ޖޫނިއާ ރޭންކިން ދުނިޔޭގެ ގަދަ ތިނެއްގައި ރާއްޖޭގެ އާމިން

ބޮޑީ ބޯޑިންގެ ޖޫނިއާ ކެޓަގަރީން ދުނިޔޭގެ ގަދަ ތިނެއްގައި ރާއްޖޭގެ އާމިން މޫސާ ހިމެނިއްޖެއެވެ.

އާމިން ވަނީ ދާދި ފަހުން ރާއްޖޭގައި ބޭއްވި އައިބީސީ ވޯލްޑް ޓުއާ މޯލްޑިވްސް ޕްރޯ 2022 ގެ ޖޫނިއާ ބައިގެ ފައިނަލްގައި ވާދަކޮށްފައެވެ. މިއާއެކު އާމިން ވެގެން ގޮސްފައިވަނީ ބޮޑީ ބޯޑިންގެ ދުނިޔޭގެ އެންމެ މަތީ ފަންތީގެ މުބާރާތެއްގެ ފައިނަލްގައި ވާދަކުރި ފުރަތަމަ ދިވެހި އެތުލީޓަށެވެ.

ޖޫނިއާ ރޭންކިންގެ އެއް ވަނައިގައި ފަސް އެތުލީޓަކު ވަނީ ހިމެނިފައެވެ. އެއީ 2000 ޕޮއިންޓާއެކު ޖޮއެލް ރޮޑްރިގޭސް، ގަބްރިއަލް މޮލީނާ، ޖޯޖު ހެނާންޑޭޒް، މައިކޮސް ޔަންސޭ އަދި ޕައުލޯ ގަލަޓީއެވެ. ތިން ވަނަ އަށް ވެސް ވަނީ ފަސް އެތުލީޓުން ހިމެނިފައެވެ. އެއީ 1720 ޕޮއިންޓާއެކު ނިކޮލަސް އެސްޕިނޯޒާ، ފަބިއޯ ސާވެދްރާ، ގިލެރުމޭ މޮންޓަނެގްރޯ، އާމިން މުސާ އަދި ހޯސޭ އޮގަސްޓޯއެވެ.

މީގެ ތެރެއިން މޮލީނާ އަކީ ރާއްޖޭގައި އޮތް މުބާރާތުގައި އާމިން ފައިނަލްގައި ވާދަކުރި އެތުލީޓެވެ. ޖޫނިއާ ކެޓަގަރީގެ ރޭންކިން އެއްކޮށް ފައިނަލް ވާނީ އޮކްޓޫބަރު މަހު ކެނަރީ އައިލެންޑުގައި ބާއްވާ އައިބީސީގެ އިވެންޓަށްފަހުއެވެ. އެ އިވެންޓު އޮންނާނޯ އޮކްޓޫބަރު މަހުގެ 30-15 އަށެވެ. މި އިވެންޓުގައި ރާއްޖޭގެ އެތުލީޓުން ބައިވެރިކުރުމަށް މޯލްޑިވްސް ބޮޑީބޯޑިން އެސޯސިއޭޝަން (އެމްބީބީއޭ)އިން އަންނަނީ މަސައްކަތް ކުރަމުން ކަމަށް އެ އެސޯސިއޭޝަނުން ވަނީ ވިދާޅުވެފައެވެ.

މިއާއެކު އާމިން އަކީ ދުނިޔޭގެ ރޭންކިންގެ ކުރިއަށް ޖެހިލި ފުރަތަމަ އެތުލީޓެވެ.