އެމްފައިސާ މެދުވެރިކޮށް ވަޤުފު ފަންޑަށް ފައިސާ ޖަމާކުރެވޭ ގޮތް ހަދައިފި
21 ސެޕްޓެމްބަރު 2022 | ބުދަ 16:05ފައިސާ ޖަމާކުރުމަށް ކިޔުއާރު ކޯޑުތައް މިސްކިތްތަކުގައި ބަހައްޓާނެ
އެމްފައިސާ މެދުވެރިކޮށް ވަޤުފު ފަންޑަށް ފައިސާ ޖަމާކުރެވޭ ޚިދުމަތް ތައާރަފު ކުރުމަށް ބޭއްވި ރަސްމިއްޔާތުގެ ތެރެއިން
އިސްލާމިކް މިނިސްޓްރީ އާއި އުރީދޫ މޯލްޑިވްސް ގުޅިގެން އެ ކުންފުނީގެ "އެމްފައިސާ" މެދުވެރިކޮށް ވަޤުފު ފަންޑަށް ފައިސާ ޖަމާ ކުރެވޭ ގޮތް ހަދައިފިއެވެ.
މި ޚިދުމަތް ތަޢާރަފު ކޮށްފައިވަނީ ބުދަ ދުވަހު ކ. ހިންމަފުށި، މަސްޖިދުލް އިނާރާގައި ބޭއްވި ހާއްސަ ރަސްމިއްޔާތެއްގައެވެ. މި ރަސްމިއްޔާތުގައި އެ ޚިދުމަތް ތައާރަފު ކޮށްދެއްވީ މިނިސްޓަރ އޮފް އިސްލާމިކް އެފެއާޒް ޑރ. އަހުމަދު ޒާހިރު އަލީ އާއި އުރީދޫ މޯލްޑިވްސްގެ ސީއީއޯ އަދި މެނޭޖިންގ ޑިރެކްޓަރު ޚާލިދު އަލް ހަމާދީއެވެ.
އިސްލާމިކް މިނިސްޓްރީގެ ވަޤުފް ފަންޑަށް އެމްފައިސާ މެދުވެރިކޮށް ޞަދަގާތް ކުރަން ބޭނުންވާ ފަރާތްތަކަށް، މިސްކިތްތަކުގައި ބަހައްޓާ ކިއުއާރު ކޯޑު އުރީދޫ އެޕްމެދުވެރިކޮށް ސްކޭން ކުރުމުން ސަދަގާތް ކުރެވޭނެއެވެ. މި ޙިދުމަތް އިފްތިތާހު ކުރުމުގެ ގޮތުން ފުރަތަމަ ކިއުއާރު ކޯޑް ބަހައްޓާފައިވަނީ ހިންމަފުށީގައި ހުންނަ މަސްޖިދުލް އިނާރާގައެވެ. މި ކިއުއާރު ކޯޑުތައް އެހެން މިސްކިތްތަކުގައިވެސް ކައިރި މުސްތަގުބަލެއްގައި ބަހައްޓާނެކަމަށް އުރީދޫ އިން ބުންޏެވެ.
އުރީދޫގެ ސީއީއޯ ޚާލިދު ވިދާޅުވީ އެ ކުންފުނިން އަބަދުވެސް މަސައްކަތްކުރަނީ މުޖުތަމައު ބިނާކޮށް، އެ ކުންފުނީގެ ވަސީލަތްތަކުގެ ބޭނުންކޮށްގެން ތަރައްގީއަށް މަގުފަހިކޮށްދިނުމަށް ކަމަށެވެ. އަދި ވަޤުފު ފަންޑަކީ ދުނިޔޭގެ އެކި ކަންކޮޅުތަކުގައިވެސް ކަންކަމަށް ފަންޑުކުރުމުގައި އެންމެ ދެމެހެއްޓެނިވި އެއް ވަސީލަތް ކަމަށާއި ރާއްޖޭގެ މިސްކިތްތައް ބެލެހެއްޓުމާއި ތަރައްޤީކުރުމަށް އިސްލާމިކް މިނިސްޓްރީން އުފައްދާފައިވާ އެ ފަންޑަށް އެމްފައިސާ މެދުވެރިކޮށް ރައްޔިތުންނަށް ފައިސާ ޖަމާކުރެވޭ ގޮތް މަގުފަހިކޮށްދިނުމަކީ ލިބޭ ވަރަށް ބޮޑު އުފަލެއް ކަމަށް އޭނާ ވިދާޅުވިއެވެ.
