ނޮވެމްބަރު މަހު ޤަތަރުގައި އޮންނަ ފީފާ ވޯލްޑް ކަޕަށް ފަހު، ޕޯޗުގަލްގެ ޤައުމީ ޓީމަށް ކުޅުން ހުއްޓާ ނުލާނެ ކަމުގެ އިޝާރާތެއް އެ ޓީމުގެ ކެޕްޓަން ކްރިސްޓިއާނޯ ރޮނާލްޑޯ ދީފިއެވެ.

މިމަގު ކުޅުމަށް ހަަމަޖެހިވާ ނޭޝަންސް ލީގުގެ މެޗުތަކަށް ޕޯޗުގަލްގެ ޓީމުގައި ރޮނާލްޑޯ ވަނީ ހިމަނާފައެވެ. އަދި ވޯލްޑް ކަޕްގައި ވެސް އޭނާ ފެންނާނެއެވެ. މިއަހަރުގެ ވޯލްޑް ކަޕަށް ފަހު އުމުރުން 37 އަހަރުގެ ރޮނާލްޑޯ ޤައުމީ ޓީމުން ރިޓަޔާކުރާނެ ކަމަށް ފުޓުބޯޅައިގެ ތަޖުރިބާކާރުން ވަނީ ބުނެފައެވެ.

ނަމަވެސް ރޮނާލްޑޯ ވަނީ ވޯލްޑް ކަޕަށްފަހު ޤައުމީ ޓީމަށް ކުޅުން ހުއްޓާނުލާނެ ކަމުގެ އިޝާރާތެއް ދީފައެވެ. ރޮނާލްޑޯ ބުނީ، ޕޯޗުގަލްއާއެކު އޭނާ އަށް ކުރެވުނީ ދިގު ދަތުރެއް ކަމަށާއި، ނަމަވެސް އަދި ވެސް އެ ދަތުރު ނިންމާލަން އޭނާ ބޭނުންނުވާ ކަމަށެވެ. ރޮނާލްޑޯ ބުނީ އޭނާ އަށް ހިތްވަރު ލިބޭ ކަމަށާއި، އުންމީދުތައް ބޮޑު ކަމަށެވެ. މީގެ އިތުރުން އޭނާ ބުނީ ޤަތަރުގައި އޮންނަ ވޯލްޑް ކަޕާއި، އަންނަ އަހަރު އޮންނަ ޔޫރޯ މުބާރާތަށް ޕޯޗުގަލް ޓީމުގައި އޭނާ ހިމެނިފައިވަނީ ޒުވާން ކުޅުންތެެރިންތަކަކާއެކު ކަމަށެވެ. ރޮނާލްޑޯ ބުނީ ޤައުމީ ޓީމާއެކު ވޯލްޑް ކަޕްގެ އިތުރުން ޔޫރޯ މުބާރާތުގައި ވެސް އޭނާ ކުޅޭނެ ކަމަށެވެ.

ރޮނާލްޑޯ އަކީ ޕޯޗުގަލްގެ ޤައުމީ ޓީމަށް އެންމެ ގިނަ ލަނޑު ޖެހި ކުޅުންތެރިޔާއެވެ. އޭނާ ވަނީ ޤައުމީ ޓީމަށް ކުޅެދިން 189 މެޗުގައި 117 ލަނޑު ޖަހާފައެވެ. މީގެ އިތުރުން ރޮނާލްޑޯ ވަނީ ޕޯޗުގަލްއާއެކު 2016 ވަނަ އަހަރުގެ ޔޫރޯ މުބާރާތާއި، 19-2018 ވަަނަ އަހަރުގެ ނޭޝަންސް ލީގު ކާމިޔާބުކޮށްފައެވެ.