މި ހިނގާ 2022 ވަނަ އަހަރުގެ ފުރަތަމަ 7 މަހުގެ ތެރޭގައި އިމްޕޯޓުގެ އަގުތައް 2 ބިލިއަން ޑޮލަރަށް އަރާފައިވާކަމަށް ފިނޭންސް މިނިސްޓަރު އިބްރާހީމް އަމީރު މިއަދު ވިދާޅުވެއްޖެއެވެ.

މިނިސްޓަރ އެފަދައިން ވިދާޅުވީ އައިޓީއެފްސީއާއެކު އެސްޓީއޯއިން 189 މިލިއަން ޑޮލަރުގެ ކްރެޑިޓް ފެސިލިޓީއެއްގައި ސޮއިކުރުމަށް އާދިއްތަ ދުވަހު ބޭއްވި ރަސްމިއްޔާތުގައި ވާހަކަފުޅުދައްކަވަމުންނެވެ. އަމީރު ވިދާޅުވީ، މިދިޔަ އަހަރު އިމްޕޯޓުގެ އަގުތައް ހުރީ 1.3 ބިލިއަން ޑޮލަރުގައި ކަމަށެވެ. އެހެންކަމުން މިއީ 648 މިލިއަން ޑޮލަރުގެ އިތުރުވުމެއްކަން އަމީރު ވަނީ ފާހަގަކުރައްވާފައެވެ.

މިނިސްޓަރ ވަނީ ކޮވިޑް-19ގެ ބަލިމަޑުކަމަށްފަހު ރާއްޖޭގެ އިގުތިސާދު ވަރަށް ހަލުއިކަމާއެކު ކުރިއަރަމުންދާ ކަމަށްވެސް ފާހަގަކުރައްވާފައެވެ. އެހެންނަމަވެސް ކޮވިޑާއެކު އާ ގޮންޖެހުންތަކާ ކުރިމަތިލާން ޖެހިފައިވާކަމަށް މިނިސްޓަރ ވިދާޅުވިއެވެ.

މީގެ އިތުރުން ރާއްޖޭގެ އިގުތިސާދަށް އާ ގޮންޖެހުންތައް ކުރިމަތިވެފައިވާ ސަބަބުތަކުގެތެރޭގައި، ދުނިޔޭގައި ތަކެތީގެ އަގުތައް އުފުލުމާއި ޔޫކްރެއިން-ރަޝިއާ ހަނގުރާމަ ހިމެނޭކަންވެސް އަމީރު ވަނީ ފާހަގަކުރައްވާފައެވެ. އަމީރު ވިދާޅުވީ، ތަކެތީގެ އަގު އުފުލުމަކީ އެކްސްޓަރނަލް ރިޒަރވްތަކަށާއި ސަރުކާރުގެ ކޭޝްފްލޯއަށް އެކަމުގެ ނޭދެވޭ އަސަރު ފޯރާކަމެއް ކަމަށެވެ.

ހަމައެހެންމެ ސަރުކާރުން ކުރަންޖެހޭ ޚަރަދުތައް ބޮޑުވެ، ކޮވިޑުގެ ތެރޭގައި ދަރަނި ނެގުމުގެ ސަބަބުން ސަރުކާރަށް ވަރަށް ބުރަ ބޮޑުވެފައިވާކަން އަމީރުގެ ވާހަކަފުޅުގައި ފާހަގަކުރެއްވިއެވެ. މީގެ އިތުރުން ކޮވިޑްގެ ސަބަބުން އިގުތިސާދަށް އެންމެ ބޮޑަށް އަސަރުކުރި ގައުމުތަކުގެ ތެރޭގައި ރާއްޖެ ހިމެނޭކަން އެމަނިކުފާނު ވަނީ ފާހަގަކުރައްވާފައެވެ. އެގޮތުން ކޮވިޑާ ގުޅިގެން ރާއްޖޭގެ ޖީޑީޕީ 33 އިންސައްތައް ދަށްވިކަމަށް އަމީރު ވިދާޅުވިއެވެ.