މި ޚިދުމަތާ ގުޅޭ ގޮތުން އިސްލާމިކް މިނިސްޓަރު ޑރ. އަހުމަދު ޒާހިރު އަލީ ވިދާޅުވީ ރައްޔިތުންގެ ތެރޭގައި މިސްކިތްތަކަށް އެހީވުމަށްޓަކައި ޞަދާޤާތްކުރަން ބޭނުންވާ ގިނަ މީހުން ތިބުމާއެކު، މިނިސްޓްރީގައި އުފައްދާފައިވާ "މިސްކިތްތަކަށް އެހީވާ ވަޤްފް ފަންޑު" އަށް ފައިސާ ޖަމާކުރެވޭނެ ލުއިފަސޭހަ ގޮތްތަކެއް ހޯދައިދިނުމަކީ އަބަދުވެސް އެ މިނިސްޓްރީން ކުރަމުން އަންނަ މަސައްކަތެއް ކަމަށެވެ. އެގޮތުން އުރީދޫ އެމް ފައިސާ މެދުވެރިކޮށް މިސްކިތްތަކަށް އެހީވުމުގެ ފުރުޞަތު ހޯދައިދެވިގެން ދިއުމަކީ، ރައްޔިތުންނަށް ލިބިގެންދިޔަ ވަރަށް ބޮޑު ހިތްހަމަޖެހުމަކަށްވާނޭކަން ޤަބޫލުކުރައްވާ ކަަމަށް މިނިސްޓަރ ވިދާޅުވިއެވެ.
ރައްޔިތުންގެ ދިރިއުޅުން މުއްސަނދިކުރުމަށް އުރީދޫ މޯލްޑިވްސް އިން ގެންގުޅޭ ތަސައްވުރާއި އެއްގޮތަށް، ފެށުނީއްސުރެވެސް އެކުންފުނިން ދަނީ ފަސޭހަކަމާއި ރައްކާތެރިކާމާއެކު އެމްފައިސާ ޕްލެޓްފޯމް މެދުވެރިކޮށް ސަރުކާރާއި، ޖަމިއްޔާ ޖަމާޢަތްތަކާއި، ފައުންޑޭޝަންތަކަށް އެހީތެރިކަން ފޯރުކޮށްދިނުމަށް މަގު ފަހި ކޮށްދެމުންނެވެ. އެގޮތުން އެމްފައިސާ މެދުވެރިކޮށް މިހާރުވެސް އެހީތެރިކަން ފޯރުކޮށްދެވޭ ފަރާތްތަކުގެ ތެރޭގައި ކެންސަރ ސޮސައިޓީ އާއި މޯލްޑިވްސް ޑެފް އެސޯސިއޭޝަނާއި ކުޑަކުދިންގެ ހިޔާ އާއި ފިޔަވައްޗާއި މޮމްސް އެންޖީއޯ އާއި ޕީސް ފައުންޑޭޝަން ހިމެނެއެވެ.
މިސްކިތްތަކަށް އެހީވާ ވަޤުފް ފަންޑަކީ މިސްކިތްތައް އިމާރާތްކުރުމަށާއި މިސްކިތްތަކުގެ މަރާމާތަށާއި މިސްކިތްތަކަށް ހޯދަންޖެހޭ ތަކެތި ހޯދުމުގެ އިތުރުން އެހެނިހެން ގޮތްގޮތުންވެސް މިސްކިތްތަކަށް ބޭނުންވާ އެކިއެކި ކަންކަމަށް ފައިސާ ވަޤްފް ކުރެވޭނެ މަގު ފަހިކޮށްދިނުމުގެ ގޮތުން މިނިސްޓްރީ އޮފް އިސްލާމިކް އެފެއާޒުން އުފައްދާފައިވާ ފަންޑެކެވެ.
