޓް އިތުރުކޮށް އެކަމަށް އެހީތެރިވާން ބޭނުންވާ ކަމަށެވެ. އެކަމަށް ތަރުތީބުތަކެއްވެސް ކުރެވެމުންދާ ކަމަށާއި، މިއަހަރު ކުރިއަށްދަނީ ސަރުކާރުން އެކަށައެޅި ބަޖެޓެއް ނޫން ކަމަށާއި، އެއީ ކުރީ ސަރުކާރުގެ ބަޖެޓް ކަމަށެވެ.
ނަމަވެސް ފުރުސަތުތައް ގައުމުތަކަށް ހޯދުމާއި، މަސައްކަތްކޮށް އެހީ ހޯދުމަކީވެސް ބޮޑުކަމެއް ކަމަށާއި، ކޮންމެ ބުރެއްގައި ވެސް 20 މީހުން ފޮނުވަމުންދާ ކަމަށެވެ. އަދި ތަމްރީނަށް ފޮނުވާ ފަރާތްތަކަށް އެކަމަޑޭޝަން ހޯދުން ފަދަ ކަންކަމަކީ ބޮޑެތި ހަރަދުތަކެއް ކަމަށެވެ.
އަދި އަމިއްލަ އަތުން ހަރަދުކުރާކަމުގެ ޝަކުވާތަކެއް އައިސްފައި ނުވާ ކަމަށް މިނިސްޓަރު ވިދާޅުވިއެވެ.
ނަމަވެސް ރާއްޖެއެމްވީއަށް މައުލޫމާތު ދިން އިމާމަކު ވިދާޅުވެފައިވަނީ، އިމާމުން ތަމްރީނުވުމަށް އަމިއްލައަށް ހަރަދެއް ކުރަން ނުޖެހޭ ކަމަށް އިސްލާމިކް މިނިސްޓަރު ވިދާޅުވި ވާހަކައަކީ ކަނޑައެޅިގެން ދޮގެއް ކަމަށެވެ. އެގޮތުން ރާއްޖެއިން ބޭރަށް އިމާމުން ތަމްރީނު ކުރަން ފޮނުވާ އިރު ޓިކެޓް ނަގަނީ އިމާމުން އަމިއްލައަށް ކަމަށާއި، އެއްވެސް ވަރަކަށް ޕޮކެޓް މަނީއެއް ނުދޭ ކަމަށެވެ. ނަމަވެސް އެހެނިހެން ހަރަދުތައް ކުރަނީ ދާ ގައުމުން ކަމަށާއި، ދިވެހި ސަރުކާރުން ކުރާ އެއްވެސް ހަރަދެއް ނެތް ކަމަށެވެ.
މީގެ އިތުރުން އެންމެ ފަހުން ސައުދީއަށް ދިޔަ އިމާމުންވެސް އަމިއްލަ އަތުން 20،000 ރުފިޔާ ހަރަދުކުރި ކަމަށް ވެސް މައުލޫމާތު ދިން ފަރާތުން ވަނީ ބުނެފައެވެ.
