ތިލަމާލެ ބްރިޖްގެ ޖިއޯ ޓެކްނިކަލް ދިރާސާތަކަށް ގެނެސްފައިވާ ސެލްފް އެލެވޭޓިންގ ޕްލެޓްފޯމް (އެސްއީޕީ)، ވިލިމާލެ ފަރަށް އެރުމުގެ ސަބަބުން ފަރަށް ލިބުނު ގެއްލުމުގެ ތަފްސީލު ރިޕޯޓް ނިމިފައިވާ ކަމަށައި، މިހާރު ކުރިއަށް ދަނީ އެއަށް ޖަވާބު ދާރީވުމުގެ މަރުހަލާ ކަމަށް އެންވަޔަރަމެންޓް ޕްރޮޓެކްޝަން އޭޖެންސީ (އީޕީއޭ) އިން ބުނެފިއެވެ.

"ރާއްޖެއެމްވީ" އަށް މައުލޫމާތުދެއްވަމުން އީޕީއޭގެ ޑިރެކްޓަރު ޖެނެރަލް އިބްރާހިމް ނައީމް ވިދާޅުވީ ކުރިއަށް އޮތް ދެ ތިން ދުވަސް ތެރޭގައި އެ މަރުހަލާ ނިމޭނެ ކަމަށް ލަފާކުރެވޭ ކަމަށެވެ. އޭނާ ވިދާޅުވީ އެ ރިޕޯޓް ބްރިޖުގެ މަސައްކަތްކުރަމުންދާ އެފްކޮންސްއަށް ފޮނުވީމަ އެފްކޮންސް އިން އެއަށް ރައްދުދީފައިވާ ކަމަށާއި ދެން އޮތީ އީޕީއޭ އިން އެ ރިޕޯޓަށް ރައްދު ދިނުން ކަމަށެވެ. އެ މަރުހަލާ ނިމުމުން މި މައްސަލަ އާއި ގުޅިގެން އަޅާނެ ވަކި ފިޔަވަޅެއް އެނގޭނެ ކަމަށް ވެސް އީޕީއޭއިން ބުނެއެވެ. އަދި އެ ހިސާބުން ރިޕޯޓް ވެސް އާއްމު ކުރާނެއެވެ.

މި ޕްލެޓްފޯމް ފަރަށް އެރުމުގެ ސަބަބުން ފަރަށް ލިބުނު ގެއްލުމުގެ ސަރވޭގެ މަސައްކަތް އީޕީއޭއިން ފަށާފައިވަނީ މިމަހުގެ 6 ވަނަ ދުވަހުއެވެ. އީޕީއޭއިން ވަނީ ފަރުގެ ބައެއް ފޮޓޯތައް އީޕީއޭގެ ޓްވިޓަރގައި ހިއްސާކޮށްފައެވެ. އެ ފޮޓޯތަކުން ފެންނަ ގޮތުގައި ޕްލެޓްފޯމް އޮތް ތަނުގައި ފުން ވަޅުގަނޑުތަކެއް ވަނީ ހެދިފައެވެ.

ފަރަށް އެރި ޕްލެޓްފޯމް ފުންކޮށްފައިވަނީ އޮގަސްޓް މަހުގެ 28 ވަނަ ދުވަހު، އެ ޕްލެޓްފޯމް ފަރަށް އެރިތާ 12 ދުވަސް ފަހުންނެވެ. އެ މަސައްކަތް ނުނިމި ލަސްވީ މޫސުން ގޯސްވުމުގެ ސަބަބުން ކަމަށް އެފްކޮންސް އިން ވަނީ ބުނެފައެވެ. އެ ކުންފުނިން ބުނީ މަސައްކަތް ފެށީ މިދިޔަ މަހު 28ގައި ކަމަށާއި އޭރުވެސް މޫސުން ގޯސްކަމަށެވެ. އެހެންނަމަވެސް ޕްލެޓްފޯމް ފަރަށް އެރި ސަރަހައްދު ސާފުކޮށް ނިންމާފައިވަނީ އެންމެ ރަނގަޅު ވަސީލަތްތައް ބޭނުންކޮށްގެން ކަމަށްވެސް އެ ކުންފުނިން ވަނީ ބުނެފައެވެ.

އެ މަޝްރޫއު ހިންގަމުންއަންނަ އިންޑިއާގެ އެފްކޮންސް ކުންފުނިން ކުރިން ބުނީ ޕްލެޓްފޯމް ފުންނުކުރެވި ލަސްވީ މޫސުން ގޯސްވުމުގެ ސަބަބުން ކަމަށެވެ. އަދި ޕްލެޓްފޯމް ވިލިމާލޭ ފަރަށް ބީހެން ދިމާވީ މޫސުން ގޯސްވެ ވައިގަދަވުމާއި ރާޅު ބޮޑުވުމުގެ ސަބަބުން ކަމަށާއި، އެ ހާދިސާ ހިނގީ އެ ސަރަހައްދުގައި ޕްލެޓްފޯމް އަޅާފައި ބޭއްވުމަށް މަސައްކަތް ކުރަމުންދަނިކޮށް ކަމަށްވެސް އެ ކުންފުނިން ބުނެފައިވެއެވެ.