އަންނަ ނޮވެމްބަރު މަހު ގަތަރުގައި ފަށާ ވޯލްޑްކަޕް ފުޓްބޯޅަ މުބާރާތުގައި ބޭނުންކުރާ ކެޕްޓަން ބޭންޑްތައް މެދުވެރިކޮށް ދުނިޔެ އަށް ހާއްސަ މެސެޖުތަކެއް ދިނުމަށް ގައުމުތަކުން ނިންމައިފި އެވެ.
މި ގޮތުން ޕޮލެންޑުގެ ކެޕްޓަން ރޮބަޓް ލެވޮންޑޯސްކީ އަޅާނީ ޔުކްރޭނުގެ ގައުމީ ދިދާގައިވާ ރީނދުލާއި ނޫ ކުލަތަކުގެ ބޭންޑެކެވެ. ބޭނުމަކީ ރަޝިޔާއިން ޔުކްރޭނުގައި ކުރަމުންދާ ހަނގުރާމައާ ދެކޮޅު ހެދުމެވެ. ހަނގުރާމައިން ދުނިޔެ ސުންނާފަތިކުރުމުގެ ބަދަކުގައި ސުލްހަ ގެނުވުމަށް ގޮވާލުމެވެ. ޖަރުމަނާއި އިނގިރޭސިވިލާތް އަދި ފްރާންސް ހިމެނޭހެން 13 ގައުމަކުން ބޭނުންކުރަން ނިންމާފައިވަނީ "ވަންލަވް" ކެޕްޓަން ބޭންޑެވެ. މި ބޭންޑްގައި ވަނީ ހިތެއްގެ ތެރޭގައި ރެއިންބޯގައި ހިމެނޭ ކުލަތައް ހިމަނައިފަ އެވެ. އަދި އެކުލަތަކުގެ މަތީގައި ހިތުގެ ތެރެއަށްވާގޮތަށް ހިސާބު އަކުރުން އެކެއް ޖަހާފައިވެ އެވެ. އަދި ހިތުގެ ބޭރުގައި ވަންލަވް އިނގިރޭސިބަހުން ޖަހާފައިވެ އެވެ. މީގެ އިތުރުން ނަސްލީ އިމްތިޔާޒުތަކަށާއި ޖިސްމާނީ ހަމަހަމަކަމަށް ގޮވާލައި ތައްޔާރުކޮށްފައިވާ ބޭންޑްތައް ވެސް ބޭނުންކުރާނެ އެވެ.
މިކަމާހެދި ފީފާ އާއި ގަތަރުން ވަނީ ކަންބޮޑުވުން ފާޅުކޮށްފަ އެވެ. އެއް ޖިންސުން ކައިވެނިކުރުމާއި ގުޅުން ހިންގުމަކީ ގަތަރުން ތާއީދުކުރާ ކަމެއްނޫނެވެ. އަދި އެފަދަ އަމަލުތަކެއް ފާޅުގައި ހިންގައިފިނަމަ ގަތަރު ސަރުކާރުން އެބަޔަކާމެދު ފިޔަވަޅުއަޅާނެ އެވެ. އެފަދަ ކަމެއްކުރާ ބަޔަކަށް އާއްމުންގެ ފަރާތުން އަތުވެދާނެ ހަމަލާއަކަށް ގަތަރު ސަރުކާރުން ޒިންމާނުވާނެ ކަމަށް ވެސް ވަނީ ބުނެފަ އެވެ.
ޕޮލެންޑުން ޔުކްރޭނުގެ ކުލަތައް ހިމެނޭ ބޭންޑް އަޅަން ނިންމިކަން ރަސްމީކޮށް އިއުލާނު ކުރީ ޕޮލެންޑުގެ ވެރިރަށް ވާސޯގެ ނެޝަނަލް ސްޓޭޑިއަމުގައި ލެވޮންޑޯސްކީ އާއި ޔުކްރޭނުގެ ފުޓްބޯޅައިގެ އެމްބެސެޑަރު އަދި އެ ގައުމުގެ ކުރީގެ ކެޕްޓަން އަންދްރޭ ޝެވްޗެންކޯ އެވެ.
"އަހަރެން ވޯލްޑްކަޕުގައި އަޅާނީ ޔުކްރޭނުގެ ކުލަތައް. ކުޅުންތެރިއެއްގެ ގޮތުންނާއި އިންސާނެއްގެ ގޮތުން އަހަރެން އެދެނީ ސުލްހައަށް. އަހަންނަށް ހީވަނީ މިފަދަ ކަންކަމަކީ ސުލްހައަށް ވަރަށް މުހިންމު ކަންތައްތައްހެން. ލެވޮންޑޯސްކީ ބުންޏެވެ.ޕޮލެންޑްގެ ކެޕްޓަން ލެވޮންޑޯސްކީ
ރަޝިޔާއިން ޔުކްރޭނުގައި ކުރާ ހަނގުރާމައާ ދެކޮޅު ހެދުމުގެ ގޮތުން ލެވޮންޑޯސްކީ ވަނީ އޭނާގެ ކުރީގެ ކުލަބު ޖަރުމަނުގެ ބަޔާން މިއުނިކްގައި ވެސް ޔުކްރޭނުގެ ކުލަތައް ހިމެނޭ ބޭންޑެއް އަޅައިފަ އެވެ.
ޝެވްޗެންކޯ ބުނީ އޭނާގެ ގައުމުގެ ކުލަތައް ހުރި ބޭންޑެއް އެޅުމަށް ލޮވެންޑޯސްކީ ނިންމުމުން އެކަމަށް ޝުކުރު އަދާކުރާ ކަމަށެވެ.
"އަހަރެންގެ ނަޒަރުގައި ކެޕްޓަން ބޭންޑަކީ އެމީހެއްގެ ގައުމުގެ ލީޑަރޝިޕް، ބާރާއި ޝައުގުވެރިކަން ރަމްޒުކޮށްދޭ އެއްޗެއް. އަހަރެން ބޭނުން މި ބޭންޑް ވީ އެންމެ ގިނަ ބަޔަކަށް ފޯރުކޮށްދޭން. ލެވޮންޑޯސްކީ އަށް ޝުކުރު ވެސް އަދާކުރަން،" ޝެވްޗެންކޯ ބުންޏެވެ.ޝެވްޗެންކޯ
އިނގިރޭސި ކެޕްޓަން ހެރީކޭން ބުނީ ކެޕްޓަން ބޭންޑްތަކަކީ ވަރަށް ނުފޫޒުގަދަ އެއްޗެއް ކަމަށާއި ބޭންޑް މެދުވެރިކޮށް ވަރަށް ފާޅުކަން ބޮޑުގޮތެއްގައި އެގައުމަކުން ދޭން ބޭނުންވާ މެސެޖް ފޯރުކޮށްދެވޭނެ ކަމަށެވެ.
