އަސާސީ މުދާ ގަތުމަށް އައިޓީއެފްސީން އެސްޓީއޯއަށް 189 މިލިއަން ޑޮލަރުގެ ކްރެޑިޓް ފެސިލިޓީއެއް
މި އެއްބަސްވުމުގެ ދަށުން ތެލާއި ބޭސް އަދި ކާޑުގެ ބާވަތްތައް ގެންނަން އެހީވާނެ
އައިޓީއެފްސީ އާއި އެސްޓީއޯއާ ދެމެދު އެއްބަސްވުމުގައި ސޮއި ކުރަނީ
ރާއްޖެއަށް ބޭނުންވާ އަސާސީ މުދާ ގަތުމަށް އިސްލާމިކް ޓްރޭޑް ފައިނޭންސް ކޯޕަރޭޝަން (އައިޓީއެފްސީ) އާއި އެސްޓީއޯއާ ދެމެދު 189 މިލިއަން ޑޮލަރުގެ ކްރެޑިޓް ފެސިލިޓީއެއްގައި ސޮއި ކޮށްފިއެވެ.
އާދީއްތަ ދުވަހު ހޮޓެލް ޖެންގައި ބޭއްވި ބައްދަލް ވުމެއްގައި މި އެއްބަސްވުމުގައި އައިޓީއެފްސީގެ ފަރާތުން ސޮއި ކުރެއްވީ އެ ކޯޕަރޭޝަނުގެ ސީއީއޯ ހާނީ ސަލީމަ ސޮންބޮލްއެވެ. އަދި އެސްޓީއޯގެ ފަރާތުން ސޮއި ކުރެއްވީ އެ ކުންފުނީގެ މެނޭޖިންގ ޑިރެކްޓަރ ހުސައިން އަމްރުއެވެ.
އައިޓީއެފްސީ އަކީ އިސްލާމިކް ފައިނޭންސިންގެ ތެރެއިން ވިޔަފަރާތިތަކަށް މާލީ އެހީތެރިކަން ފޯރުކޮށްދެމުން އަންނަ، އިސްލާމިކް ޑެވެލޮޕްމަންޓް ބޭންކް (އައިޑީބީ)ގެ ގޮތްޕެކެވެ. އެ ކޯޕަރޭޝަނުން އެސްޓީއޯއާއެކު ވެފައިވާ 189 މިލިއަން ޑޮލަރު (2.9 މިލިއަން ރުފިޔާ) ގެ އެއްބަސްވުމަކީ ވެސް އިސްލާމިކް ފައިނޭންސްގެ ތެރޭގައި ހިމެނޭ މުރާބަހާ ޓްރޭޑް ފައިނޭންސް ފެސިލިޓީއެއްގެ އެއްބަސްވުމެކެވެ.
މި އެއްބަސްވުމާ ގުޅޭ ގޮތުން އެސްޓީއޯގެ މެނޭޖިންގ ޑިރެކްޓަރު ހުސައިން އަމްރު ވިދާޅުވީ މި އެހީ ލިބިފައިވަނީ ކޮވިޑް-19 އާއި ރަޝިއާ-ޔޫކްރޭން ހަނގުރާމައިގެ ސަބަބުން އިގްތިސާދަށް ބޮޑެތި އަސަރުތަކެއް ކޮށްފައިވާ ދުވަސްވަރެއްގައި ކަމަށެވެ. މި އެހީގެ ސަބަބުން ތެލާއި ކާޑުގެ ބާވަތްތަކާއި މެޑިކަލް ސާމާނާއި ބޭސް އެތެރެ ކުރުމަށް ފަސޭހަވެގެންދާނެ ކަމަށް ވެސް އޭނާ ވިދާޅުވިއެވެ.
އަމްރު ވިދާޅުވީ ރަޝިއާ-ޔޫކްރޭން ހަނގުރާމައިގެ ސަބަބުން ދުނިޔޭގައި ތަކެތީގެ އަގުވެސް ވަރަށް ބޮޑަށް އުފުލިފައިވާއިރު އައިޓީއެފްސީގެ ފެސިލިޓީ، އެ ގޮންޖެހުންތަކުން އަރައިގަންނަންނަން ލިބޭ އެހީއަކަށް ވެގެންދާނެ ކަމަށެވެ.
އެސްޓީއޯ އާއި އައިޓީއެފްސީއާ ދެމެދު މިދިޔަ ޖޫން މަހު ވެސް ވަނި ޓްރޭޑް ފައިނޭންސް ފެސިލީޓެއްގައި ސޮއި ކޮށްފައެވެ. އެ އެއްބަސްވުމުގެ ދަށުން އައިޓީއެފްސީން އެސްޓީއޯއަށް ދީފައިވަނީ 175 މިލިއަން ޑޮލަރުގެ އެހީއެކެވެ. މިއީ ވެސް ތެލާއި ކާޑާއި ބޭސް އެތެރެކުރުމަށް ދިން އެހީއެކެވެ.
ދިވެހިރާއްޖެއަކީ އޯއައިސީ މެމްބަރު ޤައުމެއްގެ ހައިސިއްޔަތުން މެދުނުކެނޑި އައިޓީއެފްސީގެ ފަންނީ އަދި މާލީ އެހީތެރިކަން ލިބެމުންދާ ޤައުމެކެވެ. އެގޮތުން އައިޓީއެފްސީން ވަނީ މީގެކުރިންވެސް އެސްޓީއޯއަށް މިފަދަ ފެސިލިޓީސް މެދުވެރިކޮށް ފައިނޭންސް ހަމަޖައްސާދީފައެވެ. އައިޓީއެފްސީގެ މައިގަނޑު މަޤްސަދަކީ އޯއައިސީ މެމްބަރު ޤައުމުތަކުގެ ދެމެދުގައި އޮންނަ ވިޔަފާރީގެ ގުޅުން ރަނގަޅުކޮށް އެޤައުމުތަކުގެ އިގުތިސާދު ކުރިއެރުވުމަށް އެހީތެރިވެދިނުމެވެ.
އާދިއްތަ ދުވަހު ވެވުނު އެއްބަސްވުމުގައި ސޮއި ކުރުމަށް ހޮޓެލް ޖެންގައި ބޭއްވި ރަސްމިއްޔާތުގައި ފިނޭންސް މިނިސްޓަރ އަދި އިސްލާމިކް ޑިވެލޮޕްމަންޓު ބޭންކު (އައިއެސްޑީބީ)ގެ ގަވަރުނަރު އިބްރާހިމް އަމީރު ބައިވެރިވެވަޑައިގެންނެވިއެވެ.
